نۇر-سۇلتان قالاسىنىڭ تۇرعىندارى جىل سايىن دەمالىپ, دەنساۋلىقتارىن قالپىنا كەلتىرۋ ءۇشىن جازدى اسىعا كۇتەدى. جاھان جۇرتىن ابىگەرگە سالعان ىندەتتىڭ ءالى باسىلار ءتۇرى جوق. سوعان قاراماستان ەلوردا تۇرعىندارى دەنساۋلىقتارىنا ءجىتى ءمان بەرىپ, يممۋندىق بەلسەندىلىكتى ارتتىرۋ ءۇشىن ارنايى شيپاجاي نەمەسە دەمالىس كەشەندەرىنە بارۋدى جالعاستىرۋدا.
قالا ماڭىنداعى ءىرى دەمالىس ورىندارىنا Balqaragai, Green Park, زولوتوي فازان, ايشا سىندى كەشەندەر كىرەدى. ماسەلەن, Balqaragai دەمالىس ايماعىندا سىيىمدىلىعى 30 ادامعا دەيىن جايلى بورەنەلى كوتتەدجدە ورنالاسا الاسىز. دەمالىس كەشەنى ەلوردانىڭ اق قايىڭدى جاسىل بەلدەۋىندە, قولدان جاسالعان ورماندا ورنالاسقان.
ال قوسشى كەنتىندە, نۇرا وزەنىنىڭ بويىندا ورنالاسقان قالا سىرتىنداعى Green Park اۋماعىندا جازعى كۇركەلەر, كيىز ۇيلەر, يپپودروم جانە ءتىپتى شاعىن حايۋاناتتار باعى دا بار. سولاردىڭ ىشىندە «زولوتوي فازان» تۋرالى اۋىز تولتىرىپ ايتۋ ءۇشىن اتالعان كەشەننىڭ باسشىسى دارحان سەرىكباي ۇلىمەن تىلدەسكەن ەدىك.
– ءبىز دەمالىس ورنىمىزدى وتباسىلىق كوڭىل كوتەرۋ اۋماعى رەتىندە دامىتا وتىرىپ, اۋماق كولەمىن بارىنشا ۇلكەيتۋگە تىرىستىق. ءاسفالتتى جانە ورماندى, دالالى سوقپاق جولدارمەن سەرۋەندەۋدى ۇسىنا الامىز. دەمالىس ايماعى 800-دەن استام گەكتاردى قامتيدى. بۇل – وقشاۋلانۋعا وتە جاقسى ورىن. سونداي-اق قوناقتارىمىزدىڭ 100 مەترگە دەيىن اراقاشىقتىق ساقتاۋىن قامتاماسىز ەتەمىز. دەمالۋعا ارنالعان كوپتەگەن جەكە الاڭ, جازعى مەيرامحانا, كۇركە (بەسەدكا), بالىق اۋلاۋعا ارنالعان پيرس, تەرراسا, كولدىڭ قاسىندا ورنالاسقان كوتتەدج نەمەسە كۇمبەزدى ۇيشىكتەر مەن كيىز ۇيلەر بار. قىلقان جاپىراقتى ورماندا سەرۋەندەۋگە ارنالعان سوقپاقتار دا بار, – دەيدى د.سەرىكباي ۇلى.
سونداي-اق «زولوتوي فازان» كەشەنى كۇنشىعىس ەلىنىڭ ورمان تەراپياسىن ءتيىمدى ەمدەۋ ادىستەرىنە الماستىرىپ وتىر. ماسەلەن, تابيعي تەراپيا ءادىسى. بۇل – ونەركاسىپتىك قالانىڭ شۋىنان الىستاتىپ, ەموتسيالىق جايلىلىق بەرەتىن, تابيعي دىبىستارعا باعىتتالعان. كەلەسى عىلىمي تۋريزم ءادىسى – كولدەردە ۇيا سالاتىن قۇستاردىڭ (جابايى قازدار, تىرنالار, اققۋلار, ۇيرەكتەر مەن ونداترلار جانە ت.ب.) ءومىرىن زەرتتەۋگە ارنالعان تابيعاتتاعى جۇمىس. وسى ارقىلى اتا-انالار بالالارىنا ورماندا سەرۋەندەۋ كەزىندە تۇرمىستىق ءومىر ءسۇرۋ جاعدايلارىن ۇيرەتەدى.
اتالعان دەمالىس ورنى ايتۋلى ءىس-شارالار وتكىزەتىن الاڭ رەتىندە قىزمەت كورسەتەدى. سولاردىڭ قاتارىندا, بۇعان دەيىن قالا اكىمدىگىنىڭ «جاستار ساياساتى» ءبولىمىنىڭ باستاماسىمەن ەلوردا جاستارىنا ارنالعان كوۋچ-ترەنينگتەر ۇيىمداستىراتىن.
– جىل سايىن اقمولا وبلىسىنان بالالاردى جازعى لاگەرگە الىپ بارامىز. وبلىستىق اكىمدىك پەن «Howard Roark» سەرىكتەستىگىمەن بىرلەسە وتىرىپ, جازعى بالالار لاگەرىن ۇيىمداستىرامىز. ءبىرىنشى كارانتين مەرزىمى اياقتالعاننان كەيىن ناۋقاس بالالارعا كومەك كورسەتۋ, قايىرىمدىلىق ساپارلارى مەن جانۋارلارمەن تانىستىرۋ ءۇردىسىن قولعا الدىق, – دەيدى «زولوتوي فازان» جشس باسشىسى.
بۇدان بولەك, كەلۋشىلەردى قابىلدايتىن بارلىق وبەكتىلەردە سانيتارلىق-ەپيدەميالىق نورمالار نەگىزىندەگى تالاپتار قاداعالانىپ وتىرادى. قوناقتارعا قاتاڭ تۇردە بەتپەردەلەر, انتيسەپتيكتەردى قولدانۋ مىندەتتەلگەن. دەمالىس ورنىندا ءجيى زالالسىزداندىرۋ جۇمىستارى جۇرگىزىلەدى.
