الدىڭعى اقپاراتتاردا حابارلاعانىمىزداي, سوڭعى ۋاقىتتا قازاقستاندىقتاردىڭ اقمولا وبلىسىنداعى كوبەيتۇز كولىنە جاپپاي بارۋىنا بايلانىستى كول جاعالاۋىنىڭ تۇرمىستىق قوقىستارعا تولۋى, ونداعى تابيعي تۇزدى رۇقساتسىز الىپ كەتۋى, كەلۋشىلەردىڭ جەروشاق جاعۋى جانە ايماقتا ۋاقىتشا قۇرىلىستاردىڭ كوبەيۋى جيىلەگەن.
وسىعان وراي, ەكولوگيا مينيسترلىگى كولگە كەلۋشىلەرگە زاڭعا سايكەس ءتيىستى اكىمشىلىك جازا بار ەكەنىن ەسكەرتەدى. كولگە شومىلۋدىڭ بەلگىلەنگەن ءتارتىبىن, سانيتارلىق نورمانى جانە ەكولوگيالىق زاڭنامانى بۇزۋشىلار جازاعا تارتىلادى. ءتارتىپتى بۇزۋشىلارعا ايىپپۇل سالىنادى.
كوبەيتۇز كولى بىرەگەي ءارى ەرەكشە تابيعي كول (الەمدە مۇنداي 8 كول عانا بار). ول جىلىنا بىرنەشە رەت قىزعىلت تۇسكە بويالىپ وتىرادى. سۋدىڭ قىزعىلت رەڭگە بويالۋىنا نەگىزىنەن تۇزدى تەڭىزدەردى مەكەندەيتىن ءبىرجاسۋشالى دۋناليەللا سورتاڭدى سۋ بالدىرى اسەر ەتەدى دەپ سانالادى.
دەمەك, كولدىڭ تۇزدى بولۋىنىڭ ارقاسىندا بۇل بالدىرلار پايدا بولعان. تابيعاتتىڭ ەرەكشە قۇبىلىسىنا زالال كەلتىرۋ مەن كەيبىر ادامداردىڭ جاۋاپسىز ارەكەتى كولدىڭ سۋالۋىنا, ءتىپتى كەيىننەن جويىلۋىنا اكەلۋى مۇمكىن.
كول تەڭىز دەڭگەيىنەن 253 م بيىكتىكتە, اقمولا وبلىسى ەرەيمەنتاۋ اۋدانىنىڭ ولەڭتى اۋىلدىق وكرۋگىنىڭ اۋماعىندا ورنالاسقان. كولدىڭ اۋدانى - 690 گا, تەرەڭدىگى - 1,5 م.
ەكولوگيا مينيسترلىگىنىڭ وكىلدەرى قازاقستاندىقتاردى تابيعاتتى ايالاۋعا شاقىرادى! تەك ءبىزدىڭ بىرلەسكەن ءىس-قيمىلىمىز بەن ەكولوگيالىق سانا-سەزىمىمىز تابيعاتتىڭ بايلىعىن ساقتاۋعا كومەكتەسەدى!
ەكولوگيا مينيسترلىگى كوبەيتۇز كولىن قورعاۋ ءۇشىن قاتاڭ ءارى شۇعىل شارالار قابىلداۋعا نيەتتى. قابىلدانعان شارالار تۋرالى كەيىنىرەك حابارلانادى.
