ددۇ باسشىسى جەنەۆادا وتكەن ءباسپاسوز ءماسليحاتىندا قاڭتار ايىنىڭ سوڭىندا قۇرىلعان سەرىكتەستىك پلاتفورماسى ەلدەرگە قارجىلىق پروبلەمالاردى, سونداي-اق تاجىريبەلى مەديتسينا كادرلارىنا تاپشىلىقتى جانە قاجەتتى زاتتاردىڭ بولماۋىنا بايلانىستى قيىندىقتاردى جەڭۋگە كومەكتەسىپ جاتقانىن ەسكە سالدى.
"بۇل رەتتە, مەملەكەتتەر باسشىلارى ەڭ الدىمەن, ءوز ازاماتتارىن قورعاعىسى كەلەدى. الايدا, پاندەمياعا قارسى ءىس-قيمىل شارالارى ۇجىمدىق سيپاتتا بولۋى ءتيىس. بۇل قايىرىمدىلىق تۋرالى ماسەلە ەمەس. ساباق بولارلىق تاجىريبەدەن تۇسىنگەنىمىزدەي, پاندەميانى توقتاتۋدىڭ جانە ەكونوميكالىق دامۋدى قالپىنا كەلتىرۋدىڭ ەڭ قىسقا جولى – بۇل جەكەلەگەن ەلدەردىڭ بارلىق تۇرعىنىن ەمەس, تاۋەكەلى جوعارى توپتاردى مۇمكىندىگىنشە جەدەل قورعاۋ", – دەپ اتاپ ءوتتى ددۇ باس ديرەكتورى.
ونىڭ ايتۋىنشا, بۇل ءتاسىل بارلىق مەملەكەتتىڭ مۇددەسىنە جاۋاپ بەرەدى. سەبەبى ءبىر عانا ادام قورعاۋدان تىس قالسا, ەشكىم ءوزىن قاۋىپسىز سەزىنە المايدى. تەدروس گەبرەيەسۋستىڭ سوزىنشە, بىرلەسىپ جۇمىس ىستەي وتىرىپ, ءبىز «العى شەپتەگىلەردىڭ» بارلىعىن قورعانىس قۇرالدارىمەن, ال ەمدەۋدى قاجەت ەتەتىندەردى دەكسامەتازون سياقتى ءتيىمدى پرەپاراتتارمەن قامتاماسىز ەتە الامىز.
سونداي-اق دسۇ باسشىسى دياگنوستيكانىڭ جاڭا قۇرالدارىن, ءدارى-دارمەكتەر مەن ۆاكتسينالاردى ازىرلەۋ ءجۇرىپ جاتقان قازىرگى كەزدە وتكەن قاتەلىكتەردى قايتالاماي, "ۆاكتسينالىق ۇلتشىلدىقتان" اۋلاق بولۋعا شاقىردى. دسۇ باسشىسى ءمالىم ەتكەندەي, ادىلەتتىلىك جانە تەڭقۇقىلىق قاعيداتتارىن نەگىزگە الا وتىرىپ ۆاكتسينالاردى ۇلەستىرۋ جوسپارى ەكى كەزەڭنەن تۇرادى.
ءبىرىنشى كەزەڭدە, ۆيرۋستىڭ تارالۋىنىڭ جالپى تاۋەكەلىن تومەندەتۋ ءۇشىن ۆاكتسينا ونى ازىرلەۋ بويىنشا جاھاندىق مەحانيزمگە قاتىسىپ جاتقان بارلىق مەملەكەتكە تەڭ كولەمدە جانە ءبىر مەزگىلدە جەتكىزىلەدى.
ەكىنشى كەزەڭدە قاۋىپ-قاتەر مەن وسالدىق اۋقىمى نازارعا الىناتىن بولادى. بۇل جەردە ماسەلە, ەڭ الدىمەن, مەديتسينا قىزمەتكەرلەرى مەن الەۋمەتتىك قىزمەتشىلەر, سونداي-اق قارت جانە سوزىلمالى اۋرۋلارى بار ادامدار تۋرالى بولىپ وتىر.
"ەگەر ءبىز تاۋەكەل توبىنداعى ادامداردى ءبىر مەزگىلدە قورعاي الماساق, دەنساۋلىق ساقتاۋ جۇيەلەرىن جىلدام تۇراقتاندىرا المايمىز جانە جاھاندىق ەكونوميكانى قالپىنا كەلتىرۋ مۇمكىن بولمايدى", - دەدى ول.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ءۇشىن Telegram جەلىسىندە بىزگە جازىلىڭىز.
