ايماقتار • 07 تامىز، 2020

شىمكەنتتەگى 276 ورامدا ينفراقۇرىلىم ماسەلەسى شەشىمىن تابۋدا

28 رەت كورسەتىلدى

شىمكەنت قالاسى ساۋلە شاعىن اۋدانىنداعى 276 ورام شاھارعا سايرام اۋدانىنان قوسىلعان. بۇگىندە وندا 700-گە جۋىق تۇرعىن تۇرادى. 

الايدا، بۇل ماڭدا بيىلعا دەيىن اۋىز سۋ، جارىق، جول ماسەلەسى وزەكتى بولىپ كەلگەن. قالا اكىمى مۇرات ايتەنوۆ كوپ جىلدان بەرى كۇرمەۋىن تاپپاعان ينفراقۇرىلىم پروبلەماسىن ءجىتى باقىلاۋىنا الىپ، جاۋاپتى مەكەمەلەرگە تاپسىرما بەرگەن بولاتىن. ناتيجە كوپ كۇتتىرمەدى. قالانىڭ جولاۋشىلار كولىگى جانە اۆتوموبيل جولدارى باسقارماسى تاراپىنان بەس شاقىرىم جولعا شاعال تاس توسەلدى. ياعني، تۇرعىنداردىڭ جۇرەتىن جولىنا 100 پايىز تاس توسەلدى.
 
مۇنان بولەك 276 ورامدى ەلەكتر جۇيەسىمەن قامتاماسىز ەتۋ ماقساتىندا دەمەۋشىلەر تاراپىنان 25 باعانا، 2 شاقىرىم سىم جانە قۋاتتىلىعى 160 كۆت كوتەرەتىن ترانسفورماتور ورناتىلىپ، 150-گە جۋىق تۇرعىن ءۇي ساپالى ەلەكتر قۋاتىمەن قامتاماسىز ەتىلدى.
 
ال اۋماقتى ساپالى اۋىز سۋمەن قامتاماسىز ەتۋ ءۇشىن، دەمەۋشىلەر تاراپىنان 350 مەترگە جۋىق سۋ قۇبىرىنىڭ قازبا جۇمىستارى جۇرگىزىلىپ، اۋىز سۋ جۇيەسى تۇرعىنداردىڭ يگىلىگىنە پايدالانۋعا بەرىلىپ وتىر.
 
سونداي-اق، 276 ورامدى ينجەنەرلىك-ينفراقۇرىلىممەن تولىق قامتاماسىز ەتۋ ءۇشىن جوبالىق-سمەتالىق قۇجاتتاماسى دايىندالىپ جاتىر. جوسپار بويىنشا قۇجات جىل سوڭىندا دايىن بولۋى ءتيىس.
سوڭعى جاڭالىقتار

الىستان جەتكەن العىس

ايماقتار • بۇگىن، 14:10

ۇقساس جاڭالىقتار