بۇدان بۇرىن ابايدىڭ قاراسوزدەرىن تۇرعىندار جاياۋ سەرۋەندەيتىن ارباتتار مەن كوشەلەرگە ءىلىپ, ورناتىپ قويسا عوي, شىركىن, ءار قازاققا وي سالار ەدى, ءسويتىپ «جامان ادەتتەن جيرەندىرەر» ەدى دەگەن ويلار دا كەلەتىن. ءىس باسىندا جۇرگەن اقتوبەلىك ازاماتتار وسى ويىمىزدى وقىپ قويعانداي كورىندى.
ماسەلەنىڭ ءمانىسى مىنادا. اباي داڭعىلى اقتوبە قالاسىنىڭ قاق ورتاسىندا ورنالاسقان. ەنى كەڭ پىشىلگەن كەلىستى كوشەنىڭ ەكى جاق قاپتالى جەڭىل اۆتوكولىك قوزعالىسىنا لايىقتالسا, مۇنداعى ات شاپتىرىم ارباتتىڭ ورتاڭعى بولىگى جاياۋ جۇرگىنشىلەر سەرۋەندەپ دەم الاتىن ورىن رەتىندە جاساقتالعان. مۇنداعى گۇلزارلار مەن اسپانعا شاپشىعان سۋ بۇرقاقتار, مەملەكەتتىك راسىمدەرگە ارنالىپ تۇرعىزىلعان تۇعىر كوشە كەلبەتىن كورىكتەندىرە تۇسكەنى كامىل.
ال تاياۋدا اباي داڭعىلىنىڭ بويىنان ابايدىڭ قاراسوزدەرى ورنەكتەلىپ جازىلعان تاقتالار قاز-قاتار بوي تۇزەدى. بۇگىندە ۇلتتىڭ بويتۇمارىنا اينالعان داناگويدىڭ ءبىرىنشى قاراسوزى جازىلىپ, ورناتىلعان تۇستا ونىڭ ەسكەرتكىشى دە اشىلماق. بۇل ءراسىم تامىز ايىنىڭ سوڭعى اپتاسىنا بەلگىلەنگەن. ۇلى اقىننىڭ ءوزى ايتقانداي «سىلدىراپ وڭكەي كەلىسىم, تاس بۇلاقتىڭ سۋىنداي» دەگەنىمىز ءسىرا وسىنداي-اق بولاتىن شىعار.
اقتوبە
