كوكشەتاۋدا كولىك جانە كوممۋنيكاتسيا ۆيتسە-ءمينيسترى ازات بەكتۇروۆتىڭ قاتىسۋىمەن قۇرىلىسى تۇگەل قايتا جاڭعىرتىلعان اۋەجاي كەشەنىنىڭ اشىلۋ سالتاناتى وتكىزىلدى.
كوكشەتاۋدا كولىك جانە كوممۋنيكاتسيا ۆيتسە-ءمينيسترى ازات بەكتۇروۆتىڭ قاتىسۋىمەن قۇرىلىسى تۇگەل قايتا جاڭعىرتىلعان اۋەجاي كەشەنىنىڭ اشىلۋ سالتاناتى وتكىزىلدى.
مەملەكەت باسشىسى نۇرسۇلتان نازارباەۆتىڭ تاپسىرماسىمەن جۇزەگە اسىرىلعان جوبا 2010 جىلى قولعا الىنىپ, ەكپىندى قۇرىلىس ورنىندا 8,3 ميلليارد تەڭگە قارجى يگەرىلدى. وسىنىڭ ناتيجەسىندە ۇشۋ-قونۋ جولاعى 2850 مەترگە ۇلعايتىلىپ, جولاۋشىلار تەرمينالى ساعاتىنا 200 ادامدى قامتيتىن قۋاتقا يە بولدى. تەرمينال ەكى تەلەسكوپيالىق تراپتان تۇراتىن ۇشاققا وتىرعىزۋ گالەرەياسىمەن, كەز كەلگەن اۋقىمداعى جۇك اۆتوماتتى تۇردە تەكسەرىستەن وتكىزىلىپ, فيتو-زوو-سانيتارلىق باقىلاۋ جۇيەسىمەن قامتاماسىز ەتىلگەن. مۇندا جولاۋشىلارعا قاجەتتى قولايلىلىقتاردىڭ ءبارى قاراستىرىلىپتى. اەروۆوكزالدا بەس بيلەت كاسساسى, اقپاراتتىق جانە حابارلاۋ قىزمەتى, VIP جانە CIP زالدارى جۇمىس ىستەيدى. اۋەجايدىڭ جۇك ينتەرەسكوپتارى مەن ترانسپورتەرلەرى, تەحنيكالىق باعىتتاعى قۇرىلعىلارى, جانارماي بلوگى, زەرتحانالىق اسپاپتار شەتەلدىڭ وزىق فيرمالارىنان جەتكىزىلىپ, تولىق قۋاتىندا جۇمىس ىستەپ تۇر.
كوكشەتاۋداعى زاماناۋي اۋەجاي كەشەنىنىڭ ىسكە قوسىلۋى استانالىق وبلىس تۇرعىندارى ءۇشىن عانا ەمەس, بۇكىل ەلىمىز ءۇشىن ەلەۋلى وقيعا سانالادى, دەدى كولىك جانە كوممۋنيكاتسيا ۆيتسە-ءمينيسترى ازات بەكتۇروۆ. بارشا قاۋىمدى پرەزيدەنتتىك ءىرى جوبانىڭ تابىستى جۇزەگە اسىرىلۋىمەن قۇتتىقتايمىن. قازاقستان ۇكىمەتىنىڭ جۋىرداعى قاۋلىسىمەن وسىناۋ ايرىقشا ماڭىزدى نىسانعا حالىقارالىق مارتەبە بەرىلدى. بۇل حالىقارالىق اۋەجاي قازاقستان رەسپۋبليكاسىنىڭ ماڭىزدى كولىك ينفراقۇرىلىمى سانالادى دەپ ايتا الامىز. سونداي-اق, زامانالىق تالاپتاردى تولىق قامتيتىن نىسان اقمولا وبلىسىنىڭ دامۋىنا, كۋرورتتى ءوڭىردىڭ كوركەيۋىنە قالتقىسىز قىزمەت ەتەدى دەپ سەنەمىز.
باقبەرگەن امالبەك,
«ەگەمەن قازاقستان».
كوكشەتاۋ.
