سارىعاش قالاسىنداعى مەدرەسەنىڭ ديرەكتورى ابدۋعاپار سمانوۆ قايتىس بولىپ, ونىڭ جانازاسىنا ءنوپىر حالىق قاتىسقانى جايلى بەينەماتەريالدى كورگەندە جان تۇرشىكتى. بىرىنشىدەن, جەلىدەن تاراعان اقپاراتتان جانە مارقۇمنىڭ سوڭعى دىبىس جازباسىنان ونىڭ الەمگە تاراعان ىندەت تىرناعىنا ءىلىنىپ قينالىپ جاتقانىن ەستىدىك. ياعني سمانوۆ مارقۇم COVID-19 دەرتىنەن قايتىس بولعان. ءتارتىپ بويىنشا مۇردە تۋىسقاندارىنا بەرىلگەنىمەن ۇيگە اپارىپ جۋىندىرۋعا بولمايدى دا, دەنەنى اۋرۋحانادان بىردەن زيراتقا الىپ كەتىپ جەرلەۋ ءلازىم. جانە مۇنداي جاعدايدا سىرتىنان قارا قاپشىق كيگىزىلىپ, زارارسىزداندىرىلىپ بارىپ, بارلىق ساقتىق تارتىپتەرى بۇلجىماي ورىندالۋى ءتيىس. ال مارقۇمنىڭ جانازاسىندا حالىق توبەسىنە قويىپ, سوڭعى ساپارعا شىعارىپ سالعان بەينەجازبادان مۇنىڭ ءبىرىنىڭ ساقتالماعانىن كورەمىز. ەكىنشىدەن, قازىر جەر-جەردە تۋىستارىن جوعالتقان ادامدار, COVID-19-دان ەمەس, پنەۆمونيادان نەمەسە باسقا ءبىر اۋرۋدان قايتتى دەپ مارقۇمداردى قارا جەر قوينىنا اتتاندىراردا سۇيەككە 7 ادام ءتۇسىرىپ ءمايىتتى جۋىندىرىپ, كەبىندەپ جونەلتۋدە. بۇل جەردە جۋىندىرعان جاندارعا اۋرۋ جۇقپاي ما؟
سارىاعاشتىق ءدىن وكىلى قايتىس بولعاندا سۇيەككە تۇسكەن ادامداردىڭ سول جانازاداعى ءنوپىر حالىقتىڭ ورتاسىندا جۇرگەنى انىق. ەندەشە اۋرۋ تارالۋىنىڭ باستى وشاعىنىڭ ءبىرى بۇگىندە جانازا بولۋدا.
كەشە الەۋمەتتىك جەلىدە ماڭعىستاۋلىق ءبىر اۋداننىڭ ازاماتتارىنىڭ جانازادا سۇيەككە ادام تۇسىرمەي, اقتىق ساپارعا تەك شاعىن عانا ادامداردىڭ شىعارىپ سالۋىن ۇندەگەن جازبا تارادى. وتە دۇرىس, ەل بولىپ قولدايتىن, ىندەتتىڭ ورشۋىنە توسقاۋىل قويۋدىڭ امالى دەپ سانايمىز.
وسى رەتتە ەلىمىزدىڭ دەنساۋلىق ساقتاۋ مينيسترلىگى بارلىق قالالار مەن كەنتتەردە, اۋىلدارداعى اۋرۋحانالاردا, جانە ۇيلەرىندە قايتىس بولعان ادامداردى جونەلتۋدىڭ ءراسىمىن ناقتىلاۋ قاجەتتىگى تۋادى. مارقۇمنىڭ اجالى تۋراسىنداعى كۋالىك-قۇجاتتا ۆيرۋس كەسىرىنەن قوزداعان مىناداي دەرتتەن كوز جۇمدى دەگەن انىقتاما بەرىلۋى جەدەل تۇردە قولعا الىنباسا, حالىقتى ىندەت قۇرىعىنان ساقتاۋ دەگەن بوس اڭگىمە, دالباسا بولىپ قالماقشى. ال قولدا قۇجات جوقتا جاقىندارى ەشتەڭەگە كونبەي, سۇيەككە ادام ءتۇسىرىپ, جانازاعا كوپشىلىكتىڭ قاتىسۋىمەن اۋرۋدىڭ ورشۋىنە كەڭ داڭعىل اشىلادى.
شۇعىل شارا قابىلدانۋى ءتيىس!
