رۋحانيات • 14 شىلدە، 2020

شەرتەرشىلەر قۇرعان ونلاين-انسامبل

35 رەت كورسەتىلدى

كارانتين ۋاقىتى ونەر ادامدارىنىڭ وزگەشە ىزدەنىسىنە، تىڭدارماندارمەن جاڭا بايلانىس ورناتۋىنا مۇمكىندىك اشۋدا. وعان دالەل ەلىمىزدە العاش رەت ونلاين جوبا نەگىزىندە قۇرىلعان شەرتەرشىلەر ءانسامبلى. بۇل انسامبل ءار وبلىستان مۋزىكانتتاردىڭ باسىن بىرىكتىرىپ، قازاقتىڭ كونەدەن كەلە جاتقان ۇلتتىق اسپابىن ناسيحاتتاۋدا.  

شەرتەر دومبىراعا ۇقساس شاعىن عانا اسپاپ. ونىمەن كۇي، ءان ورىنداۋشىلار از بولعاندىقتان دا كوپشىلىك بۇل اسپاپتى بىلە بەرمەيدى. سوندىقتان دا ونى ناسيحاتتاۋدى ءاربىر شەرتەرشى وزىنە ۇلكەن مىندەت سانايدى. ال ءانسامبلدى قۇرۋ يدەياسىن ۇسىنعان سولتۇستىك قازاقستان وبلىستىق فيلارمونياسىنىڭ "القيسسا" فولكلورلى ءانسامبلىنىڭ جانە سەگىز سەرى اتىنداعى قازاق ۇلتتىق ينسترۋمەنتالدى وركەسترىنىڭ ءسوليسى تاتيانا بۋكيروۆا. بۇل وي وعان 2018 جىلى پەتروپاۆل قالاسىندا وتكەن، شەرتەرشىلەردىڭ باسى قوسىلعان رەسپۋبليكالىق "گاۋحار تاس" فەستيۆالىندە تۋىنداعان ەدى. ونى جۇزەگە اسىرۋ ءدال وسى پاندەميا كەزىندە مۇمكىن بولعان.

ونلاين-ءانسامبلدىڭ قالاي قۇرىلعاندىعى جونىندە تاتيانانىڭ ءوزى بىلايشا اڭگىمەلەپ بەردى.

- كوكتەمنەن باستاپ قاشىقتان جۇمىس ىستەۋگە كوشتىك. وسى كەزدە بەكەرگە قاراپ جاتامىن با دەگەن ويمەن ەلىمىزدىڭ تۇكپىر-تۇكپىرىندەگى شەرتەرشىلەرگە حابارلاسىپ، انسامبل قۇرۋ تۋرالى ويىمدى ايتتىم. باستاپقى كەزدە جەتى شەرتەرشى بولىپ، ايبول قۇدايبەرگەنوۆتىڭ "جەلدىرمە" كۇيىن ورىنداپ، كوپشىلىككە تاراتتىق. بىرتە-بىرتە قاتارىمىز قوسىلىپ، قازىر ون ادامعا جەتتى،  – دەيدى ول.

انسامبلگە شىعارماسى ارقاۋ بولعان الماتى وبلىستىق فيلارمونياسىنىڭ "سازگەن" فولكلورلى-ەتنوگرافيالىق ءانسامبلىنىڭ اسپاپشىسى، سازگەر ايبول قۇدايبەرگەنوۆ:

- ماعان حابارلاسىپ، ءانسامبلدىڭ ورىنداۋىنا شىعارمامنىڭ ۇسىنىلىپ وتىرعانىن ايتقاندا تاڭدانعانىمدى جاسىرا المايمىن. شىعارمامنىڭ ەل كولەمىنە كەڭ تارالعانىن بىلمەپپىن. ونى 2003 جىلى جازعان ەدىم. كەڭەسىپ ءبارى ءبىراۋىزدان وسى كۇيدى تاڭداعان سوڭ، نوتاسىن الىپ دايىندالىپ، اركىم ءوز ۇيىنەن ورىنداپ بەينەجازباسىن تاتياناعا جىبەردى. ءار جازبانى بىرىكتىرىپ، وڭدەپ، انسامبل قۇراۋ وڭاي بولعان جوق. بىراق، بۇل تاتيانانىڭ قولىنان كەلدى، – دەيدى سازگەر.

بۇگىندە ءانسامبلدىڭ قۇرامىندا تاتيانا مەن ايبولدان باسقا پاۆلوداردان امانجول جۇمالين، قىزىلوردالىق باعدات قۇدايبەرگەنوۆ، نۇر-سۇلتان قالاسىنان ەربول مۇحامەديەۆ، كوكشەتاۋلىق انۋاربەك فايزۋللين، وسكەمەننەن الۋا تاشەنوۆا، قوستانايلىق بەرىك ورازالين، اقتاۋدان باۋىرجان كوبەنعاليەۆ، شىمكەنتتىك ەرلان داۋرەنبەكوۆ بار.

جۋىردا وتكەن ۇلتتىق دومبىرا كۇنىندە ابايدىڭ "تورى جورعا" كۇيىن كوپشىلىك نازارىنا ۇسىنعان انسامبل كەزەكتى شىعارماسىن جارىققا شىعارۋ ءۇشىن دايىندىق ۇستىندە.

سوڭعى جاڭالىقتار

ۇقساس جاڭالىقتار