مادەنيەت جانە اقپارات مينيسترلىگى جىل سايىن ءتۇرلى فەستيۆالدەر مەن بايقاۋلار ۇيىمداستىرادى. ساحنالاردا سالتانات قۇرىپ جاتاتىن سان الۋان ونەر جانرلارىن قامتيتىن وسىنداي بايقاۋلاردىڭ بىرەگەيى – باقىتجان بايقاداموۆ اتىنداعى رەسپۋبليكالىق كونكۋرسى مارەگە جەتتى.
مادەنيەت جانە اقپارات مينيسترلىگى جىل سايىن ءتۇرلى فەستيۆالدەر مەن بايقاۋلار ۇيىمداستىرادى. ساحنالاردا سالتانات قۇرىپ جاتاتىن سان الۋان ونەر جانرلارىن قامتيتىن وسىنداي بايقاۋلاردىڭ بىرەگەيى – باقىتجان بايقاداموۆ اتىنداعى رەسپۋبليكالىق كونكۋرسى مارەگە جەتتى.
الماتى قالاسىندا جامبىل اتىنداعى قازاق مەملەكەتتىك فيلارمونياسىندا وتكەن ەكى كۇندىك بايقاۋدا رەسپۋبليكامىزدىڭ ءار شالعايىنان ىرىكتەلگەن كاسىبي حور ۇجىمدارى مەن وقۋ ورىندارىنىڭ حور ۇجىمدارى شەبەرلىكتەرىن ساراپقا سالدى.
ءبىر جاعى ەلدەگى حور ونەرىنىڭ ورىنداۋشىلىق دەڭگەيىن شىڭداي وتىرىپ, كورنەكتى قازاق كومپوزيتورى, قازاقستانداعى كاسىبي مۋزىكا ونەرىنىڭ نەگىزىن قالاۋشىلاردىڭ ءبىرى, قازكسر ەڭبەك سىڭىرگەن ونەر قايراتكەرى ب.بايقاداموۆتىڭ شىعارماشىلىعىن كەڭىنەن ناسيحاتتايتىن بايقاۋدىڭ بيىلعى باستى جۇلدەسىنە وڭتۇستىك قازاقستان وبلىستىق وپەرا جانە بالەت تەاترى لايىق دەپ تابىلدى. ءبىرىنشى ورىن ءۇشىن سەگىز كاسىبي ۇجىم باسەكەگە ءتۇستى. قاتىسۋشىلار حورعا وڭدەلگەن قازاقتىڭ حالىق اندەرىن, شەتەل كومپوزيتورلارىنىڭ حورعا ارنالعان شىعارمالارى مەن ب.بايقاداموۆتىڭ حورعا ارنالعان شىعارمالارىن «ا كاپەللو» تۇرىندە ورىندادى.
سول سياقتى, ەكىنشى ورىننان تابىلعان يسا بايزاقوۆ اتىنداعى پاۆلودار وبلىستىق فيلارمونياسىنىڭ كامەرالىق حورى دا تىڭدارمانداردىڭ ىقىلاسىنا بولەندى. «وقۋ ورىندارىنىڭ حور ۇجىمدارى» كاتەگورياسى بويىنشا ءبىرىنشى ورىن قۇرمانعازى اتىنداعى قازاق ۇلتتىق كونسەرۆاتورياسىنىڭ ارالاس حورى جانە پ.چايكوۆسكي اتىنداعى الماتى مۋزىكالىق كوللەدجىنىڭ «الاتاۋ» جاستار حورىنا بەرىلدى. ورتا ءبىلىم بەرەتىن وقۋ ورىندارىنىڭ ىشىنەن ن.تىلەنديەۆ اتىنداعى كىشى ونەر اكادەمياسىنىڭ «ەركەم-اي» حور ۇجىمى توپ جاردى.
بازارعالي جامانباەۆ ءتوراعالىق ەتكەن قازىلار القاسىنىڭ قۇرامىندا ب.بايقاداموۆتىڭ قىزى بالدىرعان بايقاداموۆا دا بولدى.
سالتاناتتى ماراپاتتاۋ ءساتى كەزىندە ونەر ساڭلاعىنىڭ ءۇش بىردەي قىزى – الۋا, ايگۇل جانە بالدىرعان بايقاداموۆالار ساحناعا شىعىپ, بايقاۋدى ۇيىمداستىرۋشىلار مەن قاتىسۋشىلارعا شىنايى العىستارىن ءبىلدىردى.
– حور ۇجىمدارىنىڭ بايقاۋىن وتكىزۋ وڭاي ەمەس. مۇنداي ونەر ۇجىمدارىندا 20-دان باستاپ 80 انشىگە دەيىن بولادى. ال سوڭعى جىلدارى مادەنيەت جانە اقپارات مينيسترلىگى كاسىبي دەڭگەيى جوعارى, ۇيىمداستىرىلۋى كۇردەلى شارالارعا مۇرىندىق بولىپ, ۇرپاعىمىزدى ەستەتيكالىق جانە پاتريوتتىق رۋحتا تاربيەلەۋگە ولشەۋسىز ۇلەس قوسىپ كەلەدى. قازاق ونەرىنىڭ ورلەۋىنە ولشەۋسىز ەڭبەك سىڭىرگەن اكەمىزدىڭ اتىن وشىرمەگەن بايقاداموۆ بايقاۋى ءوز ۇزدىكتەرىن ءارى قاراي دا انىقتاپ, حور جانرىنىڭ داڭقىن اسىرا بەرسىن, – دەدى كومپوزيتوردىڭ ۇرپاقتارى.
ايناش ەسالي,
«ەگەمەن قازاقستان».
الماتى.
––––––––––––
سۋرەتتە: بالدىرعان, ايگۇل, الۋا بايقاداموۆالار.
