تانىم • 15 شىلدە، 2020

جۇرەكتىڭ باتىرلىعى

24 رەت كورسەتىلدى

ەرتەڭگى كۇننىڭ بۇگىنگىدەن جارقىن بولۋىنا ىقپال ەتىپ، ادامزات قوعامىن العا اپاراتىن قۇدىرەتتى كۇش – بىلىمگە عانا ءتان. دەمەك، قاي ەلدىڭ دە وركەن­دە­ۋى، وركەنيەتتى دۇنيەدە وزىندىك ورىن الۋى – ءبىلىم سا­لا­سىنىڭ دامۋ باعىتىنا تىكەلەي بايلانىستى.

ەلباسىمىز نۇرسۇلتان ءابىش ۇلى نازارباەۆ «ەلىمىزدىڭ ەرتەڭى بۇگىنگى جاس ۇرپاقتىڭ قولىندا»، دەگەن بولاتىن. ەلىمىز وركەنيەتتى ەلدەردىڭ قاتارىنان ورىن الىپ، ۇرپاعىمىز قوعام قاجەتتىلىگىنە ساي بولىپ جاتسا، بۇل – ۇستاز ەڭبەگىنىڭ جەمىسى. سەبەبى اقىندى دا، باتىردى دا، الىپتى دا، دانانى دا ۇستاز تاربيەلەيدى.

«مۇعالىمى قانداي بولسا، قوعامى دا سونداي بولماق» دەپ كەلەتىن بۇلجىماس زاڭدىلىق بار. ادامزات وركەنيەتىنىڭ دامۋ تاريحىندا جاقسى مەكتەبى مەن مۇعالىمدەرى بار مەملەكەت قانا وزىپ شىققان. وسى ورايدا ءبىلىم بەرۋ سالاسىندا كوپ جىلدان ەڭبەك ەتىپ كەلگەن ارىپتەسىم جايلى وي قوزعاعىم كەلەدى. حاديشا مانتايقىزى شايمەردەن – 1965 جىلى قازاق مەملەكەتتىك پەدوگوگيكالىق قىزدار ينستيتۋتىن ءتامامداپ، اقمولا وبلىسى، استراحان اۋدانى، قىزىلجار ورتا مەكتەبىنە حيميا جانە بيولوگيا ءپانى مۇعالىمى بولىپ ەڭبەك جولىن باستاعان. ول تاباندى ەڭبەكتىڭ ارقاسىندا مەكتەپ ديرەكتورى دارەجەسىنە دەيىن كوتەرىلدى. 1991 جىلى مەملەكەتتىك تىلدە وقىتىلاتىن مەكتەپتەردى اشۋ سۇرانىسى تۋىنداعان كەزدە حاديشا مانتايقىزى وسى قىزمەتكە بەلسەندى ارالاسىپ، جىتىقارا قالاسىندا جانە باسقا اۋدانداردان مەكتەپ جانىنداعى ينتەرناتقا قازاق ۇلتىنىڭ بالالارىن جينادى. جەتىقارا، قامىستى جانە باسقا دا بىرنەشە اۋداندارىنداعى قازاق مەكتەپتەرىنىڭ مۇعالىمدەرىنە سەمينار وتكىزىپ، ورىس تىلىنەن قازاق تىلىنە ادىستەمەلىك نۇسقاۋلىقتاردى اۋدارىپ، ديداكتيكالىق ماتەريالدار جيناعىن قۇراستىردى، جاس مۇعالىمدەرگە كومەك كورسەتتى. 2000 جىلى استراحان اۋدانىنا اۋداندىق ءبىلىم بولىمىنە باس مامان بوپ ورالدى.

 2001-2005 جىلدارى جالتىر №4 ورتا مەكتەبىندە مەكتەپ ديرەكتورىنىڭ وقۋ ءىسى جونىندەگى ورىنباسارى بولسا، سوڭعى جىلدارى حيميا جانە بيولوگيا ءپانىنىڭ مۇعالىمى رەتىندە جۇمىس ىستەپ كەلدى. مۇعالىم ەڭبەگىنىڭ ناتيجەسىن وبلىستىق ءبىلىم باسقارماسى، ءبىلىم جانە عىلىم مينيسترلىگى تاراپىنان العان ماراپاتتاۋلارىنان بايقاۋعا بولادى.1998 جىلى «قر ءبىلىم بەرۋ ءىسىنىڭ ۇزدىگى» اتاعىن يەلەندى. استراحان اۋدانىنىڭ 80 جىلدىعىنا وراي باسىلىپ شىققان « ەسىلدىڭ جاعاسىندا» اتتى كىتاپقا «قازاقستان اعارتۋ ءىسىنىڭ ۇزدىگى» رەتىندە ەندى.

بويىندا ۇلىلىقتىڭ جاتقان ءىزى،

كەلەشەك عاسىرعا دا ۇلگى ءىسى.

شۋاقتى، شەجىرەلى تاريحى بار،

حاديشا اپاي – مەكتەبىمنىڭ ماقتانىشى.

قاسيەتتى قارا شاڭىراقتان ءبىلىم نارىمەن سۋسىنداپ، مۇعالىم دەگەن اتاقتى الىپ شىعۋ، وقۋشىلارعا جاقسى تاربيە مەن ءبىلىم بەرۋ – ۇلكەن ەرلىك. سەبەبى ءبىز تاربيەلەگەن ۇرپاق ەرتەڭگى كۇنى ەلىمىزدىڭ تىرەگى بولماق. تاۋەلسىزدىكتىڭ تۇعىرىن، ەلىمىزدىڭ تىنىشتىعىن ساقتاپ قالاتىن دا سولار. سوندىقتان ۇستاز بولۋ – جۇرەكتىڭ باتىرلىعى.

 

گۇلدانا يسكاكوۆا،

جالتىر №4 ورتا مەكتەبىنىڭ تاريح ءپانىنىڭ مۇعالىمى

 

اقمولا وبلىسى

 

سوڭعى جاڭالىقتار

ۇقساس جاڭالىقتار