وتانداستارىمىزدى ويلاندىرعان وسى ماسەلەنىڭ ءمان-جايىن ەلىمىزدەگى قۇزىرلى ورگانداردىڭ قىزمەتكەرلەرى ءتۇسىندىرىپ، باق وكىلدەرىنىڭ ساۋالدارىنا جاۋاپ بەردى. وسىلايشا پرەزيدەنت جانىنداعى ورتالىق كوممۋنيكاتسيالار قىزمەتىنىڭ الاڭىندا وتكەن ونلاين ءباسپاسوز ءماسليحاتى كوپتىڭ كوكەيىندە جۇرگەن ساۋالدار مەن سۇراقتاردىڭ ءتۇيىنىن تارقاتتى. وعان ۇقك شەكارا قىزمەتى شەكارالىق باقىلاۋ دەپارتامەنتى باستىعىنىڭ ورىنباسارى پولكوۆنيك عاني اعادىلوۆ، ۇقك شەكارا قىزمەتى شەكارالىق باقىلاۋ دەپارتامەنتى باستىعىنىڭ ورىنباسارى پولكوۆنيك ولەگ فيسەنكو، ءىىم كوشى-قون قىزمەتى كوميتەتىنىڭ باسقارما باستىعى پوليتسيا پولكوۆنيگى اسقار الدوڭعاروۆ قاتىستى.

– الەمدە ورىن العان پاندەميا جاعدايىنا بايلانىستى ەلىمىزدىڭ، شەت ەل ازاماتتارىنىڭ، سونىمەن قاتار مەكەمەلەر مەن ۇيىمداردىڭ تاراپىنان مەملەكەتتىك شەكارادان ءوتۋ بويىنشا ءتۇرلى سۇراقتار كەلىپ تۇسۋدە. وزدەرىڭىز بىلەتىندەي، بيىل 11 مامىردا قازاقستانداعى توتەنشە جاعداي رەجىمى توقتاتىلدى. الايدا حالىقتىڭ قاۋىپسىزدىگىن قامتاماسىز ەتۋ ءۇشىن كارانتيندىك ءىس-شارالار جالعاسىپ جاتىر. بۇل ءىس-شارالاردىڭ اياسىندا كوروناۆيرۋستىڭ تارالىپ كەتپەۋى ماقساتىندا الدىن الۋ شارالارى قاراستىرىلعان ۆەدومستوۆوارالىق كوميسسياسىنىڭ حاتتاماسىمەن مەملەكەتتىك شەكارانى ءوتۋ ءتارتىبى بەكىتىلدى، – دەدى ع.اعادىلوۆ. ونىڭ ايتۋىنشا، تارتىپتىك تالاپتارعا سايكەس سانيتارلىق-ەپيدەميولوگيالىق جاعداي جاقسارعانعا دەيىن شەكارادان وتۋگە ۋاقىتشا شەكتەۋلەر ەنگىزىلىپتى. الايدا قازاقستان ازاماتتارىنىڭ ەل اۋماعىنا كەدەرگىسىز قايتىپ كەلۋىنە جانە شەتەل ازاماتتارىنا ەلدەن شىعۋىنا رۇقسات بەرىلگەن. شەكتەۋلەر ديپلوماتتارعا، ۇشاق پەن تەڭىز كەمەلەرىنىڭ ەكيپاجدارىنا، پويىز بريگادالارىنا، جۇك اۆتوكولىگى مەن ترانسشەكارالىق قۇرىلىستارعا قىزمەت كورسەتۋشى پەرسونالدارعا قولدانىلمايدى. شەكتەۋلەرگە قاتىستى تولىق تىزبەمەن ۇقك-ءنىڭ knb.gov.kz سايتىندا shekaraknb.kz ينتەرنەت رەسۋرستارىندا تانىسۋعا بولادى.

نارىق جاعدايى مەن حالىقتىڭ الەۋمەتتىك جاعدايىن ەسكەرە وتىرىپ (توتەنشە جاعدايلار كەزىندە، ياعني 16 ناۋرىز بەن 11 مامىر ارالىعىندا، 11 مامىردان باستاپ قويىلىپ وتىرعان كارانتيندىك كەزەڭدە دە) مەملەكەتارالىق جۇك تاسىمالداۋعا قازاقستان شەكاراسىن كەسىپ وتۋگە ەشقانداي شەكتەۋلەر قويىلعان جوق. شەكارا قىزمەتىنىڭ بولىمشەلەرى كارانتين كەزەڭىندە 100-دەن اسا تۇراقتى، چارتەرلىك، اسكەري-كولىكتىڭ جانە جۇك-اۆايتسيالىق ۇشاقتارمەن، اۆتوبۋسپەن ەلگە ورالعان قازاقستاننىڭ 14 000-نان اسا ازاماتىن باقىلاۋدى قامتاماسىز ەتتى.

