قازاقستان • 18 شىلدە، 2020

جازۋشى، قوعام قايراتكەرى مىرزاگەلدى كەمەل دۇنيەدەن وزدى

226 رەت كورسەتىلدى

جازۋشى، قوعام قايراتكەرى مىرزاگەلدى كەمەل دۇنيەدەن وزدى. بۇل تۋرالى مادەنيەت جانە سپورت مينيسترلىگىنىڭ ءباسپاسوز قىزمەتى راستادى.

 

مىرزاگەلدى كەمەل 1949 جىلى 15 قاڭتاردا وڭتۇستىك قازاقستان وبلىسى، ماقتارال اۋدانىندا تۋعان.

1971 جىلى تاشكەنت يرريگاتسيا جانە اۋىل شارۋاشىلىعىن مەحانيكالاندىرۋ ينجەنەرلەرى ينستيتۋتىنىڭ اۋىل شارۋاشىلىعىن ەلەكترلەندىرۋ ماماندىعىن، 2000 جىلى م.ح.دۋلاتي اتىنداعى جامبىل ۋنيۆەرسيتەتىنىڭ قۇقىقتانۋ فاكۋلتەتىنىڭ زاڭگەر ماماندىعىن تامامداعان.

ەڭبەك جولىن 1971 جىلى ماقتارال اۋدانىنداعى "وكتيابردىڭ 30 جىلدىعى" سوۆحوزىندا اعا ينجەنەر بولىپ باستاعان. 1975–1992 جج. ماقتارال اۋدانىندا پارتيا، كەڭەس قىزمەتىندە بولدى. 1992–1994 جج. كەڭشار ديرەكتورى، 1994–1995 جج. قازاقستان رەسپۋبليكاسى جوعارعى كەڭەسىنىڭ دەپۋتاتى، 1995 جىلى قازاقستان رەسپۋبليكاسى مينيسترلەر كابينەتى جانىنداعى شەتەل ينۆەستيتسياسى جونىندەگى كوميتەتىنىڭ سەكتور مەڭگەرۋشىسى بولىپ قىزمەت اتقارعان. 1995–2004 جج. ءبىرىنشى، ەكىنشى شاقىرىلعان قازاقستان رەسپۋبليكاسى پارلامەنتىنىڭ دەپۋتاتى. رۋحانيات سالاسىندا 10 كىتاپ شىعارعان، ولاردىڭ ىشىندە ءوزى جازعان ىزگىلىككە، يماندىلىققا، ءبىلىم-بىلىككە، اقىل-پاراساتقا ۇندەيتىن تانىمدىق-كوسەمسوزدىك ەڭبەكتەرگە قوسا، قىتاي اقىلماندارى لاو تسزى مەن كونفۋتسيدى، يسپان ءپالساپاشىسى بالتاسار گراسيان، ەجەلگى ءۇرىم جانە گرەك اقىلماندارىنىڭ افوريزمدەرىن، قازىرگى ىلىمدەردى ناسيحاتتاۋشى لۋيزا حەي، بۇگىنگى كۇننىڭ ەڭ اتاقتى جازۋشىلارىنىڭ ءبىرى پاۋلو كوەلولاردىڭ تاڭداۋلى ەڭبەكتەرىن قازاق تىلىنە تارجىمالاعان. "دۇنيە" جانە "ەكولوگيا ي ۋستويچيۆوە رازۆيتيە" جۋرنالدارىن شىعاردى. "ابزالدىق الىپپەسى"، "وزىمە ساباق" سياقتى كىتاپتارى وقىرمان قاۋىمنان جوعارى باعاسىن العان. 2004 جىلى ەكونوميكا عىلىمىنىڭ دوكتورى عىلىمي اتاعىن العان. قازاقستان رەسپۋبليكاسىنىڭ پرەزيدەنتى جانىنداعى مەملەكەتتىك باسقارۋ اكادەمياسىنىڭ پروفەسسورى، 14 مونوگرافيانىڭ، 100-گە جۋىق عىلىمي ماقالالاردىڭ اۆتورى.

سوڭعى جاڭالىقتار

دوللار ارزاندادى

قارجى • كەشە

ۇقساس جاڭالىقتار