ماسكەۋدىڭ باتىس بيريۋلەۆو اۋدانىندا 10 قازان كۇنى تۇندە 25 جاسار ەگور ششەرباكوۆتى تۇندە قىزىنىڭ كوز الدىندا پىشاقتاپ ءولتىردى دەگەن كۇدىكپەن ىزدەۋ جاريالانعان ازەربايجان جىگىتى قۇقىق قورعاۋ قىزمەتكەرلەرىنىڭ قولىنا ءتۇستى. بۇل تۋرالى «ۋترو.رۋ» حابارلادى.
تۇننەن بەرى ينتەرنەتكە وسى قىلمىستى جاسادى دەگەن ايىپ تاڭىلىپ وتىرعان 1982 جىلى تۋعان ازەربايجان ازاماتى ورحان زەينالوۆتىڭ ۇستالۋ ءساتىنىڭ سيۋجەتى ءتۇسىپ ۇلگەردى. وندا ەر كىسىنىڭ ءتارتىپ ساقشىلارىنا قالاي قارسىلىق كورسەتىپ جاتقانى انىق كورىنىپ تۇر. جەرگە ەتپەتىنەن جاتقىزىلعان ول تۇسىندىرمە بەرۋ سۇرالعاندا: «مەنىڭ قازىر ءالىم جوق. كامەراعا بارايىق, ءبارىن سول جەردە ايتامىن», دەپ جاۋاپ قايتاردى.
ورحان زەينالوۆتىڭ قايدا تىعىلىپ جاتقانىن كورسەتىپ بەرگەن ادام تۋرالى ازىرگە دەرەك جوق. «موسكۆا 24» تەلەارناسىنىڭ مالىمەتى بويىنشا, كىسى ءولتىرۋشىنى تابۋعا ول جالداپ تۇرعان پاتەردىڭ يەسى 1 ملن. تەڭگە سىياقى ۋادە بەرىلگەننەن كەيىن جاردەمدەسكەن. ال يۋري دەپ اتالاتىن بۇل جىگىت وسىدان ەكى كۇن عانا بۇرىن پاتەر جالداۋشىسىنىڭ قايدا جۇرگەنىن بىلمەيتىنىن, ونىڭ ون جىلدان بەرى تۋىستارىمەن ماسكەۋدە تۇرىپ كەلە جاتقانىن, سول كەزدەن بەرى كورشى تۇرعاندارىن ايتىپ بەرىپ ەدى. ال «كومسومولسكايا پراۆدا» گازەدى زەينالوۆتى كولومنانىڭ ورتالىق ساياباعىندا كەزدەسۋگە شاقىرعان تۋىستارى ۇستاپ بەردى دەگەندى شىعارىپ وتىر.
قالاي دەگەندە دە, ورحان زەينالوۆ كەشە, سەيسەنبى, 15 قازان كۇنى كەشكە كولومنا قالاسىندا سوبر ساربازدارىنىڭ ارەكەتى ارقىلى قولعا ءتۇستى. ول قازىر ۋاقىتشا وقشاۋلاعىش كامەراعا وتىرعىزىلدى. رەسمي ەمەس اڭگىمە بارىسىندا ەگور ششەرباكوۆتى ولتىرگەنىن مويىنداعان. بۇگىن, سارسەنبى كۇنى العاشقى تەرگەۋگە شاقىرىلادى. بۇدان باسقا, كۇدىكتىنىڭ وزگە دە قىلمىستارعا قاتىسى تەكسەرىلەدى.
ساكەن مايلىباي.
