سەمەيدەگى ۆەتەرينارلىق مەكەمەلەرگە قالا ماڭىنداعى 12 اۋىلدىق وكرۋگكە قىزمەت كورسەتۋ ءۇشىن «نيۆا» ماركالى جاڭا اۆتوكولىكتەر تابىستالدى. قالانىڭ ورتالىق الاڭىندا وتكەن سالتاناتتى راسىمگە قاتىسقان «سەمەي قالالىق ۆەتەريناريا جانە فيتوسانيتاريا قىزمەتى» كمك ديرەكتورى امانگەلدى مۇسامباەۆتىڭ ايتۋىنشا, 2012 جىلدان باستاپ ۆەتەرينارلىق قىزمەت سالاسىن قازاقستان جوعارى دارەجەگە كوتەرىپ, دامىتۋ ۇستىندە. سوعان وراي رەسپۋبليكالىق بيۋدجەتتەن قارجى ءبولىنىپ, 12 اۆتوموبيل ساتىپ الىنعان. كولىكتەردىڭ ءىشى ارنايى جاراقتاندىرىلعان. مال دارىگەرلەرى ءۇشىن تەرموجاشىكتەر بار. وندا باكتەريالىق ماتەريالدار مەن ارنايى حيرۋرگيالىق قۇرالدار ساقتالادى. ءبىر كولىكتىڭ قۇنى 1 ملن. 786 مىڭ تەڭگە تۇرادى. بىرەۋى كۋرچاتوۆ قالاسىنا ارنالسا, قالعاندارى ابىرالى, العاباس, قاراولەڭ, زنامەنكا, نوۆو-باجەنوۆو, پريرەچنىي, يرتىشسكي, وزيوركا, اقبۇلاق, جيەنالى, ەرتىس جانە جازىق اۋىلدىق وكرۋگتەرىنە قىزمەت ەتۋگە جىبەرىلەدى. ۆەتەرينارلىق قىزمەتتى جاقسارتۋ ءۇشىن قالالىق ءماسليحاتتىڭ شەشىمىمەن 10,5 ملن. تەڭگە بيۋدجەتتەن بولىنگەن. ەندى ول اقشاعا اۋىلداردا ۆەتبەكەتتەر اشىلىپ, ولار قۇرال-جابدىقتارمەن قامتاماسىز ەتىلەتىن بولماق.
«ەگەمەن-اقپارات».
