مۇحيتتار مەن تەڭىزدەردىڭ قولتىعىندا جاتقان سولتۇستىك باتىس جارتى شارداعى يسلانديا ارالىنىڭ ۇستىنەن ۇشاقپەن ۇشىپ بارا جاتقان ادام تومەندە قىستا بۋىرقانعان اشۋلى اقجال تولقىنداردى, ال جازدا شەكسىز دە شەتسىز الۋان بوياۋلى القاپتى كورەر ەدى. ءبىر قاراعاندا, ونىڭ كوزگە قوڭىرقاي ءتۇستى ءشول دالا بولىپ تا ەلەستەۋى مۇمكىن.
بىراق ول ءتىپتى دە ولاي ەمەس. يسلانديانىڭ دا وزىنە ءتان جەتى ءتۇرلى كەرەمەتى بار.
ەندىگى اڭگىمە مەن فوتو سولار تۋرالى بولماق.
№1 كەرەمەت: يسلاند جىلقىلارى
ەلدىڭ استاناسى - رەيكياۆيكتەن ءسال ۇزاپ شىققان ادامنىڭ كوزىنە ەڭ الدىمەن تاۋلارعا يەك ارتىپ جاتقان وراسان زور جازىق دالا مەن جولدار تۇسەدى. ال جازىقتا الاسا بويلى, جالى قالىڭ جىلقىلار ءورىپ جۇرەدى.
ەرتە-ەرتە, ەرتەدە, سوناۋ IX عاسىردا جاڭا جەر ىزدەپ, سولتۇستىك ەندىكتەردى شارلاپ ءجۇرىپ, وسى ارالدىڭ ۇستىنەن تۇسكەن ۆيكينگتەر مۇندا ەۋروپادان ەڭ الدىمەن جىلقىلار الا كەلىپتى. ولار ءارتۇرلى تۇقىمدى اتتار بولعان. ولاردىڭ اراسىندا نەمىستىڭ تەكتى جىلقىلارى دا, نورۆەگتەر مەن شۆەدتەردىڭ ءمىنىس اتتارى, ءتىپتى اعىلشىننىڭ ءپونيى دە كەزدەسكەن. قازىر يسلاند تۇقىمى بولىپ قالىپتاسقان بۇل جىلقىلاردىڭ وسى ءپونيدىڭ شاعىلىسۋىنان شىققان دەگەن پىكىر بار.
№2 كەرەمەت: مۇزدى شوعىرلار
يسلانديا مۇزدىقتارى وتە تومەن جاتادى دا مۇحيتقا ەمىنىپ تۇرادى. مۇزدى شوعىرلار – تەڭىزدەن ءبولىنىپ قالعان, وزىنشە تۇبەك سياقتى بولىپ قالىپتاسقان مۇزداقتى توبەلەر. ول جەردىڭ بەتىندەگى ايسبەرگ سياقتى. تولقىن ونىڭ ءبىر شەتىن كەمىرىپ قۇلاتىپ, ۇلى مۇحيت ايدىنىنا الىپ كەتىپ جاتادى. مۇنىڭ ورنىنا جاڭا مۇزدار قوسىلىپ, وسى جىنىستى ۇدايى قايتا ءتۇزىپ وتىرادى.
№3 كەرەمەت: ۆۋلكاندار مەن لاۆا الاڭدارى
يسلانديا ەكى پلاتفورمانىڭ – سولتۇستىك امەريكا مەن ەۋروپانىڭ قيىلىساتىن مۇيىسىندە تۇر. بۇل جەردە شامامەن ءار بەس جىلدا ءبىر رەت ۆۋلكانداردىڭ بۇرقىلداپ تۇراتىنى بەكەر ەمەس. جەردىڭ سىلكىنىسى ۇيرەنشىكتى قۇبىلىس ەسەپتى. يسلانديانىڭ بارلىق رەلەفى ۆۋلكانداردىڭ اتقىلاۋىنان پايدا بولعان. بۇل – ۆۋلكاندار مەن لاۆالاردىڭ ۇستىندە وتىرعان ەل. سوندىقتان دا توقتاۋسىز ءزىلزالا بولىپ تۇرادى. بۇل جەر قۇددى ءبىر تەربەتىلىپ تۇرعان الىپ بەسىك سياقتى.
