ماسەلەن, مەملەكەتكە 28 ملن تەڭگەدەن استام قارىزى بار ادام ۇستالدى. الماتى وبلىسى اۋماعىندا پوليتسيا قىزمەتكەرلەرى جەكە سوت ورىنداۋشىلارىنىڭ وڭىرلىك پالاتاسىنىڭ, مەملەكەتتىك كىرىستەر ورگاندارىنىڭ جانە ادىلەت دەپارتامەنتىنىڭ وكىلدەرىمەن بىرلەسىپ “بورىشكەر” جەدەل-الدىن الۋ ءىس-شاراسىن وتكىزىپ جاتىر. ءىس-شارانىڭ باستى ماقساتى – ايىپپۇلداردى, سالىق مىندەتتەمەلەرىن, اليمەنتتەردى جانە باسقا دا تولەمدەردى تولەۋدەن جالتاراتىن جۇرگىزۋشىلەردى انىقتاۋ.
جەدەل الدىن الۋ شاراسىنىڭ ءبىرىنشى كۇنىنىڭ جۇمىسى ناتيجەسى بويىنشا بورىشكەرلەردەن جالپى سوماسى 8 ملن.861 مىڭ تەڭگەگە 680 ايىپپۇل ءوندىرىلىپ الىندى. جەكە سوت ورىنداۋشىلارىنىڭ قاۋلىلارى نەگىزىندە جول قوزعالىسى سالاسىندا اكىمشىلىك ايىپپۇلدار بويىنشا ەلەۋلى قارىزدارى بار 13 اۆتوكولىك مامانداندىرىلعان تۇراقتارعا ورنالاستىرىلدى. تالدىقورعان قالاسىندا جالپى سوماسى 28 ملن 568 مىڭ تەڭگە كولەمىندە سالىق جانە اكىمشىلىك ايىپپۇلدارى بويىنشا بەرەشەگى بار گازەل اۆتوكولىگىمەن ر. ەسىمدى ادام ۇستالدى.
اتقارۋشىلىق قۇجاتتاردى ۋاقتىلى ورىنداماعانى ءۇشىن ونىڭ اۆتوماشيناسى مەملەكەتتىك كىرىستەر ورگاندارىنىڭ مامانداندىرىلعان تۇراعىنا ورنالاستىرىلدى. بۇدان وزگە, بورىشكەرلەردى اۋلالاردى ارالاۋ ارقىلى تەكسەرۋ جۇزەگە اسىرىلىپ جاتىر.
