ەلباسى كىتاپحاناسىنىڭ ديرەكتورى, پروفەسسور ءامىرحان راحىمجانوۆتىڭ ايتۋىنشا, زامان وزگەرىپ, قوعامدىق سانادا كۇرت ساپىرىلىستار تۋعان سايىن ابايدىڭ مۇراسى جاڭا قىرىنان جارقىراي اشىلىپ, قادىرىن ارتتىرا تۇسپەك. داناگوي اقىننىڭ شىعارماشىلىعىن جاڭعىرتۋدا ەلباسى كىتاپحاناسى اباي وقۋلارىن ۇيىمداستىرۋدى يگى داستۇرگە اينالدىرىپ قانا قويماي, جاستاردىڭ وقۋعا قۇشتارلىعىن وياتىپ, ومىرلىك كوزقاراسىن كەڭەيتۋ ماقساتىندا بيىل «اباي – 175» جوباسىن ىسكە قوستى. ويشىلدىڭ پالساپالىق مۇراسىن ارنايى باعدارلامامەن ازىرلەگەن سەمينار-ترەنينگتەر مەن بىلىكتىلىك دارىستەرىنىڭ نەگىزىنە الادى. رەسمي سايتىنداعى ەلەكتروندى كاتالوگتىڭ كومەگىمەن مەكەمە اباي ەڭبەكتەرىنە قولجەتىمدىكتى ىسكە اسىردى. ويشىلدىڭ تۋعان كۇنىنە وراي ەلباسى كىتاپحاناسى اقىننىڭ رۋحى مەن شىعارماشىلىعىنا ارناپ كورمەلەر مەن ءتۇرلى ءىس-شارالاردى ۇيىمداستىرۋدى دا ادەتكە اينالدىرعان. 2016 جىلى كىتاپحانا ءارحيۆىنىڭ قىزمەتكەرلەرى شىعىس قازاقستان وبلىسىنداعى جيدەباي اۋىلىنا ساپارمەن بارىپ, سەمەي قالاسىنداعى تاريح جانە ولكەتانۋ مۋزەيىنەن, قۇجاتتاۋ ورتالىعىنان, اباي اتىنداعى امبەباپ كىتاپحانادان اقپارات جيناپ, تىڭ دەرەكتەرمەن قوردى تولىقتىردى.
بۇگىندە اباي وقۋلارى ەلىمىزدىڭ ءتۇرلى ايماقتارىنان قولداۋ تاۋىپ وتىر. ءۇش جىلدىڭ ىشىندە ماراپاتتاۋ راسىمىنە قاتىسقان بەلگىلى ابايتانۋشىلار, مەملەكەت جانە قوعام قايراتكەرلەرى, عىلىم جانە مادەنيەت سالاسىنىڭ سىيلى وكىلدەرى بۇل شارانىڭ ماڭىزدىلىعىن بەلگىلەپ وتىرادى.
بيىلعى بايقاۋدا قازىلار القاسىنىڭ شەشىمىمەن جۇلدەلى ورىندار مەن نوميناتسيالارعا يە بولعاندار:
ءى ورىن – نۇر-سۇلتان قالاسىنىڭ №2 كوپبەيىندى اۋرۋحاناسى مەديتسينا قىزمەتكەرلەرىنىڭ ۇجىمى;
ءىى ورىن – سەمەي قالاسىنداعى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىنىڭ 11 سىنىپ وقۋشىسى السانا سمايلوۆا;
ءىىى ورىن – جامبىل وبلىسى, قورداي اۋدانى, سورتوبە اۋىلىنداعى ورتا مەكتەپتىڭ 3 سىنىپ وقۋشىسى كاريما ليۋشانلو;
«اباي مۇراسىن ناسيحاتتاۋشى» نوميناتسياسىنىڭ جەڭىمپازى – الماتى وبلىسى, ەڭبەكشى قازاق اۋدانىنىڭ ەسىك قالاسىنداعى ۆ.تەرەشكوۆا اتىنداعى ورتا مەكتەپتىڭ 2 سىنىپ وقۋشىسى يۋسۋف شيرينوۆ.
