الەم • 03 تامىز، 2020

ترامپتىڭ كەڭەسشىسى رەسەيگە قارسى سانكتسيالاردى الىپ تاستاۋدىڭ شارتتارىن اتادى

338 رەت كورسەتىلدى

اقش پرەزيدەنتىنىڭ ۇلتتىق قاۋىپسىزدىك جونىندەگى كەڭەسشىسى روبەرت و’برايەن The Washington Post-تاعى ماقالاسىندا ماسكەۋ مەن ۆاشينگتون اراسىنداعى دوستىق قارىم-قاتىناس ورناسا، بۇل ەكى ەل عانا ەمەس، بۇكىل الەم ءۇشىن دە ءتيىمدى بولاتىنىن مالىمدەدى. وسى اقپاراتتى ربك تاراتتى.

كەڭەسشىنىڭ سوزىنشە، رونالد رەيگان زامانىنان بەرى ەشبىر پرەزيدەنت ماسكەۋگە قاتىستى ءدال ترامپتاي باتىل شەشىمدەرگە بارا العان جوق.
"پرەزيدەنت ترامپ رەيگان سەكىلدى رەسەيمەن دوستاسۋدىڭ جولدارىن ىزدەۋدە. بۇل جول رەسەيدىڭ شەت ەلدەردەگى اگرەسسيادان تارتىنىپ، اقش پەن ەۋروپا ءۇشىن دوستىق ارىپتەستىككە كەلۋىن قاراستىرادى" دەپ مالىمدەدى و’برايەن.

مۇنداي جاعدايدا ەكى ەل اراسىنداعى ساۋدا وركەن جايىپ، ماسكەۋگە قارسى قولدانىلىپ وتىرعان سانكتسيالار قاجەتسىز بولىپ قالار ەدى دەپ ەسەپتەيدى ول.

ونىڭ سوزىنشە، ۆاشينگتون قازىرگى شەكتەۋ شارالارىن "رەسەيدىڭ قۇراما شتاتتار مەن ونىڭ وداقتاستارىنا قاتەر توندىرەتىن ارەكەتتەرىن ەسكەرە وتىرىپ" ەنگىزگەن. رەسەي ونداي ارەكەتتەردەن باس تارتىپ، دوستىق قارىم-قاتىناسقا كەلەتىن بولسا، ول شەكتەۋلەر قاجەت تە بولماس ەدى.

سوڭعى جاڭالىقتار

ۇقساس جاڭالىقتار