پاۆلودار وبلىسىنداعى اتا-انالار بالالارعا ارنالعان جاڭا ۆاكتسينادان باس تارتۋدا. ەستەرىڭىزگە سالا كەتسەك, وتكەن اپتادا ەكىباستۇز قالاسىندا 12 جاستاعى قوس جەتكىنشەك جاتىر مويىنى وبىرىنا قارسى ەگىلىپ, كەيىن 3 كۇندەي ەستەن تانىپ, جاتىپ قالعان بولاتىن. بۇل تۋرالى «كتك» تەلەارناسى حابارلادى.
بۇل جاعدايعا بايلانىستى دارىگەرلەر جاس اعزا ءدارىنى اۋىر قابىلدادى دەگەن تۇسىنىكتەمە بەرىپ, ەكپەنىڭ ەش زيانى جوق ەكەنىن ايتقان-دى. دەگەنمەن, ناقتى سەبەپتەر انىقتالمايىنشا, وبىرعا قارسى ەكپە جۇمىستارى ەلىمىز بويىنشا ۋاقىتشا توقتاتىلىپ وتىر.شىندىعىندا, جاتىر مويىنى وبىرىنىڭ الدىن الماق بولعان دارىگەرلەردىڭ العاشقى ارەكەتىنەن كەيىن-اق جۇرتتىڭ جۇرەگى شايلىعىپ قالعان. قازىر بۇدان سەكەم العان اتا-انالار ەندى ەكپەدەن ءۇزىلدى-كەسىلدى باس تارتۋدا.
«ەشقانداي قۇلاقتاندىرۋ جۇرگىزىلگەن جوق. تەك, ەكپە جاسالۋى ءتيىس دەگەندى ەستىدىك. ال ونىڭ جاي-جاپسارى, كىمگە, نە ءۇشىن ەگىلەتىنى جانە اسەرى تۋرالى ايتىلعان جوق»,-دەيدى پاۆلودار قالاسىنىڭ تۇرعىنى يرينا ديدەشينا.
قىمبات پرەپارات تەگىن تاراتىلۋدا. قازىردىڭ وزىندە پاۆلودار وڭىرىندە ادام پاپيللوماسى ۆيرۋسىنا قارسى ەكپەنىڭ ۇشتەن ءبىرى قولدانىلىپ ۇلگەرىپتى. ايتسە دە, بۇل ۇسىنىستان باس تارتقانداردىڭ قاراسى قالىڭ. ولارعا ەشقانداي ءماجبۇرلى ەكپە جاسالمايدى دەپ وتىر ماماندار. ال كەلىسىمىن بەرگەندەرگە ەكپە جۇمىستارى الداعى ۋاقىتتا قايتا جالعاسپاقشى. الايدا,باستامانى قولدامايتىنداردىڭ كوپتىگىنەن, ۆاكتسيناتسيالاۋدىڭ قانشا ۋاقىتقا سوزىلاتىنى ازىرگە بەلگىسىز.
مامانداردىڭ ايتۋىنشا, پاۆلودار ءوڭىرى قازىر ونكولوگيالىق اۋرۋلار بويىنشا كوش باستاپ تۇر. مۇنداعى جاتىر مويىنى وبىرىنا شالدىققانداردىڭ قاتارى ازايۋدىڭ ورنىنا, كۇن وتكەن سايىن كوبەيىپ بارادى. سوندىقتان وسى جولى قاۋىپتى اۋرۋدىڭ الدىن الۋ ماقساتىندا 4 مىڭنان استام جەتكىنشەكتى ۆاكتسيناتسيالاۋ جوسپارلانعان ەكەن.
باقىتبەك كەنەش ۇلى.
