ماسكەۋ پوليتسياسى 10 قازان كۇنى باتىس بيريۋلوۆودا تۇندە 25 جاسار ەگور ششەرباكوۆتى سۇيگەن قىزىنىڭ كوزىنشە پىشاقتاپ ءولتىرىپ كەتكەن كۇدىكتى جونىندە بارلىق كەرەكتى مالىمەتتەردى جيناپ الدى. بۇل تۋرالى «ۋترو.رۋ» حابارلادى.
«كۇدىكتىنىڭ اتى-ءجونى ورحان زاحيت وگلى زەينالوۆ, 25 جاستا», - دەپ ءمالىم ەتتى قالا ىشكى ىستەر دەپارتامەنتىنەن.
پوليتسيا وسىعان بايلانىستى كۇدىكتىمەن كەزدەسكەن كەزدە اباي بولۋدى سۇرادى. «ءبىز بارلىق ازاماتتاردان ونى كوشەدە كەزدەستىرە قالعان جاعدايدا اباي بولۋدى سۇرايمىز», - دەلىنگەن حابارلامادا.
تەرگەۋ كوميتەتىنىڭ دەرەگى بويىنشا, زەينالوۆ تۇراقتى جۇمىس ىستەمەگەن. ول كوبىنە كولىكپەن ادام تاسىپ كۇن كورگەن. «ونىڭ وتە قىزبا ەكەنى, تۇراقتى جۇمىس ىستەمەيتىنى, ىشىمدىككە قۇمارلىعى بەلگىلى بولدى», - دەپ اتاپ كورسەتتى ونداعىلار.
«كۇدىكتىنى ۇستاپ الۋ – بىرنەشە ساعاتتىڭ عانا ەنشىسىندەگى شارۋا. ول ەندى ەشقايدا قاشىپ قۇتىلا المايدى», - دەدى تاعى.
ايتقانداي, ورحان زەينالوۆتىڭ ازەربايجاندا قىلمىسى ءۇشىن ىزدەستىرىلىپ جاتقانى جالعان بولىپ شىقتى. «ماسكەۋدە كىسى ءولتىردى دەگەن كۇدىك تاعىلعان ورحان زەينالوۆ, رەسەي باق-تارىندا اتاپ كورسەتىلگەندەي, ازەربايجاندا قىلمىستىق ىزدەۋدە جۇرگەن جوق. ول قىلمىستىق جاۋاپقا تارتىلعان ەمەس», - دەپ مالىمدەدى ازەربايجان ىشكى ىستەر مينيسترلىگىنەن.
سونىمەن بىرگە, زەينالوۆتىڭ 10 جىلدان بەرى ماسكەۋدە تۋىستارىمەن بىرگە تۇرىپ كەلگەنى بەلگىلى بولدى. بىراق ول كەيىنگى كەزدەرى پاتەر جالداپ تۇرعان. جانە پاتەردى ءجيى اۋىستىراتىن بولعان.
قازىر زەينالوۆتىڭ 8 ادامنان قۇرالعان تۋىستارى تۇگەل قاماۋعا الىنعان. پاتەردە ءتىنتۋ جۇرگىزىلگەن.
مۇرات ايتقوجا.
