«تسيفرلىق قازاقستان» باعدارلاماسىن ىسكە اسىرۋ بويىنشا اتقارىلىپ جاتقان جۇمىستار تۋرالى تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى ا. جۇماعاليەۆ, «يندۋستريا 4.0» ەلەمەنتتەرىن جانە «مودەلدىك تسيفرلىق فابريكالار» جوباسىن دامىتۋ تۋرالى يندۋستريا جانە ينفراقۇرىلىمدىق دامۋ ءمينيسترى ب. اتامقۇلوۆ, مۇناي-گاز جانە ۋران سالالارىن تسيفرلاندىرۋ تۋرالى ەنەرگەتيكا ءمينيسترى ن. نوعاەۆ, مەملەكەتتىك ورگاندار جۇمىسىنداعى قاعازداعى قۇجات اينالىمىن شەكتەۋ تۋرالى مادەنيەت جانە سپورت ءمينيسترى ا. رايىمقۇلوۆا باياندادى.
2018-2019 جج. «تسيفرلىق قازاقستان» مەملەكەتتىك باعدارلاماسىن جۇزەگە اسىرۋدىڭ جالپى ەكونوميكالىق تيىمدىلىگى 802,5 ملرد تەڭگەنى قۇرادى, نەگىزىنەن ەلەكتروندىق كوممەرتسيانىڭ جانە ونىمەن ارالاس سالالاردىڭ بەلسەندى دامۋىنىڭ ارقاسىندا 120 مىڭ جۇمىس ورنى قۇرىلدى. «تسيفرلىق قازاقستان» اياسىندا 58 زاڭ مەن 11 كودەكستىڭ 700 نورماسىنا وزگەرىستەر مەن تۇزەتۋلەر ەنگىزىلدى.
بۇۇ رەيتينگىندە قازاقستان ەلەكتروندىق ۇكىمەتتى دامىتۋ بويىنشا 39-ورىندى, «ونلاين قىزمەت كورسەتۋ» ينديكاتورى بويىنشا 26-ورىندى, كيبەرقاۋىپسىزدىك دەڭگەيى بويىنشا 40-ورىندى يەلەندى. قازاقستان ينتەرنەتكە قولجەتىمدىلىك بويىنشا الەمدەگى كوشباسشىلاردىڭ ءبىرى — قر-دا 1 گب قۇنى $0,49, حالىقتى قامتۋ – 84,2% قۇرايدى, ال مىسالى, ۋكراينادا اتالعان كورسەتكىشتەر – $0,51/62,5%, قىتايدا – $9,89/61,2%, اقش-تا – $12,37/87,3%. قازاقستان حالقىنىڭ تسيفرلىق ساۋاتتىلىق دەڭگەيى 82,1%-عا جەتتى. ەلىمىزدە مەملەكەتتىك قىزمەتتەردىڭ 83,7%-ى ونلاين-رەجيمدە كورسەتىلەدى, 7 مىڭعا جۋىق اT-كومپانيا تىركەلگەن.
كاسىپورىنداردا «مودەلدى تسيفرلىق فابريكالاردى» اشۋ جۇمىستارى جۇرگىزىلۋدە, بۇل ەڭبەك ونىمدىلىگىن 25%-عا, رەسۋرس تيىمدىلىگىن 18%-عا, جابدىقتىڭ قىزمەت ەتۋ مەرزىمىن 5%-عا ارتتىرۋعا, وندىرىستىك شىعىنداردى 20%-عا, ەڭبەك شىعىندارىن 30%-عا, ەنەرگيا شىعىندارىن 35%-عا تومەندەتۋگە مۇمكىندىك بەرەدى. مىسالى, وسىنداي تسيفرلىق فابريكالار «كەنتاۋ ترانسفورماتور زاۋىتى» اق, «Eurasian Foods» اق, «الماتى جەلدەتكىشتەر زاۋىتى» جشس, «حيمفارم» اق, «Karlskrona» جشس, «التىنالماس» اق جانە «بال تەكستيل» جشس-دە اشىلدى.
«تسيفرلىق قازاقستان» مەملەكەتتىك باعدارلاماسىن ودان ءارى وزەكتى ەتۋ اياسىندا ءارتۇرلى سالالاردا 10 تەحنولوگيالىق پلاتفورمانى ەنگىزۋ جوسپارلانعان, اتاپ ايتساق: Govtech, Smart city, Industry 4.0, Agritech, Blockchain, Space-Geotech, AI (جاساندى زەردە), E-Industry, Fintech, Greentech. ولار دايىن تەحنيكالىق ينفراقۇرىلىمدى, اشىق دەرەكتەردىڭ ۇلكەن ماسسيۆتەرىن, سونداي-اق وتاندىق اT-كومپانيالار مەن ستارتاپتار ءۇشىن ازىرلەۋ جانە تالداۋ جۇيەلەرىن شوعىرلاندىرادى.
وتىرىسقا قاتىسۋشىلار روبوتتاردى, ۇلكەن دەرەكتەردى جانە جاساندى زەردەنى قولدانا وتىرىپ, ءوندىرىس پروتسەستەرىن اۆتوماتتاندىرۋعا باعىتتالعان «يندۋستريا 4.0» تەحنولوگيالىق پلاتفورماسىن دامىتۋ ماسەلەسىنە ەرەكشە كوڭىل ءبولدى.
پلاتفورما قارجىلىق, اقپاراتتىق سەرۆيستەردى, ساۋدا الاڭدارىن جانە تەحنولوگيالار ترانسفەرتى جۇيەلەرىن, ءبىرىنشى كەزەكتە تاۋ-كەن مەتاللۋرگيالىق جانە وتىن-ەنەرگەتيكا كەشەندەرى, وڭدەۋ ونەركاسىبى كاسىپورىندارى ءۇشىن بىرىكتىرەدى. ونى قۇرۋ اياسىندا Smart Industry Management تالدامالىق بازاسىن ەنگىزۋ, سالانىڭ ءىرى كاسىپورىندارىمەن كورپوراتيۆتىك يننوۆاتسيالار جۇيەسىن دامىتۋ جانە باسقا دا شارالار قابىلداۋ جوسپارلانعان.
ۇكىمەت باسشىسى يندۋستريا جانە ينفراقۇرىلىمدىق دامۋ مينيسترلىگىنە ءبىر اي مەرزىمدە يندۋستريا 4.0 ەلەمەنتتەرىن دامىتۋ جانە «مودەلدى تسيفرلىق فابريكالار» جوباسىن كەڭەيتۋ بويىنشا رەتتەۋشى جانە ىنتالاندىرۋشى شارالار كەشەنى بويىنشا ءىس-شارالار جوسپارىن ازىرلەۋدى تاپسىردى.
ەنەرگەتيكا مينيسترلىگىنە وسى جىلدىڭ سوڭىنا دەيىن كومىرسۋتەگى شيكىزاتى بويىنشا جەر قويناۋىن پايدالانۋ قۇقىعىن بەرۋگە اۋكتسيوندار وتكىزۋ جۇيەسىن ىسكە قوسۋدى قامتاماسىز ەتۋ, كەيىننەن پروتسەستىڭ بارلىق كەزەڭدەرىندە قاعاز فورماتىن شەكتەۋ, سونداي-اق شيكى مۇناي مەن گاز كوندەنساتىن ەسەپكە الۋدىڭ اقپاراتتىق جۇيەسىن ەنگىزۋدى جەدەلدەتۋ تاپسىرىلدى.
