وسى ورايدا وتكەنگە وي تاستاي وتىرىپ نۇرسۇلتان ءابىش ۇلىنىڭ رۋحانيات سالاسىنا سىڭىرگەن وراسان زور ەڭبەگىنە قاتىستى ءوز كوزقاراسىمىزدى بىلدىرگىمىز كەلەدى.
وزگە ەلمەن تەرەزەسى تەڭ, كەرەگەسى كەڭ قازاقستاننىڭ بارلىق جەتىستىكتەرى ەلباسىنىڭ ەسىمىمەن تىكەلەي بايلانىستى ەكەنى بارشاعا ايان. مىنە, ەگەمەن ەل اتانعانىمىزعا دا 30 جىلدىڭ ءجۇزى بولىپ قالدى. وسى جىلدار ارالىعىندا مەملەكەتتىك ينستيتۋتتاردى قالىپتاستىرۋ, نارىقتىق ەكونوميكانى دامىتۋ, زاماناۋي ساياسي جۇيە قۇرۋ, ءتيىمدى الەۋمەتتىك ساياسات جۇرگىزۋ, قازاقستاندىقتاردىڭ ءال-اۋقاتىن ارتتىرۋ جانە قوعامدىق سانانى جاڭعىرتۋ ءۇشىن وراسان زور جۇمىستار اتقارىلدى.
ەلباسى ساياساتىنىڭ ارقاسىندا ەلىمىز ۇلتتىق كودتىڭ نەگىزىن قۇرايتىن قازاق حالقىنىڭ ۇلتتىق بولمىسىن, ءتىلى مەن مادەنيەتىن دامىتۋدىڭ جاڭا دەڭگەيىنە كوتەرىلدى. سونىمەن بىرگە بارلىق ەتنوستىڭ ۇيلەسىمدى دامۋىنا جاعداي جاسالدى.
اسىرەسە تۇڭعىش پرەزيدەنت نۇرسۇلتان نازارباەۆتىڭ ەلىمىزدىڭ مادەنيەتىن اسقاقتاتۋداعى ءرولىن اتاپ كەتپەۋگە بولمايدى.
«ازاۋلىنىڭ ىستانبۇلدان نەسى كەم» دەگەندەي, قازاقستاننىڭ جاس ءارى كوركەم استاناسىنىڭ ىرگەسىن قالاپ, ساناۋلى ۋاقىتتا الەم تاڭدايىن قاقتىرعان ارۋ قالانى سالدىرعان ەلباسى وسى شاھاردىڭ توسىندە ۇلتتىق رۋحىمىزدى كوتەرۋ جاعىنان عانا ەمەس, ەلىمىزدى الەمگە تانىتۋىمەن قۇندى بولعان ۇلتتىق مۋزەي, «استانا وپەرا», «استانا بالەت» تەاترلارىن جانە تالانتتاردىڭ باعىن اشاتىن باسقا دا ۇلكەن مادەني وشاقتاردىڭ اشىلۋىنا مۇرىندىق بولدى.
سونىڭ بىرەگەيى نۇرسۇلتان نازارباەۆتىڭ يدەياسى مەن قولداۋى ارقىلى سالىنعان قازاق ۇلتتىق حورەوگرافيا اكادەمياسى. اكادەميا – ەلىمىزدە جانە ورتالىق ازيا وڭىرىندە سۇرانىسقا يە جانە قازاقستاننىڭ بي ونەرىن حالىقارالىق دەڭگەيگە شىعاراتىن حورەوگرافيالىق ونەر قايراتكەرلەرىن كوپ دەڭگەيلى دايارلاۋدى جۇزەگە اسىراتىن بىرەگەي ءبىلىم, عىلىمي-شىعارماشىلىق ورتالىق.
2016 جىلى اكادەميانىڭ اشىلۋ سالتاناتىنا قاتىسىپ, وسكەلەڭ ۇرپاققا اق جول تىلەگەن ەلباسى بۇل اكادەميانىڭ بۇكىل ورتالىق ازيا ەلدەرى اراسىندا وسى ۇلگىدەگى العاشقى جوعارى وقۋ ورنى ەكەنىن اتاپ وتكەنى ەسىمىزدە.
