- جالپى ۇمىتكەرلەردىڭ قاي-قايسىسى دا قال-قادىرلەرىنشە حاكىم ابايدىڭ رۋحاني باي مۇراسىنان سىر شەرتىپ, جاۋھار سوزدەرىن ۇلگى ەتىپ ۇگىتتەدى, الىپ اقىننىڭ ارمان-مۇراتى مەن قازاقتىڭ بۇگىنگى بەت-بەينەسىن استاستىرۋعا ۇمتىلدى. قالامگەر ايتىسكەرلەر تاقىرىپقا دەندەپ قانا قويماي, بۇگىنگى قوعامنىڭ «اياق الىسى, جۇرەك قاعىسىن» اڭداپ, ەلدىڭ مۇڭى مەن مۇقتاجىن تۇگەندەدى, وزەكتى ماسەلەلەردى تولعادى. ەلدىك, ۇلتتىق, رۋحاني قۇندىلىقتاردى قالامىنا ارقاۋ ەتىپ, جازبا ايتىستىڭ تابيعاتىن جان-جاقتى اشا ءبىلدى, - دەيدى «جازبا ايتىس» جوباسىنىڭ ۇيلەستىرۋشىسى, اقىن جاندوس جۇسىپبەك.
قازىلار القاسىنىڭ شەشىمىمەن ارقالىقتىقاقىن باتىرلان ساعىنتاەۆ جازبا ايتىستىڭ جەڭىمپازى اتاندى. 2-ءشى ورىن كوركەم ايتىسىمەن ەرەكشەلەنگەن ەلوردالىق ۇلانبەك باقىتقا بۇيىرسا, 3-ورىندى نۇر-سۇلتان قالاسىنىڭ اقىنى نۇرداۋلەت عالىمجان ۇلى مەن تورعايلىق زليحا كەنجەعوزينا ءوزارا ءبولىسىپ الدى.
- قازاق ادەبيەتىندە جازبا ايتىس ءداستۇرى ءحىح عاسىردىڭ ەكىنشى جارتىسىمەن حح عاسىردىڭ باسىندا قالىپتاسىپ, دامىعان ەدى. اسىرەسە سىر بويىنداعى ءسوز سۇلەيلەرىنەن قالعان جازبا ايتىس مۇرالارى بۇگىندە كوپشىلىككە جاقسى تانىس. ءبىزدىڭ وڭىرىمىزدە ءومىر سۇرگەن نۇرجان ناۋشاباي ۇلى, بايجان بەيسەن ۇلى, التىباس اقمولدا سەكىلدى اقىنداردىڭ جازبا ايتىستىڭ دامۋىنا ءوز ۇلەستەرىن قوسقاندىعى ءمالىم. كەڭەس ۇكىمەتى ورناعانننان كەيىن 1940 جىلدارى ومار شيپين, وتەمىس قالاباەۆ, اقىلگەك جۇمابەكوۆالار, 1970 جىلدارى ميزام جاراسقانوۆ, ءابدىراحمان بايعابىلوۆ, عالي ءابىشوۆ, باقىتجامال وسپانوۆالار وبلىستىق ءباسپاسوز بەتتەرىندە ءسوز سىناستى. بىراق كەيىنگى كەزدە ۇمىت بولا باستاعان وسى ءداستۇردى قايتا جاڭعىرتقان ۇيىمداستىرۋشىلارعا ءبىزدىڭ العىستان باسقا ايتارىمىز جوق. ارينە, جازبا ايتىسقا ءتۇسۋ اقىندارعا وڭاي ەمەس. مۇندا سۋىرىپسالما ايتىسقا قاجەتتى قيىننان قيىستىرىپ ءسوز تاپقىشتىقتان باسقا, ويدىڭ تاپقىرلىعى مەن ءسوزدىڭ وتكىرلىگى, جازعان ولەڭنىڭ كەلىستى, كوركەم بولۋى كەرەك-اق. بۇل تالاپقا ساي كەلەتىن ولەڭ جازۋ جازبا ايتىسقا قاتىسقان اقىنداردىڭ ءاربىرىنىڭ ويىندا بولعانى دا انىق. بۇل ءداستۇر الداعى ۋاقىتتا دا جالعاساتىن بولسا, ولكە ادەبيەتىنە قوسقان ۇلەسى, تيگىزەر ىقپالى جاقسى جاعىنان عانا كورىنەتىنىنە سەنىمىن مول, - دەدى ايتىس جەڭمپازى ب.ساعىنتاەۆ.
جوبانىڭ بيىلعى باستى جاڭالىعى – ءۇش جىل بويى وتكەن جىر سايىستارى بيىل جەكە جيناق بولىپ شىقتى. «جازبا ايتىس – جىر-جاۋھار» اتتى ەتجەڭدى كىتاپقا ۇزدىك ايتىستار ەنگىزىلىپ, قالىڭ وقىرمانعا جول تارتىپ وتىر. جيناقتىڭ جارىق كورۋىنە دە وبلىستىق ىشكى ساياسات باسقارماسى قولداۋ جاساعانىن ايتا كەتۋ كەرەك.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ءۇشىن Telegram جەلىسىندە بىزگە جازىلىڭىز.
