قوعامدىق شتابتىڭ قۇرامىنا وبلىس, قالا, اۋدان دەپۋتاتتارى جانە بەلسەندى ازاماتتار تارتىلدى. بارلىعى - 17 ادام, ونىڭ التاۋى - جاڭاوزەن قالاسى مەن اۋداندارداعى وكىلدەر.
قوعامدىق شتابتىڭ نەگىزگى ماقساتى - حالىققا, جەرگىلىكتى اتقارۋشى بيلىككە, بارلىق دەڭگەيدەگى مەملەكەتتىك ورگاندارعا, دەنساۋلىق ساقتاۋ مەكەمەلەرى مەن ۇجىمدارىنا, دارىگەرلەرگە قولدان كەلەتىن كومەكتى جاساۋ. بيلىك تاراپىنان قۇرىلعان شتابتاردىڭ جۇمىستارىن قايتالاماي, كەرءىسىنشە, ولاردىڭ قولى جەتپەي نەمەسە يگەرە الماي جاتقان شارۋالارى بولسا, سول پروبلەمالاردى بىرلەسە شەشۋگە اتسالىسۋ.
-الەمدى جايلاعان كورونوۆيرۋس ىندەتى قازاقستاندى دا اينالىپ وتكەن جوق. حالقىمىزعا, بارلىق الەۋمەتتىك-ەكونوميكالىق سالالارعا ۇلكەن سوققى بەرۋدە. ماڭعىستاۋ دا بۇل ىندەتتەن زارداپ شەگۋدە. "ەل باسىنا كۇن تۋسا, ەر باسىنا سىن تۋادى" دەگەن, حالىقتىڭ باسىنا قيىندىق تۋعاندا, كوزى اشىق, كوڭىلى وياۋ ادام بۇل جاعدايعا بەي-جاي قاراي المايتىندىعى ءسوزسىز.قازىردىڭ وزىندە كەيبىر ەلگە قاجەتتى جۇمىستاردى باستاپ كەتتىك. مىسالى, بۇل اۋرۋدان باسقا سىرقاتتارمەن اۋىراتىن ادامدارعا كۇندىزگى ستاتسيونارلاردى اشۋ, قان ورتالىعىمەن جۇمىس جاساۋ, قوناق ۇيلەردە ورنالاسقان دارىگەرلەرگە قوسىمشا بەرىلەتىن دارۋمەندى تاماقتاردى جەتكىزۋدى رەتتەۋ جانە باسقالار. قوعامدىق شتاب ەل ىشىندەگى بارلىق بەلسەندى توپتارمەن, ازاماتتارمەن جۇمىس جاساۋعا اشىق جانە دايىن. ەلدىڭ دۇرىس ۇسىنىس, پىكىرلەرىن قابىلداپ, ءوز جۇمىسىمىزعا قولدانۋعا ءازىرمىز. قادىرلى اعايىن!
بۇنداي ناۋبەت ەلىمىزدىڭ باسىنان تالاي وتكەن, اتا-بابامىز بارلىعىنان باس بىرىكتىرىپ, ابىرويمەن شىققان! ەل پرەزيدەنتى بۇل جاعدايدى سوعىسپەن تەڭەپ وتىر, راسىندا دا سولاي! قازاق "التاۋ الا بولسا اۋىزداعى كەتەدى, تورتەۋ تۇگەل بولسا توبەدەگى كەلەدى" دەيدى. سوندىقتان, اعايىن, بابالاردىڭ ءداستۇرىن ۇستاپ, كۇش بىرىكتىرەيىك, باس قوسايىق! بىرلەسە قيمىلداپ, قيىندىقتى جەڭىپ شىعايىق!
ەلىمىزگە تىنىشتىق, وتباسىمىزعا امانشىلىق, دەنىمىزگە ساۋلىق تىلەيىك!", - دەلىنگەن شتابتىڭ ۇندەۋىندە.
قوعامدىق شتاب اقپاراتتىق تەحنولوگيالاردىڭ مۇمكىندىگىن پايدالانىپ, مەيءىلىنشە ارا قاشىقتىقتى ۇستاپ, جۇمىس جاسايدى. حالىقپەن بايلانىس ءۇشىن ارنايى ادامدار بەلگىلەندى. بارلىق اقپاراتتى تەز ارادا, جەدەل جاريالاپ وتىرۋ ءۇشىن الەۋمەتتىك جەلىلەر مەن باق پايدالانىلادى.
