قالانىڭ باس سانيتار - دارىگەرى ءابدىماناپ تولەباەۆتىڭ ايتۋىنشا, شىمكەنتتىكتەردى ءدارى-دارمەكتەرمەن قامتاماسىز ەتۋ جانە دارىلەرگە قويىلعان شەكتى باعانىڭ ساقتالۋىنا تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى مونيتورينگ جۇرگىزىپ, باقىلاۋدا ۇستاپ وتىر ەكەن.
بۇگىندە دارىلىك زاتتاردىڭ 41 اتاۋى بويىنشا (2 ءىرى ءدارىحانا قويماسى: "نپو زەردە" جشس, "اقنيەت" جشس, شىمكەنت قالاسىنىڭ 3 ءىرى بولشەك جەلىسى "EUROPHARMA"جشس (30 ءدارىحانا), "زەردە فارما" جشس (35 ءدارىحانا), "مۇرات فارما" جشس (27 ءدارىحانا) 92 ءدارىحانادا دارىلىك پرەپاراتتارىنىڭ قالدىعى بار ەكەندىگى انىقتالىپ وتىر.
دارىلەر بولماعان جاعدايدا ءدارىحانا ۇيىمدارى قورلارىن تولىقتىرىلىپ جاتقانىن جەتكىزدى. كۇنى بۇگىنگە دەيىن ءدارى باعالارىنا بايلانىستى شەكتى باعادان اسقان جايت تىركەلمەگەن. ەگەر دە ونداي جايت انىقتالعان بولسا, دەپارتامەنتتىڭ بىرىڭعاي بايلانىس ورتالىعىنا حابارلاسىپ, چەكتى قوسا كورسەتۋ كەرەكتىگىن ايتادى.
مامانداردىڭ سوزىنشە, جرۆي مەن پنەۆمونيانىڭ حالىق اراسىندا كەڭ تارالۋى, قالا تۇرعىندارىنىڭ ءدارى-دارمەككە سۇرانىسىن ارتتىرىپ جىبەرگەن. دارىحانالارعا جەتكىزىلگەن دارىلەر 2 ساعاتقا جەتپەي تاۋسىلىپ كەتىپ جاتىر ەكەن. ماسەلەن, قىسقا ۋاقىت ىشىندە شىمكەنت ءدارىحانالارى 2 ايلىق قوردىڭ ءدارىسىن ساتىپ جىبەرگەن. دەسە دە, قويمالاردا دارىلەر ءالى دە بار. ءتىپتى سۇرانىسقا يە كەي دارىلەردى وزىمىزدە وندىرۋگە دە بولادى.
"قازىرگى تاڭدا شىمكەنتتەگى "138", "رەتسەپت", "تين" ءدارىحانالارى دارىلىك ەرىتىندىلەردى شىعارا الادى. سۇرانىس نەگىزىندە قىزمەتكەرلەر كۇشەيتىلگەن كۇن تارتىبىندە جۇمىس جاساۋدا. شەتەلدەن الىپ كەلىنەتىن دارىلەردىڭ دارىلىك قۇرالداردى ساراپتاۋ ۇلتتىق ورتالىعىندا ۇزاق ۋاقىت تۇرىپ قالۋدا. وسى تاراپتان قولداۋ كورسەتۋلەرىڭىزدى سۇرايمىز" - دەيدى "فارم" اسسوتسياسىنىڭ جەتەكشىسى حاديشا دەربەسقىزى.
قالا تۇرعىندارىنىڭ دارىلەردى شامادان تىس ساتىپ الۋى مامانداردى ۋايىمداتىپ وتىر. ويتكەنى, "پاراتسەتامول" سەكىلدى دارىلەردى ناۋقاس شامادان تىس كوپ ىشسە, اعزاسىنا كەرى اسەر ەتەتىن كورىنەدى. جيىندى قورىتىندىلاعان قالا باسشىسى فارم كومپانيا وكىلدەرىن اكىمدىكپەن بىرلەسە جۇمىس جاساۋعا شاقىردى.
"اكىمدىك تاراپىنان قاجەتتى كومەكتەر كورسەتىلەدى. ءدال قازىرگى تۇرعىنداردىڭ جاعدايىنا بايلانىستى بارشامىز كۇشەيتىلگەن كۇن تارتىبىندە جۇمىلا جۇمىس ىستەۋىمىز كەرەك", - دەدى ول.