ال «ەڭ كىشكەنتاي ۇمىتكەر» نوميناتسياسىندا جەڭىستى قانجىعاسىنا بايلاعان پاۆلودار وبلىسى, ەكىباستۇز قالاسىنىڭ №24 «اينالايىن» بالاباقشاسىنىڭ تاربيەلەنۋشىسى جىگەر حاسەن كورەرمەن كوزايىمىنا اينالدى.
– جىگەردىڭ ولەڭ وقۋعا قۇشتارلىعى 3 جاسىندا وياندى. اباي شىعارماشىلىعىنا قۇرمەتى دە ەرتە قالىپتاسقان. ونىڭ ولەڭدەرىن جاتتاۋعا كەلگەندە, مەكتەپ باعدارلاماسىنداعى قىسقا ۇزىندىلەردى قاناعات تۇتپاي, تولىق نۇسقاسىن جاتتاعاندى ۇناتادى. ولەڭنىڭ ءانى بولسا, شىرقاپ ورىنداعاندى ءجون سانايدى. بالا تۇسىنىگىنە قيىنداۋ سوزدەر مەن ۇعىمداردىڭ ءمانىن ىلعي سۇراپ ويىنا ءتۇيىپ جۇرەدى. 7-8 ولەڭىن جاتتاعان شاعىندا ول ابايدىڭ قارا سوزدەرىنە كوشتى. قىزىعى, سىڭارى جىبەككە قاراعاندا, جىگەردىڭ ويلاۋ قابىلەتى وزگەشە, اعالىعى ءبىلىنىپ تۇرادى. ومىرگە كوزقاراسى, اقىل-پاراساتى اباي مۇراسىنىڭ ارقاسىندا قالىپتاستى دەسەك ارتىق بولمايدى. وسى تۇستا وسكەلەڭ ۇرپاقتى تاربيەلەۋ ىسىنە ۇلەس قوسىپ كەلە جاتقان ەلباسى كىتاپحاناسىنا العىسىمىز شەكسىز, – دەيدى جىگەر حاسەننىڭ اناسى مەرۋەرت ورازالينا.
– اباي مۇراسى – قازاق حالقىنىڭ اسىل قازىناسى. ۇلى ويشىلدىڭ قالامىنان تۋعان ولەڭ جولدارىن ءتورت جاسار بالانىڭ اۋزىنان ەستىگەندە كوكىرەكتى ەرىكسىز ماقتانىش كەرنەپ, بويدى وسكەلەڭ ۇرپاققا دەگەن ريزاشىلىق سەزىمى بيلەيدى. ادەبيەت ەستافەتاسىندا كوپتىڭ كوزىنە ءتۇسىپ, دارىنىمەن ەرەكشەلەنگەن قاتىسۋشىلار جىلدا ماراپاتتالعانىمەن, بۇل سايىستا جەڭىلگەندەر بولمايدى. سەبەبى اباي مۇراسىن دارىپتەۋدى مىندەت تۇتقان بايقاۋدىڭ ءار قاتىسۋشىسى سول ماقساتتى جۇزەگە اسىرىپ, ماڭىزدى ءىستىڭ ورىندالۋىنا سەپتىگىن تيگىزەدى. بۇل – ورتاق جەڭىس, – دەيدى كىتاپحانا ديرەكتورى ءامىرحان راحىمجانوۆ.
«Instagram», «Facebook» الەۋمەتتىك جەلىسىنە #ەلباسىكىتاپحاناسىاباي#ابايدىوقيمىز175#بيبليوتەكاەلباسىاباي #چيتاەمابايا175 حەشتەگىمەن شىققان 454 پوستتىڭ 332-ءسى قازاق تىلىندە, 122-ءسى ورىس تىلىندە جاريالانعان. تۇساۋى كەسىلگەن ساتتەن باستاپ اباي وقۋلارىنا 1000-نان استام ادام قاتىسقان.
توپ جارعان جەڭىمپازدارعا العىس حاتتار مەن سىيلىقتار تاراتىلماق.