ەلىمىز قۇرلىقتا رەسەي، قىتاي، وزبەكستان، قىرعىزستان جانە تۇرىكمەنستان ەلدەرىمەن شەكارالاسادى. بۇل كورشىلەس ەلدەرمەن اراداعى شەكارادا اۆتوكولىك جانە تەمىرجول وتكىزۋ پۋنكتەرى بار. وتكىزۋ پۋنكتتەرىنىڭ جالپى سانى 100-گە جەتىپ وتىر. كولىكتىڭ بارلىق تۇرلەرى بويىنشا حالىقارالىق جولاۋشىلار قاتىناسى توقتاتىلدى. قازىرگى ۋاقىتتا 51 اۆتوكولىك وتكىزۋ بەكەتتەرىنىڭ 39-ى جۇمىس ىستەپ تۇر. ال قالعان 12-ءسى (10-نى – قازاق-رەسەي شەكاراسىندا، 2-ەۋى – قازاق-وزبەك شەكاراسىندا) پاندەمياعا بايلانىستى ۋاقىتشا جابىلعان.

ءوز كەزەگىندە و.فيسەنكو شەت مەملەكەتتەردىڭ ەلشىلىكتەرىنەن كەلىپ تۇسكەن رەسمي وتىنىشتەر بويىنشا ەل اۋماعى ارقىلى وزبەكستاننىڭ 2500-دەن استام ازاماتىنىڭ جانە قىرعىزستاننىڭ 1000-نان اسا ازاماتىنىڭ ۇيىمداسقان ءترانزيتى جۇرگىزىلگەنىن العا تارتتى.

الايدا جولاۋشىلار لەگىنىڭ ەداۋىر ازايعانىنا، دۇنيەجۇزىندەگى پاندەمياعا قاراماستان، شەكارانى جالعان قۇجات ارقىلى كەسىپ ءوتۋ، باقىلاۋدان تاۋار-ماتەريالدىق قۇندىلىقتاردى جاسىرۋ، تىيىم سالۋلار مەن شەكتەۋلەر قويىلعان ازىق-ت ۇلىك تاۋارلارىن وتكىزۋ، قورعانىش قۇرالدارى جانە مەديتسينالىق بۇيىمداردى زاڭسىز شىعارۋ فاكتىلەرى انىقتالۋدا. ماسەلەن، 7 ملن بەتپەردە، 20340-تان استام رەسپيراتور، 3 مىڭعا جۋىق قورعانىس كيىمدەرىن، 4 ملن قورعانىس قولعاپتارىن ەل اۋماعىنان زاڭسىز شىعارماق بولعان ازاماتتاردىڭ جولىن كەستىك، – دەيدى و.فيسەنكو.

ونىڭ ايتۋىنشا شەكارانى اشۋ جانە بۇرىنعى وتكىزۋ ءتارتىبىن قالپىنا كەلتىرۋ ماسەلەسى تاۋەكەلدەردى تالداۋ نەگىزىندە جانە ءۇش نەگىزگى كورسەتكىشتى ەسكەرە وتىرىپ، كەزەڭ-كەزەڭىمەن شەشىلەتىن بولادى. ەڭ الدىمەن ەلدەگى ەپيدەميولوگيالىق جاعداي جاقسارۋى، ەكىنشىدەن، حالىقارالىق اۋە، اۆتوبۋس جانە تەمىر جول قاتىناستارىن جاڭارتۋ مۇمكىندىگى مەن شارتتارى قولعا الىنۋى، ۇشىنشىدەن، ساپار جوسپارلانعان ەلدەردەگى ەپيدەميولوگيالىق جاعدايدىڭ تۇراقتالۋى كەرەك. بۇگىندە وسىنداي شەشىمدەرگە تۇركيا مەن وڭتۇستىك كورەيا ەلدەرى جۇگىنىپ وتىرعان كورىنەدى.

2020 جىلدىڭ 10 شىلدەسىنە دەيىن شەتەلدىكتەر مەن ازاماتتىعى جوق ادامدار قانداي دا ءبىر قوسىمشا قۇجاتتاردى رەسىمدەمەي رەسپۋبليكادان تىس جەرلەرگە شىعا الادى. بۇل تۋرالى ا.الدوڭعاروۆ مالىمدەدى. ايتا كەتەيىك، ەلىمىزدە توتەنشە جاعداي رەجىمى اياقتالعان كۇنى ەل اۋماعىندا مارتەبەسى رەتتەلمەگەن 145 مىڭعا جۋىق شەتەل ازاماتى بولعان ەدى. بۇگىندە ولاردىڭ 33 441-ءى قازاقستاننان كەتىپ، 4 مىڭ شەتەلدىك ازامات ۆيزا الىپ ۇلگەردى. 17 205 شەتەلدىككە ۋاقىتشا تۇرۋعا رۇقسات بەرىلسە، 78525 ەڭبەك ميگرانتىنىڭ ءالى دە ءوز جۇمىسىن جالعاستىرۋىنا بولادى.

– كوشى-قون بولىمشەلەرىندە تۇسىنبەۋشىلىك تۋىنداماۋى ءۇشىن شەت ەل ازاماتتارىن قازاقستاندا بولۋ مارتەبەسىن تەزىرەك زاڭداستىرۋدى، كەيىنگە قالدىرماۋدى سۇرايمىن. الداعى ۋاقىتتا ءوز مارتەبەسىن رەتتەمەگەن شەتەلدىكتەر مەن ولاردى قابىلدايتىن تاراپتارعا قۇقىقتىق ىقپال ەتۋ شارالارى قولدانىلاتىنىن ەسكەرتەمىن، – دەدى ا.الدوڭعاروۆ.