"قۇرمەتتى شىمكەنت قالاسىنىڭ تۇرعىندارى! بارشاڭىزدى ەلىمىزدەگى جاڭا مەرەكە — اباي كۇنىمەن شىن جۇرەكتەن قۇتتىقتايمىن!
پرەزيدەنت قاسىم-جومارت توقاەۆتىڭ شەشىمىمەن 10 تامىز – اباي كۇنى رەتىندە بەلگىلەنىپ, مەملەكەتتىك مەرەكەلەردىڭ تىزىمىنە ەنگىزىلدى. بۇل — دانىشپان اقىنعا دەگەن قۇرمەت, ونىڭ رۋحاني مۇراسىن زەرتتەپ, تانۋ مەن ناسيحاتتاۋ جولىنداعى ماڭىزدى قادام.
بۇگىندە كەز كەلگەن ۇلتتىڭ باسەكەگە قابىلەتتىلىگى مەن دامۋ دەڭگەيى ونىڭ الەم مادەنيەتى مەن وركەنيەتىنە قوسقان ۇلەسى جانە ادامزاتقا سىيلاعان ارداقتى تۇلعالارىمەن ولشەنەدى. مىنە, وسى تۇرعىدان العاندا ادامزات اقىل-ويىنىڭ اسقار شىڭىنا اينالعان اباي قازاق حالقىنىڭ ۇلتتىق ماقتانىشى.
مەملەكەت باسشىسى ءوزىنىڭ «اباي جانە ءححى عاسىرداعى قازاقستان» اتتى ماقالاسىندا «اباي مۇراسى – ءبىزدىڭ ۇلت بولىپ بىرلەسۋىمىزگە, ەل بولىپ دامۋىمىزعا جول اشاتىن قاستەرلى قۇندىلىق. جالپى, ءومىردىڭ قاي سالاسىندا دا ابايدىڭ اقىلىن الساق, ايتقانىن ىستەسەك, ەل رەتىندە ەڭسەلەنەمىز, مەملەكەت رەتىندە مۇراتقا جەتەمىز. اباي ارمانى – حالىق ارمانى. حالىق ارمانى مەن اماناتىن ورىنداۋ جولىندا ايانباعانىمىز ابزال. ابايدىڭ وسيەت-ونەگەسى ءححى عاسىرداعى جاڭا قازاقستاندى وسىنداي بيىكتەرگە جەتەلەيدى» دەپ اتاپ كورسەتتى.
راسىندا حاكىم ابايدىڭ ءوز زامانىندا ايتقان ويلارى مەن تۇجىرىمدارى ءالى كۇنگە جەكە ادام ءۇشىن دە, تۇتاس قوعام ءۇشىن دە ماڭىزىن جويماي, ومىرشەڭدىگىن ساقتاپ وتىر. ونىڭ ىنتىماق پەن بىرلىك جايلى ويلارى بۇگىنگى قوعامدا تۇراقتىلىق مەن تىنىشتىقتى ساقتاۋدا اسا ماڭىزدى ءرول اتقارادى. كەمەڭگەر تۇلعانىڭ ء«بىرىڭدى قازاق ءبىرىڭ دوس, كورمەسەڭ ءىستىڭ ءبارى بوس» دەگەن كەلەلى ويعا نەگىزدەلگەن تانىمى ۇلتتىق بىرلىگىمىزدىڭ ىرگەتاسى بولا الادى.
دانىشپان اقىن جاس ۇرپاقتىڭ ءبىلىم الىپ, عىلىمدى يگەرۋىنە ەرەكشە ءمان بەرگەن. مۇنى ونىڭ ولەڭدەرى مەن قارا سوزدەرىنەن انىق كورەمىز. ءبىلىم مەن عىلىم وركەنيەتكە باستار العىشارت ەكەندىگىن اباي سول زاماندا-اق جەتە تۇسىنگەن, جان-تانىمەن تەرەڭ ۇعىنعان.
ادامي كاپيتال دامۋدىڭ باستى ولشەمىنە اينالعان ءححى عاسىردا دا «بولماساڭ دا ۇقساپ باق, ءبىر عالىمدى كورسەڭىز» دەگەن وسيەتى ايرىقشا ماڭىزعا يە بولىپ وتىر. ويتكەنى, وسى ءبىر اۋىز ءسوزى ارقىلى اباي ءبىزدى ءومىر بويى ىزدەنىپ ءبىلىم الۋعا, كاسىبي بىلىكتىلىگىمىزدى ارتتىرۋعا ۇندەيدى.
