كوروناۆيرۋس • 14 شىلدە، 2020

پنەۆمونيانى قالاي انىقتايمىز؟

479 رەت كورسەتىلدى

ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا جوعارى ساناتتى پۋلمونولوگ، مەديتسينا عىلىمدارىنىڭ دوكتورى ناتاليا لاتىپوۆا پنەۆمونيانى انىقتاۋ جولدارىن ايتتى.

«پنەۆمونيا بەلگىلەرى بىردەن پايدا بولمايدى. رەسپيراتورلىق ءتۇرى كەم دەگەندە 5-7 كۇننەن كەيىن پايدا بولادى. قاراپايىم جوتەل، دەمىكپە، تىنىس الۋدىڭ تارىلۋى، ءوزىڭدى جايسىز سەزىنۋ جانە كەۋدە تۇسىنىڭ اۋىرۋى پنەۆمونيانىڭ بەلگىسى بولۋى مۇمكىن. تىنىس الۋ جولدارىنىڭ زاقىمدانۋى وسى بەلگىلەردىڭ بىرتىندەپ ورشۋىنەن باستالادى»، دەيدى ناتاليا لاتىپوۆا.

ونىڭ ايتۋىنشا، وسى بەلگىلەردىڭ پايدا بولۋى وكپەنىڭ قانشالىقتى زاقىمدانعانىنا بايلانىستى. بۇل ورشىمەسە، دەنە قىزۋىنىڭ كوتەرىلۋى ساقتالماسا، بەلگىلەر 7 كۇننەن ارتىق بولماسا، ۋايىمداۋدىڭ قاجەتى جوق. ياعني انتيبيوتيك قابىلداۋدىڭ نەمەسە كومپيۋتەرلىك توموگرافيا جاساۋدىڭ قاجەتى جوق. ەگەر بۇل بەلگىلەر ۋاقىت وتكەن سا­يىن كۇشەيە باستاسا، دەنە قىزۋى تۇسپەي قويسا، وكپەنى قاراتۋ كەرەك جانە ەمدەۋ ءادىسىن وزگەرتۋ كەرەك.

سونىمەن قاتار دارىگەر سين­تە­تيكالىق ماسكا تاعۋ پنەۆمونيانى ورشىتەدى دەگەن پىكىرگە قاتىستى ويىن ءبىلدىردى.

«ارينە ماسكانىڭ جا­رام­دىلىق مەرزىمى بولادى جانە باكتەريالار ماتانىڭ وزىندە جينالىپ قالۋى مۇمكىن بولعاندىقتان ونى اۋىستىرىپ وتىرۋ ۇسىنىلادى. ءار ماسكانى ەكى ساعاتتان ءبىر تاۋ­لىككە دەيىن تاعۋعا بولادى. ول ماسكانىڭ قانداي ماتەريالدان جاسالعانىنا بايلانىستى. بىراق ماسكا پنەۆمونيانى ءورشىتىپ جىبەرۋى مۇمكىن دەپ ايتۋ قيىن، ءتىپتى مۇمكىن ەمەس دەپ ويلايمىن»، دەيدى پۋلمونولوگ.

جيىن بارىسىندا ناتاليا لاتىپوۆا پنەۆمونيا كەزىندە ماسساجدىڭ كومەگى بار-جوعىن ايتتى.

«وكپەگە سۇيىق جينالىپ قالادى» دەگەن ءسوز كوروناۆيرۋس ينفەكتسياسىنا قاتىستى ايتىلا قويمايدى. اۋرۋ بارىسىندا قۇرعاق جوتەل بولادى. وسى جەردە وكپە سۇزگىسى بولادى. بۇل جەردىڭ مەحانيزمى باسقاشالاۋ. «ىشپەن جاتۋ كەرەك» دەگەن كەڭەس نە سەبەپتى كوپ ايتىلادى؟ وكپە جاسۋشاسى ەكسكۋرسيا جاساۋى ءۇشىن ادامنىڭ ارقا تۇسى اشىق بولۋى كەرەك. ىشپەن جاتقان كەزدە عانا ارتقى تۇسى اشىق بولادى. ەگەر اۋرۋدىڭ رەسپيراتورلىق بەلگىلەرى بولسا جانە كوروناۆيرۋس ينفەكتسياسى سىزدە بار ەكەنى دالەلدەنگەن بولسا، كۇنىنە بىرنەشە رەت ەتبەتىننەن جاتۋدى ۇسىنامىز. پنەۆمونيانىڭ اۋىر تۇرىمەن اۋىراتىندار كۇنىنە 12-16 ساعات بويى ىشپەن جاتۋى كەرەك. بۇل قان اينالىمدى جاقسارتاتىن تەتىكتى جاقسى جۇمىس ىستەتەدى. ال ماسساج جاساتۋدى ۇسىنۋ قيىن. پنەۆمونيا كەزىندە ماسساج قانشالىقتى جاقسى اسەر ەتەتىنى بەلگىسىز»، دەدى دارىگەر.

 

سوڭعى جاڭالىقتار

شىمكەنتتە 5 شاعىناۋدانعا گاز جۇيەسى تارتىلۋدا

وڭتۇستىك قازاقستان • بۇگىن، 16:05

COVID-19: ابدىراعان ارگەنتينا

الەم • بۇگىن، 11:25

ۇقساس جاڭالىقتار