كومەك اياسىندا سەنات توراعاسى ماۋلەن اشىمباەۆ ەلوردامىزداعى «الەۋمەتتىك» دامحاناعا ارنايى بارىپ, مەكەمەنىڭ ۇجىمىمەن كەزدەستى. بۇل جەردە ەرەكشە قاجەتتىلىگى بار جانە الەۋمەتتىك قورعالماعان ساناتتاعى ازاماتتار جۇمىس ىستەيدى.
سوڭعى جىلدارى ەلىمىزدە «الەۋمەتتىك كاسىپكەرلىك» سالاسى جاڭاشا قارقىنمەن دامىپ كەلەدى. بەيرەسمي مالىمەتكە سۇيەنسەك, قازىرگى تاڭدا قازاقستاندا 200-گە جۋىق الەۋمەتتىك بيزنەس نىسانى حالىققا ءتۇرلى قىزمەت كورسەتەدى. الايدا بۇل سالا ازىرگە زاڭنامالىق تۇرعىدان رەتتەلمەگەن. ءوز سوزىندە ماۋلەن اشىمباەۆ الداعى ۋاقىتتا وسى باعىتتاعى جۇمىستار قولعا الىناتىنىن ايتتى.
– مەملەكەت باسشىسى جىل باسىندا الەۋمەتتىك كاسىپكەرلەرمەن ارنايى كەزدەسكەن بولاتىن. سول كەزدە ەمين اسكەروۆتىڭ جانە باسقا دا كاسىپكەرلەردىڭ بارلىق ۇسىنىستارىنا قولداۋ ءبىلدىردى. الداعى ۋاقىتتا ءبىز قازاقستاندا وسىنداي ءدامحانالار مەن كاسىپورىندار كوپتەپ اشىلۋى ءۇشىن كاسىپتىڭ بۇل ءتۇرىن زاڭنامالىق تۇرعىدان رەتتەۋگە قاجەتتى كومەك كورسەتەمىز. قازىر الەۋمەتتىك كاسىپكەرلەر ءوز كۇشتەرىمەن ەڭبەك ەتىپ ءجۇر. بىراق ولاردى قولداۋ ءۇشىن ءتيىستى زاڭدار قابىلداۋ كەرەك. ءبىز وسى باعىتتا دا جۇمىس ىستەيتىن بولامىز, – دەدى سەنات توراعاسى.
سونىمەن قاتار ول وسى كۇندەرى كوپتەگەن قازاقستاندىقتاردىڭ مۇقتاج جاندارعا بەلسەندى تۇردە قولداۋ كورسەتىپ جاتقانىنا نازار اۋداردى.
– قۇربان ايت قايىرىمدىلىق پەن مەيىرىمدىلىكتى دارىپتەيتىن مەيرام. سوندىقتان بۇل كۇندەرى ءبىر-بىرىمىزگە جاقسىلىق جاساۋدىڭ ماڭىزى زور. اسىرەسە بۇگىنگىدەي پاندەميا جاعدايىندا مۇقتاج جاندارعا قولداۋ كورسەتۋدىڭ جانە ولارعا كومەك قولىن سوزۋدىڭ ءمانى ەرەكشە. سوندىقتان قازىرگى تاڭدا ازاماتتارىمىزدىڭ ۇلتىنا, دىنىنە قاراماي, ءوزارا قايىرىمدىلىق جاساپ, كومەكتەسىپ جاتقانىن ايرىقشا اتاپ وتكەن ءجون. اسىرەسە ۆولونتەرلەر بەلسەندىلىك تانىتۋدا. بۇل قوعامنىڭ بىرتۇتاستىعىن كورسەتەدى, – دەدى ماۋلەن اشىمباەۆ.
سەنات توراعاسى ءدامحانا قىزمەتكەرلەرىن قۇربان ايت مەرەكەسىمەن قۇتتىقتاپ, ولاردىڭ ارقايسىسىنا قۇرباندىقتىڭ ەتى سالىنعان ازىق-ت ۇلىك قورجىنى مەن ەستەلىك سىيلىقتار تارتۋ ەتتى. سونداي-اق سەنات توراعاسى الەۋمەتتىك ءدامحانانىڭ باسشىسى ەمين اسكەروۆكە ەرەكشە قاجەتتىلىگى بار جانداردى جۇمىسپەن قامتىعانى ءۇشىن العىس ءبىلدىردى.
