سۋرەت ەلباسىنىڭ ءباسپاسوز قىزمەتىنەن الىندى
ا.ەسىموۆتىڭ اقپاراتىنا سايكەس, قورعا باعىنىستى كومپانيالار توبى قىزمەتكەرلەردىڭ قىسقارۋىنا جول بەرمەدى. بارلىق كاسىپورىن جۇمىسىن جالعاستىرىپ كەلە جاتىر. سونىمەن قاتار "سامۇرىق-قازىنا "ۇاق" اق باسقارما توراعاسى وتاندىق دەنساۋلىق ساقتاۋ جۇيەسىن قولداۋ بويىنشا جۇرگىزىلىپ جاتقان جۇمىستار تۋرالى باياندادى.
قازاقستاننىڭ تۇڭعىش پرەزيدەنتى ن.نازارباەۆ "سامۇرىق-قازىنا" ۇاق" اق-نىڭ كوروناۆيرۋستىق ينفەكتسيامەن كۇرەسۋ ۇدەرىسىنە قاتىسۋ شارالارىن كەڭەيتۋ قاجەتتىگىن اتاپ ءوتتى.
– قوردى باسقارۋ جونىندەگى كەڭەستىڭ توراعاسى رەتىندە "سامۇرىق-قازىنا" قورىنىڭ ىشكى رەزەرۆىنەن ءىرى مەگاپوليستەر – نۇر-سۇلتان جانە الماتى قالالارىندا ەكى مەديتسينالىق ورتالىق سالۋعا قاراجات ءبولۋدى تاپسىرامىن. بۇل مەديتسينالىق ورتالىقتار عىلىمي-زەرتتەۋ الەۋەتىن شوعىرلاندىرۋعا ارنالادى. ول ەلىمىزدىڭ كەلەشەك ۇرپاقتارىن ىقتيمال قاۋىپتەردەن قورعاۋعا مۇمكىندىك بەرەدى. ۇكىمەت پەن اكىمدەر بۇل باستامانى قولدايتىنىنا سەنىمدىمىن, – دەدى ەلباسى نۇرسۇلتان نازارباەۆ.
ءسوز سوڭىندا قازاقستاننىڭ تۇڭعىش پرەزيدەنتى كوروناۆيرۋستىق ينفەكتسيادان قازا تاپقانداردىڭ وتباسىلارىنا كوڭىل ايتتى جانە قازاقستاندىقتاردى بارلىق قاجەتتى قاۋىپسىزدىك شارالارىن قاتاڭ ساقتاۋعا شاقىردى.
