اقوردا رەزيدەنتسياسىندا بىرقاتار مەملەكەتتىڭ جاڭادان تاعايىندالعان توتەنشە جانە وكىلەتتى ەلشىلەرىنىڭ قازاقستان پرەزيدەنتىنە سەنىم گراموتالارىن سالتاناتتى تۇردە تاپسىرۋ ءراسىمى ءوتتى.
مەملەكەت باسشىسىنا برازيليا فەدەراتيۆتىك رەسپۋبليكاسىنىڭ ەلشىسى رۋبەم انتونيو كوررەا باربوزا, ومان سۇلتاناتىنىڭ ەلشىسى مۇحاممەد بەن ابدۋللا بەن ساليح ءال-باحراني, كورەيا رەسپۋبليكاسىنىڭ ەلشىسى كۋ حونگ-سوك سەنىم گراموتالارىن تاپسىردى.
قاسىم-جومارت توقاەۆ ەلشىلەردى قازاقستانداعى ديپلوماتيالىق جۇمىستارىنىڭ باستالۋىمەن قۇتتىقتاپ, ولارعا تابىس تىلەدى.
"سىزدەردىڭ ەلدەرىڭىزبەن اراداعى قارىم-قاتىناسىمىز جوعارى دەڭگەيدە. وسى مۇمكىندىكتى پايدالانا وتىرىپ, سىزدەردىڭ مەملەكەتتەرىڭىزدىڭ باسشىلارىنا سالەم جولدايمىن. ەلدەرىمىز اراسىنداعى ءوزارا ىقپالداستىقتىڭ ودان ءارى دامۋىنا ۇلەس قوساسىزدار دەپ سەنەمىن. سىزدەر بۇكىل الەم پاندەميادان زارداپ شەگىپ جاتقان قيىن-قىستاۋ ۋاقىتتا ءبىزدىڭ ەلىمىزگە كەلدىڭىزدەر. قازاقستان بۇل قاۋىپتى دەرتتى جەڭۋ ءۇشىن دەر كەزىندە شەشىم قابىلداپ جاتىر. بۇل وڭاي جۇمىس ەمەس. بىراق ءبىز حالىقارالىق ىنتىماقتاستىققا ارقا سۇيەيمىز, بۇۇ-نىڭ ءىس-ارەكەتتەرىن قولدايمىز. سونىمەن قاتار الەمدەگى بارلىق ەل كۇش بىرىكتىرە وتىرىپ, اتالعان دەرتتى جەڭەدى دەپ ۇمىتتەنەمىز", – دەدى پرەزيدەنت.