– جالپى, مۇنداي قولداۋعا مۇمكىندىگى شەكتەۋلى جاندار ەرەكشە مۇقتاج ەكەنى بەلگىلى. الايدا ءبىز ولارعا تەك كومەك بەرىپ قانا قويماي, قوعامعا بەيىمدەلۋىنە جاعداي جاساۋىمىز كەرەك. ولاردىڭ جۇمىسقا قابىلەتتىلەرى ادال ەڭبەكپەن اقشا تابۋىنا, ءبىر-بىرىمەن ارالاسۋىنا, ورتاعا ۇيرەنىپ, وتباسىن قۇرۋعا جانە ءوزىن ءوزى دامىتۋعا مۇمكىندىك تۋعىزۋى قاجەت. وسى تۇرعىدان كەلگەندە ەمين اسكەروۆ ۇلكەن جۇمىس اتقارىپ وتىر, – دەدى سەنات توراعاسى.
ايتا كەتەيىك, اتالعان ءدامحانا كارانتين كەزىندە دە جۇمىسىن جالعاستىرىپ جاتىر. تاپسىرىستى تۇتىنۋشىلارعا جەتكىزىپ بەرۋ ءىسى ۇيىمداستىرىلعان جانە كەلگەن قوناقتارعا تەك اشىق اسپان استىندا قىزمەت كورسەتىلەدى. بارلىق ساقتىق شارالارى مەن سانيتارلىق تالاپتار قاتاڭ ساقتالعانىن دا اتاپ وتكەن ءجون.
ەمين اسكەروۆ بىرنەشە الەۋمەتتىك كاسىپورىن اشىپ, ەلىمىزدە وسى باعىتتىڭ جاندانۋىنا ۇلكەن ۇلەس قوسىپ كەلە جاتقان كاسىپكەرلەردىڭ ءبىرى. ول اشقان كاسىپورىنداردا مۇمكىندىگى شەكتەۋلى جاندار, ءۇيسىز جۇرگەندەر, بۇرىن سوتتالعاندار جانە ءتۇرلى تاۋەلدىلىككە شالدىققاندار جۇمىس ىستەيدى. ولار ءوز قابىلەتتەرىن تىگىن تسەحىندا, جيھاز فابريكاسىندا, اۆتوكولىك جۋ ورنىندا جانە ءدامحانادا پايداعا جاراتۋدا.
ايت كۇندەرى سەناتورلار باسقا دا ءتۇرلى قايىرىمدىلىق شارالارىنا بەلسەنە قاتىسۋدا. اتاپ ايتقاندا, سەنات تاراپىنان قازاقستان مۇسىلماندارى ءدىني باسقارماسى مەن «زەكەت» قورى ۇيىمداستىرعان قۇرباندىق شالۋ ءراسىمىن ونلاين-فورماتتا وتكىزۋ باستاماسىنا قولداۋ كورسەتىلدى. سوعان بايلانىستى پالاتانىڭ بىرقاتار دەپۋتاتى مەن اپپارات قىزمەتكەرلەرى qurban2020.kz سايتىنىڭ قىزمەتىنە جۇگىنىپ, قۇرباندىق شالۋعا نيەت ەتتى.
بيىل كوپ سالاعا پاندەميانىڭ كەرى اسەرى تيگەنى بەلگىلى. سونىڭ ىشىندە ءدىني مەيرامداردى اتاپ ءوتۋ فورماتى دا وزگەرىسكە ۇشىراپ جاتىر. الايدا بۇل كەلەڭسىزدىك ازاماتتاردىڭ قايىرىمدىلىقپەن اينالىسۋىنا ەشقانداي توسقاۋىل بولا المايدى. سوندىقتان بيىل دا جىلداعى ءداستۇر بويىنشا قۇرباندىقتىڭ ەتى مۇقتاج جاندارعا تاراتىلۋدا.
سەناتورلاردىڭ باستاماسىمەن ەتتىڭ ءبىر بولىگى ىندەتپەن كۇرەسىپ, حالىقتىڭ دەنساۋلىعى ءۇشىن ايانباي ەڭبەك ەتىپ جۇرگەن مەديتسينالىق قىزمەتكەرلەردىڭ وتباسىلارىنا دا بەرىلەتىن بولدى. قازىرگىدەي كۇردەلى كەزەڭدە ولاردى قولداۋ ءۇشىن سەنات اپپاراتىنىڭ قىزمەتكەرلەرى ەلوردالىق دارىگەرلەر سماعۇلوۆتار وتباسىنا بارىپ, ايتپەن قۇتتىقتادى جانە بالالارىنا جاڭا وقۋ جىلىندا قاشىقتان وقۋعا قاجەتتى كومپيۋتەر سىيلادى.