«بۇگىن ءبىز استانادا جاڭا ونەر ورداسىن سالتاناتتى تۇردە اشىپ وتىرمىز. بۇل جەردە ۇلتتىق بالەت پەن بي شەبەرلەرىنىڭ جاڭا شوعىرى وقىپ-تاربيەلەنەدى. مۇندا قازاقستاندىق سالت-ءداستۇر دامىپ, الەمدىك دەڭگەيدەگى بي ونەرىن دامىتۋعا جاڭاشا قادامدار جاسالدى. ۇلتتىق حورەوگرافيا اكادەمياسى – ءبىزدىڭ ەلىمىزدە عانا ەمەس, بۇكىل ورتالىق ازيا ەلدەرىندەگى وسى ۇلگىدەگى العاشقى جوعارى وقۋ ورنى. وندا قازاقستاندىقتارمەن بىرگە وزگە شەتەلدەردىڭ شىعارماشىل دارىندى جاستارى وقيتىن بولادى. ەلىمىزدەگى بۇل اكادەميا ۋاقىت وتە كەلە بۇكىل ەۋرازياداعى بالەت پەن بي شەبەرلەرىن دايىندايتىن جەتەكشى ورتالىقتاردىڭ ءبىرى بولاتىنىنا سەنەمىن», دەدى تۇڭعىش پرەزيدەنت – ەلباسى ن.نازارباەۆ.
قازاق ۇلتتىق حورەوگرافيا اكادەمياسىنىڭ شاكىرتتەرى دە وزدەرىنە جۇكتەلگەن زور سەنىمدى اقتاپ, «استانا بالەت» جانە «استانا وپەرا» سەكىلدى حالىقارالىق دەڭگەيدە تانىلعان تەاتر ساحنالارىندا تابىستى ونەر كورسەتىپ, تالاي حالىقارالىق فەستيۆالدار مەن كونكۋرستاردا ەلىمىزدىڭ اتىن اسقاقتاتىپ ءجۇر.
جاڭا حورەوگرافيا مەكتەبى الەمدىك كلاسسيكالىق بالەت مۇراسىمەن قاتار قازاقتىڭ حالىق ءبيىن دامىتۋمەن اينالىسىپ, تاۋەلسىز قازاقستاننىڭ ەڭ تالانتتى جاستارىنىڭ جىگەرىن جاندىرىپ, قايراتىن قايراپ بۇگىنگى تاڭدا قىزۋ جۇمىستىڭ قازانىندا قايناپ جاتقانى بار.
ۇلت مادەنيەتى مەن رۋحانياتىنىڭ ۇلى جاناشىرىنا اينالعان ەلباسى نۇرسۇلتان نازارباەۆتىڭ جان-جاقتى قولداۋى ۇلان-عايىر دالامىزدىڭ تۇكپىر-تۇكپىرىندەگى ۇل-قىزداردىڭ باعىن اشۋدا.
مىنە, مەرەيتوي يەسى اتانىپ وتىرعان ساڭلاق ساياساتكەردىڭ ءبىر عانا مىسال نەگىزىندەگى سۇبەلى ەڭبەگىن كورىپ وتىرسىزدار. ال مۇنداي رۋحاني شاڭىراقتار ەلىمىز بويىنشا بارشىلىق قوي.
ء«بىر جىلدىعىن ويلاعان حالىق بيداي ەگەدى,
ءجۇز جىلدىعىن ويلاعان حالىق اعاش ەگەدى,
مىڭ جىلدىعىن ويلاعان حالىق سانالى ۇرپاق تاربيەلەيدى», دەگەن دانا قازاقتىڭ اتالى ءسوزى بار.
سوندىقتان سانالى ۇرپاقتىڭ ساپالى تاربيەسىنە جول اشقان ەلباسى نۇرسۇلتان نازارباەۆتىڭ ەسىمى مىڭجىلدىقتار توعىسىندا ماڭگىلىك قالا بەرمەك.
بيبىگۇل ءنۇسىپجانوۆا,
قازاق ۇلتتىق حورەوگرافيا اكادەمياسىنىڭ
ءبىرىنشى پرورەكتورى