№4 كەرەمەت: مۇزدىقتار مەن مۇز ۇڭگىرلەر
«يسلانديا» دەگەن ءسوزدىڭ ءوزى قازاقشاعا اۋدارعاندا, «مۇزدى جەر, مۇزدى ەل» دەگەن ماعىنانى بەرەدى. بىراق بۇعان قاراپ ارال تۇگەلدەي مۇزدىڭ ۇستىندە تۇر ەكەن, دەپ ويلاۋعا تاعى بولمايدى. مۇنداعى مۇزدىقتار جەردىڭ جالپى كولەمىنىڭ 10 پايىز بولىگىن عانا قۇرايدى. سوعان قاراماستان, يسلانديا – وتە كوركەم ارال. ونداعى مۇز ۇڭگىرلەردىڭ ءوزى – ءبىر الەم.
ەلدەگى مۇزدى ۇڭگىرلەر نەگىزىنەن سكافتافەتل ۇلتتىق ساياباعىندا ورنالاسقان.
№5 كەرەمەت: التىن سارقىراما ۇستىندەگى سولتۇستىك شۇعىلا
يسلانديا الپىس التىنشى پاراللەل بويىندا, ال ونىڭ سولتۇستىك بولىگى شىن مانىندە زاپوليارە بولىگىندە (الپىس التىنشى پاراللەل) ورنالاسقان. سوندىقتان مۇندا اۋا رايى تىمىق, اسپان اشىق كەزىندە سولتۇستىك شۇعىلانى كورۋگە بولادى.
№6 كەرەمەت: گەيزەرلەر
گۋلفوسس سارقىراماسى يسلانديانىڭ «التىن شەڭبەرىندە» جاتىر. بۇل ەلدەگىلەر «التىن شەڭبەر» دەپ رەيكياۆيككە جاقىن جەردەن, گەيزەرلەر جازىعىمەن وتەتىن شاعىن شەڭبەردى ايتادى.
«گەيزەرلەر جازىعى» - اسىرىڭقىراپ ايتىلعان اتاۋ. نەگىزىنەن ونى «گەيزەرلەر ساياباعى» دەسە دە بولادى. شىن مانىندە يسلانديادا گەيزەرلەر بارلىق جەرلەردە كەزدەسەدى. ولاردىڭ ءبارى يسلاندتاردىڭ «ۋىسىندا تۇر». جەرگىلىكتى تۇرعىندار گەيزەرلەردى سۋدى جىلىتۋ, ەلەكتر جارىعىن الۋ, كوكونىس وندىرىلەتىن جىلىجايدى قىزدىرۋ ءۇشىن پايدالانادى. سوندىقتان رەيكياۆيكتە كراننان اعاتىن سۋدىڭ كومىرسۋتەگى ءدامى بار. ونى ىشكەن ادام قالپاقتاي تۇسەدى. مۇنداعىلار سۋدى جىلىتۋ ءۇشىن ەمەس, ونى سۋىتۋ ءۇشىن ۋاقىت وتكىزەدى.
№7 كەرەمەت: سنايفەلسنەس تۇبەگى
وسى ءبىر سۇلۋ تۇبەك يسلانديانىڭ باتىس قاپتالىندا. بۇل جەردە ءبىر كۇننىڭ ىشىندە بۇكىل يسلانديادا كەزدەسەتىن قارا ۆۋلكان جاعاجايلارىن دا, ۆۋلكاننىڭ ءوزىن دە, سارقىرامالاردىڭ ءتۇر-ءتۇرىن دە كەزىكتىرەسىڭ. ءىس جۇزىندە تۇبەك لاۆا باسقان الاڭداردان قۇرالادى. ولاردىڭ جاستارى دا, ءتۇر-ءتۇسى مەن كەسكىن-كەلبەتتەرى دە ءار قيلى.
جازۋشى جيۋل ۆەرننىڭ ارقاسىندا بۇل جەردەگى ارناستاپي ۆۋلكانى جۇرتقا كەڭىنەن تانىمال بولىپ قالدى. قالامگەر ونى «جەر كىندىگىنە ساياحات» دەگەن كىتابىندا اتاپ وتكەن.
مىنە, ءبىزدىڭ يسلانديا جەرىنە شاعىن ساياحاتىمىز وسىمەن اياقتالدى.
