بۇل قازىردىڭ وزىندە تۋريستىك تابىستىڭ 320 ميلليارد دوللارعا تومەندەۋىنە اكەلىپ سوقتى, ۇيىمنىڭ پىكىرىنشە, بۇل 2009 جىلعى الەمدىك ەكونوميكالىق داعدارىسقا قاراعاندا ءۇش ەسە كوپ. سونىمەن بىرگە, مامىر ايىندا ساپارلار سانى 2019 جىلدىڭ ءدال وسى ايىمەن سالىستىرعاندا 98% -عا ازايدى. ورونوۆيرۋس تۇتقيىلدان سوققى بەرگەن العاشقى سالا تۋريزم يندۋسترياسى.
قاۋىپتى دەرتپەن الەمدىك كۇرەس ىشكى-سىرتقى شەكارالاردىڭ جابىلۋىنا الىپ كەلدى: ترانسپورت تاسىمالى, قىزمەت كورسەتۋ سالاسى ءوز جۇمىسىن ۋاقىتشا توقتاتىپ, مەگا جوبالار مەن جوعارى دەڭگەيدەگى ءىس-شارالار كەيىنگە قالدى. بۇل شەكتەۋلەر بىردەن تۋريستىك سالانىڭ جۇمىسىنا كەرى اسەر ەتتى. پاندەميا جاريا ەتىلگەن تۇستا حالىقارالىق ىسكەرلىك تۋريزم اسسوتسياتسياسى (GBTA) كوروناۆيرۋستىڭ ىسكەرلىك تۋريزم يندۋسترياسىنا اسەرى تۋرالى زەرتتەۋ جۇرگىزدى. ونىڭ جۇمىسىنا 1095 كورپوراتسيا وكىلدەرى مەن قاۋىمداستىق مۇشەلەرى قاتىسقان. ماسەلەن, 290 مىڭنان استام ادامدى جۇمىسپەن قامتىپ وتىرعان الەمدەگى ءىرى ءوندىرۋشى كومپانيا Nestle, 800 مىڭ قىزمەتكەرى بار Amazon ينتەرنەت-دۇكەنى, L'oreal, Unilever, Ford سەكىلدى باسقا دا تانىمال ۇيىمدار كورپوراتسيا قىزمەتكەرلەرىنە بيزنەس ساپار جاساۋعا تىيىم سالعان.
"سوڭعى مالىمەتتەر ءتۋريزمدى مۇمكىندىگىنشە تەزىرەك قالپىنا كەلتىرۋدىڭ قانشالىقتى ماڭىزدى ەكەنىن كورسەتەدى. حالىقارالىق ءتۋريزمنىڭ كۇرت قۇلدىراۋى كوپتەگەن ءۇي شارۋاشىلىقتارىن, اسىرەسە دامۋشى ەلدەردەگى ءومىر ءسۇرۋ قاۋپىنە دۋشار ەتەدى. الەمنىڭ كەز-كەلگەن ايماعىنداعى ۇكىمەتتەردىڭ ەكىجاقتى جاۋاپكەرشىلىگى بار: ولار بيزنەس پەن جۇمىس ورىندارىن قورعاۋ كەزىندە ءوز ازاماتتارىنىڭ دەنساۋلىعىن ساقتاۋ كەرەك", دەدى يۋنۆتو باس حاتشىسى زۋراب پولوليكاشۆيلي
سونىمەن بىرگە, UWNTO 1 شىلدەدە ەو شەكارالارىنىڭ اشىلۋىنا بايلانىستى سالادا, اسىرەسە سولتۇستىك جارتى شاردا جاندانۋدىڭ بارىن اتاپ ءوتتى.
"بىراق تۋريزم كەيبىر ەلدەردە باياۋ قالپىنا كەلە باستاعان كەزدە, سالاعا دەگەن سەنىم يندەكسى تومەندەدى. حالىقارالىق ساراپشىلاردىڭ كوپشىلىگى ءتۋريزمنىڭ 2021 جىلدىڭ ەكىنشى جارتىسىنا دەيىن قالپىنا كەلۋىن كۇتپەيدى", دەيدى ۇيىم.
. ونىڭ پىكىرىنشە, قالپىنا كەلتىرۋگە كوپتەگەن ەلدەردە ءالى دە جابىق شەكارالار كەدەرگى كەلتىرۋدە, سونىمەن قاتار نەگىزگى «تۋريستىك جابدىقتاۋ نارىقتارى» - اقش پەن قىتاي وسى ۋاقىتقا دەيىن توقتاپ تۇردى. كوروناۆيرۋستىڭ ەكىنشى تولقىنىنان قورقۋ, سونداي-اق جاڭا شەكتەۋلەر مەن توسقاۋىلدار سالانىڭ قىزمەتتەرىن تۇتىنۋشىلارعا سەنىمدىلىكتى ارتتىرمايدى.