ارامىزدا ءبىلىم مەن تۇلعالىق دامۋدى ومىرلىك كرەدوسىنا اينالدىرعان ازاماتتار كوبەيگەندە عانا ءبىزدىڭ قوعامنىڭ رۋحاني-ينتەللەكتۋالدىق قۋاتى كەمەلىنە كەلەدى.
اباي شىعارماشلىعىنداعى تاعى ءبىر وزەكتى تاقىرىپ — ادال ەڭبەك. ەرىنشەكتىك پەن بەكەر مال شاشپاقتىقتى, ياعني, «بەس دۇشپاننىڭ» قاتارىنا قوسقان اقىن ادال ەڭبەك ەتۋدى «بەس اسىل ءىستىڭ» بىرىنەن سانايدى. ياعني, اباي تانىمىندا ىرىس-نەسىبە مەن بەرەكەنىڭ باستاۋى عانا ەمەس, ءوزى جىرلاعان كەمەل ادام اتانۋدىڭ اينىماس شارتى.
ۇلى ويشىلدىڭ ەڭبەك ەتۋدى ادام ءومىرىنىڭ مانىنە بالايتىن وسى وسيەتىن بۇگىنگى قوعامدىق سانانىڭ نەگىزىنە اينالدىرا بىلسەك, ەلىمىزدىڭ باسەكەگە قابىلەتتىلىگى ارتىپ, قازاقستاننىڭ قارىشتاپ دامي تۇسەرى تالاسسىز.
قادىرمەندى قاۋىم!
تاۋەلسىزدىك جىلدارىندا قازاقستان ەكونوميكانىڭ دامىپ, حالقىمىزدىڭ الەۋمەتتىك جاعدايىنىڭ جاقسارۋىنا عانا ەمەس, رۋحاني-مادەني دامۋىنا دا ايرىقشا نازار اۋدارىپ كەلەدى. ەلىمىزدە ءار جىلدارى «مادەني مۇرا», «حالىق تاريح تولقىنىندا» سەكىلدى ماڭىزدى باعدارلامالار قابىلدانىپ, اۋقىمدى ىستەر اتقارىلدى.
ال, ەلباسى نۇرسۇلتان نازارباەۆتىڭ باستاماسىمەن قابىلدانعان «رۋحاني جاڭعىرۋ» باعدارلاماسى حالقىمىزدى جاڭا رۋحاني ورەگە, جاڭا ۇلتتىق ساپاعا كوتەرۋدى كوزدەگەن كەلەلى باستاما بولدى.
پرەزيدەنت قاسىم-جومارت توقاەۆتىڭ اباي قۇنانباي ۇلىنىڭ 175 جىلدىعىن كەڭ كولەمدە اتاپ ءوتۋ, اباي كۇنىن بەلگىلەۋ ارقىلى ونىڭ ادەبي مۇراسىن كەڭىنەن ناسيحاتتاۋ جونىندەگى باستاماسى — ءبىزدىڭ قوعامنىڭ رۋحاني جاڭعىرۋ, رۋحاني كەمەلدەنۋ جولىنداعى جاڭا كەزەڭى, ناقتى قادامى.
بۇكىل قوعام بولىپ, ەل بولىپ ابايعا ورالۋ ارقىلى, ابايدى تانۋ ارقىلى ءبىز ءوزىمىزدى تانيمىز. تۇلعا رەتىندە دە, ۇلت رەتىندە دە ءوزىمىزدى تانۋ – ءبىزدىڭ ۇلى ىستەرىمىزدىڭ, جارقىن بولاشاعىمىزدىڭ باستاۋى بولارىنا سەنەمىز.
ولاي بولسا, ءاربىرىمىز اباي شىعارماشىلىعىمەن تانىسىپ, ودان رۋحاني قۋات الۋعا, ونىڭ وسيەتتەرىن ومىرلىك ۇستانىمىزعا اينالدىرۋعا ۇمتىلايىق!", دەدى قالا اكىمى مۇرات ايتەنوۆ ءوز قۇتتىقتاۋىندا.
