تۇركىستان وبلىسىنىڭ پوليتسەيلەرى كارانتين تالاپتارىنىڭ ساقتالىپ, ونىڭ ورىندالۋى بارىسى بويىنشا قارقىندى جۇمىس جۇرگىزۋدە. وسىنداي كەزەكتى جۇمىس كۇنىندە سايرام اپب-نە مانكەنت اۋىلىنداعى تۇرعىننىڭ ءبىرى ءوز ۇيىندە 50-دەن استام ازاماتتاردى جيناپ, كەلىن ءتۇسىرۋ تويىن وتكىزىپ جاتقانى تۋرالى حابارلاما كەلىپ ءتۇستى.
اقپارات الىسىمەن اتالعان مەكەنجايعا اۋداندىق پوليتسەيلەر مەن اكىمدىك قىزمەتكەرلەرىنەن قۇرىلعان موبيلدىك توپ تەز ارادا جەتىپ, تەكسەرۋ جۇمىستارىن جۇرگىزدى. ناتيجەسىندە, پوليتسەيلەر ىعى-جىعى ادام جينالعان تويدى توقتاتتى. كارانتين تالاپتارىن ساقتاماي, ورەسكەل قۇقىق بۇزعانى ءۇشىن توي يەسىنە قر اقبتك-ءنىڭ 425-بابىنا سايكەس "حالىقتىڭ سانيتارلىق-ەپيدەميالىق سالاۋاتتىلىعى سالاسىنداعى زاڭناما تالاپتارىنىڭ, سونداي-اق گيگيەنالىق نورماتيۆتەردىڭ بۇزىلۋى" حاتتاما تولتىرىلدى. جيناقتالعان اقپاراتتار شەشىم قابىلداۋ ءۇشىن ءتيىستى ورگانعا جىبەرىلدى. اۋداندا وسىعان ۇقساس تاعى ەكى جايت تىركەلدى.
ونىڭ بىرىندە جەرگىلىكتى تۇرعىن ءوز ۇيىنە 20-دان استام ادام جيناپ, كەلىن تۇسىرگەن. ال كەلەسى تۇرعىن 15-تەن استام ادام جيناپ, قىز ۇزاتۋ تويىن وتكىزگەن. بۇل ەكى جايتتا دا موبيلدىك توپ شۇعىل جەتىپ, ادامداردىڭ كوپتەپ شوعىرلانۋىنا جول بەرمەي, توي-جيىنداردى توقتاتقان. جيناقتالعان ءىس-قۇجاتتارى ءتيىستى شەشىم قابىلداۋ ءۇشىن دەنساۋلىق ساقتاۋ مينيسترلىگىنە قاراستى تۇركىستان وبلىسى بويىنشا تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنە جىبەرىلدى.
جالپى, اۋدان كولەمىندە جۇمىس جاساپ جاتقان موبيلدىك توپتار 80 كارانتين تالاپتارىن بۇزۋ جايتتارىن انىقتاپ, ولارعا قر اقبتك-ءنىڭ 425-بابى "حالىقتىڭ سانيتارلىق-ەپيدەميالىق سالاۋاتتىلىعى سالاسىنداعى زاڭناما تالاپتارىنىڭ, سونداي-اق گيگيەنالىق نورماتيۆتەردىڭ بۇزىلۋى" بويىنشا حاتتاما تولتىرعان. ونىڭ ىشىندە ءۇشجايت ۇيلەنۋ تويى مەن وتباسىلىق جيىنداردى ۇيىمداستىرۋ.
