ا. مامين كوروناۆيرۋس پاندەمياسىمەن كۇرەس جاعدايىندا حالىق دەنساۋلىعىن ساقتاۋ بويىنشا دەنساۋلىق ساقتاۋ جۇيەسىنىڭ الدىندا تۇرعان مىندەتتەردى شەشۋدىڭ ماڭىزدىلىعىن اتاپ ءوتتى.
مەملەكەت باسشىسى بۇرىنعى دەنساۋلىق ساقتاۋ ءمينيسترى ە. ءبىرتانوۆتى دەنساۋلىق جاعدايىنا بايلانىستى بەرگەن وتىنىشىنە سايكەس قىزمەتىنەن بوساتتى. ە. ءبىرتانوۆ وتستاۆكاعا كەتۋ تۋرالى بەرگەن وتىنىشىندە ءوزىنىڭ اۋىرۋىنا بايلانىستى جانە قوسىمشا ەمدەۋدى قاجەت ەتۋىنە وراي دەنساۋلىق ساقتاۋ سالاسىنا تولىققاندى باسشىلىق جاساۋ, اسىرەسە, ەپيدەميولوگيالىق جاعدايدىڭ اسقىنۋى جاعدايىندا قيىن بولىپ وتىرعانىن اتاپ ءوتتى. ول دەنساۋلىق ساقتاۋ ءمينيسترى قىزمەتىندە كۇندەلىكتى جۇيەلى جۇمىس ىستەپ, مينيسترلىكتىڭ بارلىق قۇرىلىمدارىنا تۇراقتى تۇردە قاتاڭ باقىلاۋ جانە شۇعىل باسقارۋ جۇمىستارى تالاپ ەتىلەتىنىن اتاپ ءوتتى.
الەكسەي ۆلاديميروۆيچ تسوي 1977 جىلى 2 ساۋىردە وڭتۇستىك قازاقستان وبلىسىندا دۇنيەگە كەلگەن. Sells College (لوندون), قازاقستان مەملەكەتتىك مەديتسينا اكادەمياسىنىڭ اسپيرانتۋراسىن, وڭتۇستىك قازاقستان مەملەكەتتىك مەديتسينا اكادەمياسىن, «دانەكەر» حالىقارالىق قۇقىق جانە حالىقارالىق بيزنەس ينستيتۋتىن, رف پرەزيدەنتى جانىنداعى رەسەي حالىق شارۋاشىلىعى جانە مەملەكەتتىك قىزمەت اكادەمياسىنىڭ كورپوراتيۆتىك باسقارۋ جوعارى مەكتەبىن تامامداعان. ستەنفورد ۋنيۆەرسيتەتىندە (اقش), سينگاپۋردا, ماسكەۋدە, گەرمانيادا, ۇلىبريتانيادا جانە ت. ب. ەلدەردە تاعىلىمدامادان وتكەن. ىسكەرلىك اكىمشىلىك دوكتورى, مەديتسينا عىلىمدارىنىڭ كانديداتى.
حيرۋرگ-ەندوسكوپيست بولىپ جۇمىس ىستەگەن, قالپىنا كەلتىرۋ حيرۋرگياسى جانە ترانسپلانتولوگيا ورتالىعىنىڭ اعا عىلىمي قىزمەتكەرى, ۇلتتىق عىلىمي مەديتسينا ورتالىعىنىڭ ىشكى مەديتسينا ورتالىعىنىڭ جەتەكشى عىلىمي قىزمەتكەرى, "ەۋروازياتتىق رەسپيراتورلىق قوعام" قوعامدىق بىرلەستىگىنىڭ باس حاتشىسى, قر پرەزيدەنتى ءىس باسقارماسىنىڭ زاماناۋي مەديتسينالىق تەحنولوگيالاردى ەنگىزۋ ورتالىعىنىڭ ديرەكتورى, قر پرەزيدەنتى ءىس باسقارماسىنىڭ مەديتسينالىق ورتالىعىنىڭ باسشىسى, استانا قالاسىنىڭ №1 قالالىق اۋرۋحاناسىنىڭ باس دارىگەرى, قر دەنساۋلىق ساقتاۋ جانە الەۋمەتتىك دامۋ ۆيتسە-ءمينيسترى, قر دەنساۋلىق ساقتاۋ ۆيتسە-ءمينيسترى قىزمەتتەرىن اتقارعان.
2019 جىلعى اقپاننان باستاپ قازاقستان رەسپۋبليكاسى پرەزيدەنتى ءىس باسقارماسىنىڭ مەديتسينالىق ورتالىعىن باسقاردى, 22 ماۋسىمدا دەنساۋلىق ساقتاۋ ءبىرىنشى ۆيتسە-ءمينيسترى بولىپ تاعايىندالدى.
