جالپى, قاۋىپتى ىندەتپەن كۇرەسۋدە اۋليەاتا وڭىرىندە قانداي شارالار قابىلدانىپ, قانداي جۇمىستار اتقارىلۋدا؟ اتالعان ماسەلەگە بايلانىستى جامبىل وبلىسىنىڭ اكىمى بەردىبەك ساپارباەۆ وڭىرلىك كوممۋنيكاتسيالار قىزمەتىنىڭ الاڭىندا بريفينگ وتكىزدى. اكىمنىڭ ايتۋىنشا, وبلىستا وتكەن تاۋلىكتىڭ وزىندە 77 جاعداي تىركەلگەن. ونىڭ ىشىندە 43 ناۋقاس سيمپتوممەن جانە 34 ناۋقاس سيمپتومسىز جاعدايدا انىقتالعان. ال, ينفەكتسيالىق ستاتسيوناردان جالپى سانى 598 ادام ساۋىعىپ شىققان. وكىنىشكە قاراي, 3 ادام قايتىس بولعان. ونىڭ ىشىندە 2 تۇرعىن جەرگىلىكتى ازاماتتار بولسا, 1 تۇرعىن پاۆلودار وبلىسىنىڭ تۋماسى بولعان. بۇگىندە 384 ناۋقاستىڭ جاعدايى ورتاشا بولسا, 70 ناۋقاستىڭ جاعدايى جەڭىل دارەجەدە بولىپ وتىر. سونىمەن قاتار, وكپەنىڭ قابىنۋ دياگنوزىمەن 896 ادام اۋرۋحاناعا جاتقىزىلىپ, 732 ناۋقاس ەم قابىلداۋدا ەكەن. ءوز سوزىندە بەردىبەك ساپارباەۆ وبلىستا كوروناۆيرۋس ىندەتىن ەمدەۋ جانە وقشاۋلاۋ شارالارىن ۇيىمداستىرۋ ماقساتىندا جالپى 1855 توسەك قورى جاساقتالعانىن اتاپ ءوتتى. سونداي-اق, وبلىستا 10 كومپيۋتەرلىك توموگرافيا اپپاراتى جۇمىس اتقارادى. تاعى ءبىر ايتا كەتەرلىگى, ينفەكتسيالىق 665 توسەك قورىن 1490-عا جەتكىزۋ ماقساتىندا قوسىمشا ورىندار ازىرلەنۋدە ەكەن. ال, اكىم وڭىرلىك ستاتسيونارلاردا بۇگىندە 146 يۆل اپپاراتى تاۋلىك بويى جۇمىس اتقاراتىن بولسا, جۋىق ارادا تاعى دا سونداي 50 اپپارات الۋ جوسپارلانۋدا ەكەنىن جەتكىزدى.
قازىرگى كەزدە مەملەكەت تاراپىنان تۇرعىندار يگىلىگى ءۇشىن ءتيىستى قولداۋلار كورسەتىلىپ كەلەدى. جيىن بارىسىندا بەردىبەك ساپارباەۆ 1662 مەديتسينالىق قۇرال-جابدىقتار الۋ ءۇشىن رەسپۋبليكالىق بيۋدجەتكە 4,9 ميلليارد تەڭگەگە ءوتىنىم ۇسىنىلعانىن مالىمدەدى. ونىڭ ىشىندە يۆل اپپاراتتارى, مونيتورلار, وتتەگى كونتسەنتراتورلارى, پۋلسوكسيمەتر سياقتى مەديتسينالىق قۇرال-جابدىقتار بار. «كادر تاپشىلىعى دا بۇگىنگى كۇنى وزەكتى ماسەلەگە اينالىپ وتىر. جاساقتالعان 1855 توسەك قورىنا 1146 مەديتسينالىق قىزمەتكەر تارتىلىپ, جۇمىس ىستەۋدە. ونىڭ ىشىندە 207 دارىگەر, 498 ورتا بۋىن مەديتسينا قىزمەتكەرى جانە 441 كىشى بۋىن مەديتسينا قىزمەتكەرى بار. قوسىمشا 565 مەديتسينا قىزمەتكەرىنە قاجەتتىلىك بار. ونىڭ ىشىندە 435-ءى ناقتى انىقتالىپ, تارتىلدى», دەدى بەردىبەك