COVID-19 يسپانيا ەكونوميكاسىنا ەلەۋلى ۇلەسىن قوساتىن شەتەلدىك تۋريزم سالاسىنا ويسىراتا سوققى بەردى. ناۋرىز ايىندا باستالىپ, 3 ايعا سوزىلعان شەكارانىڭ جابىلۋى, شىلدەدە پاندەميانىڭ قايتا ءورشۋى پيرينەي تۇبەگىنە كەلۋشى تۋريستەردىڭ سانىن مۇلدە ازايتقان. ونىڭ سالقىنى وتەلدەر مەن بارلاردىڭ جۇمىسىنا اسەر ەتىپ, ولار امالسىزدان باعانى كوتەرۋگە ءماجبۇر بولعان. 2019 جىلى 83,7 ملن تۋريست قابىلداعان جاعاجايلاردا ينە شانشار ورىن تابىلمايتىن يسپان جاعالاۋلارى بوس قالىپ وتىر.
مادريد پوليتەحنيكالىق ۋنيۆەرسيتەتىنىڭ پروفەسسورى روبەرتو سەنتەنو جانە مادريد الەۋمەتتىك زەرتتەۋلەر ورتالىعىنىڭ قىزمەتكەرى كلارا توررەس كرۋس پاندەميا زاردابىن شەككەن ەۋروپالىقتار شەتەلگە شىعۋعا, ونىڭ ۇستىنە شىلدەدە اۋرۋ قايتادان بۇرق ەتە قالعان يسپانياعا كەلۋگە قورقادى. ەل بيلىگىنىڭ ادامدار كوپ جينالعان جەردىڭ بارلىعىندا, ءتىپتى جاعاجايلاردا بەتتى تۇمشالاماسا 100 ەۋرو ايىپپۇل تولەتۋى تۋرالى شەشىم شىعارۋى دا قولايلى بولىپ تۇرعان جوق, دەيدى.
"Periodico" باسىلىمى ادەتتە تۋريستەر لەگىمەن قايناعان قازانداي بولىپ جاتاتىن بارسەلونا وتەلدەرىنىڭ نەبارى 20 پايىزى جۇمىس ىستەپ تۇرعانىن, ەلدەگى 300 000 بار, مەيرامحانا, ءدامحانالاردىڭ بۇگىندە 60 000 جابىلىپ, تامىز ايىندا تاعى 25 000 جوعارىداعى 60 مىڭنىڭ قاتارىن تولىقتىراتىنىن جازادى.