ءتۋريزمدى ەكونوميكانىڭ تابىسى مول سالاسىنا اينالدىرۋ ءۇشىن كەشەندى جانە مازمۇندى جۇمىس جۇرگىزۋ قاجەتىگى, شەتەل تاجىريبەسىنەن ۇلگى الۋعا بولادى. كورمە-پرەزەنتاتسيا, فورۋمدار مەن بۋكلەتتەر ماسەلەنى شەشپەيتىنىن وسىعان دەيىن ساراپشىلار تالاي رەت ايتقان. الەمدىك تۋربيزنەس نارىعىنداعى بۇل جاعداي قازاقستاندى دا اينالىپ وتكەن جوق. ەلدە توتەنشە جاعداي جاريا ەتىلگەن مەزەتتە قازاقستاننىڭ تۋريستىك قاۋىمداستىعى ۇكىمەتتەن كومەك سۇراۋعا ءماجبۇر بولعانى بەلگىلى. سەبەبى پاندەمياعا دەيىنگى دەرەگىنە سۇيەنسەك, بۇل سالادا بۇگىندە 80 مىڭعا جۋىق ادام جۇمىس ىستەيدى. قازاقستان ۇكىمەتى تۋروپەراتورلارعا دا, تۋريستەرگە دە قولداۋ بىلدىرۋگە مۇددەلى ەكەندىگىن ايتتى. پاندەميا باستالعان كەزدە شەتتە جۇرگەن قازاقستاندىق تۋريستەر ەلگە قايتارىلدى. توتەنشە جاعدايعا بايلانىستى سالىق جانە الەۋمەتتىك تولەمدەردەن بوساتىلاتىن سۋبەكتىلەر قاتارىندا قوناق ءۇي, حوستەل جانە تۋريستىك قىزمەت نىساندارى 2020 جىلدىڭ 1 قازانىنا دەيىن ەڭبەكاقى تولەۋ قورىنان ۇستالاتىن سالىقتان بوساتىلدى.
قازاقستان تۋريستەر قاۋىمداستىعىنىڭ باسشىسى راشيدا شايكەنوۆا قازاقستانداعى ءتۋريزمنىڭ ينديكاتورى – الماتى مەن كوكشەتاۋ ەكەنىن ايتادى. سەبەبى بۋراباي مەن كوكشەتاۋعا استانانىڭ ىقپالى كۇشتى. بۋراباي مەن شىمبۇلاقتاعى بەس جۇلدىزدى قوناق ۇيلەردىڭ باسىم كوپشىلىگى جاز مەزگىلىندە بوس تۇرادى. جىل بويى ادام اياعى ۇزىلمەسە, باعا دا تومەندەر ەدى.
"ول ءۇشىن ورتالىق, سولتۇستىك, وڭتۇستىك, شىعىس جانە باتىس باعىتىن قامتيتىن تۋريستىك جوبالاردى ۇيىمداستىرۋ كەرەك", دەيدى راشيدا شايكەنوۆا.
سونداي-اق راشيدا شايكەنوۆا نارىق كۇنى ەرتەڭ قالپىنا كەلەدى دەپ بوسقا ۇمىتتەنبەيتىنىن, بىراق سالا داعدارىستى ەڭسەرۋگە بارىنشا تىرىسىپ جاتقانىن ايتادى.
"داعدارىستىڭ العاشقى بەلگىسى قىتايدىڭ ۋحان قالاسىنان كوروناۆيرۋس شىققانى تۋرالى اقپارات تاراعان 2019 جىلعى جەلتوقساننىڭ سوڭىندا, قىتايدان كەلەتىن تۋريستەردىڭ ازايىپ كەتتى. قازىر پاندەميانىڭ تۋريزم سالاسىنا كەلتىرگەن شىعىنىن ەسەپتەۋ قيىن. بۇل سۇراقتىڭ جاۋابى ۋاقىت وتە بەلگىلى بولادى. بىراق قازىردىڭ وزىندە تۋريستىك قىزمەت سالاسىنداعى شاعىن جانە ورتا بيزنەستىڭ قانداي قيىن جاعدايدا وتىرعانىن بىلەمىز", دەيدى راشيدا شايكەنوۆا.
