ۆيدەو • 12 شىلدە، 2020

ءىىم: قازاقستاندا ءتۇسىرىلدى دەپ جالعان بەينەجازبالار تارالۋدا

110 رەت كورسەتىلدى

ىشكى ىستەر مينيسترلىگى “قازاقستان اۋماعىندا ۇشاق پەن تىكۇشاقتاردىڭ كومەگىمەن ۆيرۋستىق جانە بيوحيميالىق وق-ءدارى شاشۋ تۋرالى” اقپاراتتى رەسمي تۇردە جوققا شىعارعانىنا قاراماستان، كەيبىرەۋلەر ازاماتتاردى اداستىرۋ ارەكەتىن جالعاستىرىپ جاتىر، – دەپ حابارلايدى Egemen.kz Polisia.kz سايتىنا سىلتەمە جاساپ.

سوندىقتان ولار شەتەلدە تۇسىرىلگەن بەينەجازبالاردى ادەيى جاريالايدى.

وسىلايشا، ءىىم ماماندارى الەۋمەتتىك جەلىلەرگە مونيتورينگ جاساۋ بارىسىندا ۇشاقتاردىڭ ءشول جەرلەردە قىزىل ءتۇستى زاتتاردى تاستاپ جاتقان بەينەماتەريالداردى انىقتادى. بۇل جاريالانىمداردىڭ اۆتورلارى كادرلار قازاقستاندا تۇسىرىلگەن دەپ سەندىرەدى.

ءىىم تەرگەۋ دەپارتامەنتى كورىنەۋ جالعان اقپاراتتى تاراتۋ فاكتىسى بويىنشا قر قىلمىستىق كودەكسىنىڭ 274-بابىمەن سوتقا دەيىنگى تەرگەۋدى باستادى.



ىشكى ىستەر مينيسترلىگى بەينەجازبانىڭ تولىق نۇسقاسىن زەرتتەدى، ناتيجەسىندە بەينەجازباداعى ۇشاق اقش-تاعى ءورتتى سوندىرۋگە جۇمىلدىرىلعان “Tanker Air Carrier 914” ۇشاعى ەكەنى بەلگىلى بولدى.

بۇل بەينەجازبا “Goal Aircraft” جەكە امەريكاندىق اۋە كومپانياسىنىڭ Facebook-تاعى اككاۋنتىنان كوشىرىلىپ الىنعان.

ءىىم توتەنشە جاعدايلار كوميتەتىنىڭ ماماندارى حابارلاعانداي، بويالعان سۋمەن ءورتتى ءسوندىرۋ تاجىريبەسى اقش پەن اۆستراليادا قولدانىلادى. بوياۋ ەكيپاجعا الدىڭعى لاقتىرۋدىڭ ناتيجەسىن كورۋگە كومەكتەسەدى جانە قايتادان ءدال كوزدەۋگە جاقسى. سونداي-اق، بۇل سۋدىڭ قۇرامىندا اعاشقا ءسىڭىپ، ءورتتىڭ تارالۋىن كەشىكتىرەتىن ارنايى تىڭايتقىش بار. ورتكە قارسى ۇشاقتاردىڭ ەكيپاجدارى ەڭ تومەنگى بيىكتىكتە – اعاشتاردىڭ بۇتاقتارىنا 60-100 مەتر جاقىن ۇشۋعا تۋرا كەلەدى. كوبىنەسە سۋدى ءورتتىڭ وزىنە ەمەس، جالىننىڭ جولىنداعى ۋچاسكەلەرگە توگەدى.

قاسكۇنەمدەر قازاقستاندا تۇسىرىلگەن دەپ بەرگەن ءورت ءسوندىرۋ كادرلارى اعىمداعى جىلدىڭ ماۋسىم ايىندا اقش شتاتتارىنىڭ بىرىندە ءورت ءسوندىرۋ كەزىندە الىنعان.

مۇنى ۇشاقتارداعى تانۋ بەلگىلەرى، ءورت ءسوندىرۋ قىزمەتىنىڭ (Fire AZ-TNF – Tonto National Forest – تونتو ۇلتتىق قورىعى) اۆتوكولىكتەرىندەگى نومىرلىك بەلگىلەر جانە بەينەجازبانىڭ تولىق نۇسقاسىنداعى ءورت سوندىرۋشىلەردىڭ اعىلشىن تىلىندەگى سوزدەرى كۋالاندىرادى.

ءىىم ەسكەرتەدى: كورىنەۋ جالعان اقپارات تاراتۋ جەتى جىلعا دەيىن باس بوستاندىعىنان ايىرۋدى كوزدەيتىن قىلمىستىق قۇقىق بۇزۋشىلىق بولىپ تابىلادى.

سوڭعى جاڭالىقتار

ۇقساس جاڭالىقتار