ساپارباەۆ. اكىمنىڭ ايتۋىنشا, مەديتسينا قىزمەتكەرلەرى دە اۋرۋعا ءجيى شالدىعۋدا ەكەن. بريفينگ بارىسىندا بەردىبەك ساپارباەۆ كوروناۆيرۋس ىندەتىمەن كۇرەسۋگە جالپى 2,3 ميلليارد تەڭگە بولىنگەنىن, مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس, 2585 مەديتسينا قىزمەتكەرلەرىنە 762,4 ميلليون تەڭگە ۇستەماقى تولەنگەنىن اتاپ ءوتتى. سونىمەن قاتار, وبلىستا پتر تەستىلەۋ 6 پتر زەرتحاناسىندا وتكىزىلەتىنىن, اعىمداعى جىلدىڭ 29 قاڭتارىنان باستاپ كۇنى بۇگىنگە دەيىن جالپى 64 مىڭ 187 تەستىلەۋ جۇرگىزىلگەنىن جەتكىزدى. اكىمنىڭ ايتۋىنشا, ەمدەۋ شارالارىنا جۇمىلدىرىلعان مەديتسينا قىزمەتكەرلەرى دەمالىس ورىندارىمەن قامتاماسىز ەتىلگەن, 6 قوناقۇيگە جالپى 409 مەديتسينا قىزمەتكەرى ورنالاستىرىلىپ, ولاردىڭ ءجۇرىپ-تۇرۋىنا ارنايى تاسىمالداۋ كولىگى ۇيىمداستىرىلعان.
بۇگىنگى تاڭدا جەرگىلىكتى تۇرعىندار ءۇشىن ءدارى-دارمەكتەردىڭ جەتىسپەۋشىلىگى دە كۇردەلى ماسەلەلەردىڭ ءبىرى بولىپ وتىر. ءدارىحانالاردىڭ الدىندا ساعاتتاپ كەزەكتە تۇرسا دا تۇرعىندار قاجەتتى دارىلەرىن تابا الماي جاتقاندارىن ايتىپ, شاعىمدانۋدا. بۇل ورايدا بەردىبەك ساپارباەۆ اسكوربين قىشقىلى, ەۋفيلين, گليۋكوزا جانە باسقا دا دارىلەردىڭ جەتىسپەي جاتقانىن ايتىپ, بۇگىندە وبلىس بويىنشا 486 فارماتسەۆتيكالىق نىسانداردىڭ جۇمىس ىستەپ تۇرعانىن جەتكىزدى. ونىڭ ىشىندە 447 ءدارىحانا جانە وزگە دە نىساندار بار. ال, وبلىستا ەنگىزىلگەن قاتاڭ شەكتەۋ شارالارىنا بايلانىستى تاراز قالاسى مەن بارلىق اۋدانداردا 43 مونيتورينگتىك توپتارى قۇرىلعان. مونيتورينگ توپتارىنىڭ تاراپىنان 2050 نىسانعا تەكسەرۋ جۇرگىزىلگەن. تەكسەرۋلەر بارىسىندا 340 نىساندا كارانتين تالاپتارىنىڭ ساقتالماۋى انىقتالعان. سونداي-اق, بەردىبەك ساپارباەۆ 235 نىسانعا ەسكەرتۋ بەرىلگەنىن, 75 نىسانعا ايىپپۇل سالۋ تۋرالى حاتتاما تولتىرىلىپ, سوتقا جولدانعانىن جانە 30 نىساننىڭ جابىلعانىن مالىمدەدى. سوتقا جولدانعان حاتتاما بويىنشا 12 نىسانعا 1,7 ميلليون تەڭگەگە ايىپپۇل سالىنعان. ءبىر وكىنىشتىسى, سوڭعى 7 كۇندە ناۋقاستاردىڭ سانى 414 ادامعا وسكەن. تاراز قالاسىنىڭ وزىندە 260 ادام تىركەلگەن. بريفينگ بارىسىندا بەردىبەك ساپارباەۆ مۇنداي ءوسىم كورسەتكىشى تۇرعىندار تاراپىنان سانيتاريالىق تالاپتاردى ساقتاماۋ سالدارىنان ورىن الىپ وتىرعانىن ايتىپ ءوتتى.
جامبىل وبلىسى
