بىلتىر كۇزدە تۇركىستان وبلىسىنىڭ ارىس قالاسىنان مەملەكەتتىك «ەڭبەك» باعدارلاماسى اياسىندا اياگوزگە كوشىپ كەلگەن وتباسى ءبىر ەمەس, ەكى بىردەي جىلىجاي اشىپ تاستاپتى. اينالدىرعان ەكى سوتىق جەردەگى جىلىجايدا وسىرىلگەن قيارلاردى ەشقانداي پيارسىز, جارناماسىز-اق قالا تۇرعىندارى ۇيدەن كەلىپ, وزدەرى الىپ كەتەدى ەكەن. «قيار كوشەتتەرىن ءساۋىردىڭ باسىندا وتىرعىزدىق, مامىر ايىنىڭ سوڭىنان باستاپ اقىرىنداپ ساتا باستادىق. ەكى جىلىجاي كۇنارا 25-30 كەلىگە دەيىن ءونىم بەرىپ جاتىر. اياگوزگە سىرتتان اكەلىنەتىن قيارلاردىڭ باعاسى 400 تەڭگە بولعاندىقتان, ءبىز دە وسى باعاعا توقتادىق. قانشا دەگەنمەن ءۇي قيارىنىڭ ءجونى بولەك قوي. سودان دا بولار, قازىر قيارلارىمىزعا سۇرانىس كوپ. جۇبايىم ەكەۋمىز كوكتەمدە 2 جارىم مىڭعا جۋىق قىزاناق كوشەتتەرىن ساتتىق. ءبىر تاڭعالعانىمىز, قىزاناق كوشەتتەرىن جارمەڭكەدە جارتى ساعات بولماي تالاپ الىپ كەتتى. 50 تەڭگەدەن بەردىك. بۇل جاقتا باعاسى جاقسى ەكەن. ايتپەسە وڭتۇستىكتە ەڭ جاقسى دەگەن كوشەتتەرىڭىز ەكى-ءۇش تەڭگەدەن ازەر وتەدى» دەيدى وتاعاسى, بەس بالانىڭ اكەسى تولەگەن بەكتۇرعانوۆ.
ەڭبەكقور وتباسىنىڭ جىلىجاي تۇرعىزۋىنا «باستاۋ بيزنەس» جوباسى ارقىلى بەرىلگەن 505 مىڭ تەڭگە قايتارىمسىز گرانتتىڭ سەپتىگى ءتيىپتى. تۇستىكتەن كەلگەن ازاماتقا اياگوز اۋداندىق اكىمدىگى دە قولداۋ ءبىلدىرىپ, جىلىجاي تۇرعىزۋ ءۇشىن 90 سوتىق جەر بەرىپتى. تولەگەن اعامىزدىڭ ەندىگى ويى سول جەردى جاقسىلاپ يگەرىپ, قىسى-جازى جۇمىس ىستەيتىن جىلىجاي سالۋ, كاسىبىن ودان ءارى كەڭەيتۋ. «نەگىزى جۇبايىم ەكەۋمىز باسقا وڭىرگە قونىس اۋدارۋدى بۇرىننان ويلاستىرىپ جۇرگەنبىز. بىلتىر ارىستا جارىلىس بولعاننان كەيىن وسى ويعا نىقتاپ بەكىندىك. ونىڭ ۇستىنە كىشكەنە قىزىمىز جارىلىستان كەيىن وزىنەن ءوزى شوشىناتىندى شىعاردى. ءالى دە بويىندا قورقىنىش بار. ءسويتىپ جۇرگەندە, شىعىستان ادامدار كەلىپ, ولارمەن سويلەسىپ, وسى جاققا كەلۋدى ۇيعاردىق. بۇل دا قازاقتىڭ ءبىر قاسيەتتى جەرى عوي» دەيدى كەيىپكەرىمىز.
تولەگەن اعامىزدىڭ جۇبايى مەيرامگۇل ىدىرىسوۆا «اياگوز قالاي ەكەن؟» دەگەن سۇراعىمىزعا «جەلى بىزبەن بىرگە تۇرىپ, بىرگە جاتادى ەكەن. كەيدە جەل قاتتى سوققاندا «بەكەر كەلدىك پە؟» دەپ ويلانىپ قالاسىڭ. سوسىن قايتا باسىلادى. اياگوزدىڭ جەلى قىزىق» دەپ ازىلدەي كەلە, اياگوز قالاسىنىڭ ارىسقا ۇقسايتىن تۇستارى كوپ ەكەندىگىن ايتتى. «توعىز جولدىڭ تورابىنداعى شاھار ەكەن اياگوز. پويىزى دا بار. اسكەري قالاشىق تا مۇندا بار ەكەن. ايتەۋىر, وزىمىزگە ۇناپ جاتىر. مەنىڭ نەگىزگى ماماندىعىم – حيميا ءپانىنىڭ مۇعالىمى. الايدا 10 جىلدان استام ۋاقىت بالا تاربيەسىمەن وتىرىپ, جۇمىس ىستەي المادىم. جەرگىلىكتى اكىمدىك ماعان جۇمىس جاعىنان كومەكتەسەمىز دەپ وتىر» دەيدى بەس بالانىڭ اناسى.
بەس بالا دەمەكشى, بالالارىنىڭ الدى قۇدىرەت بيىل اياگوزدەگى №1 مەكتەپتى ءبىتىرىپتى. وسى ءبىر جىل ىشىندە «اباي وقۋلارىنا» جانە روبوتوتەحنيكاعا قاتىسىپ, جاقسى ناتيجەلەرگە قول جەتكىزىپتى. ۆولونتەر بولىپ, جاستار ورتالىعىنان العىس حات الىپتى. قازىر كۇن-ءتۇن دەمەي ۇبت-عا دايىندالىپ جاتىر ەكەن. بۇگىندە جالدامالى ۇيدە تۇرىپ جاتقان وتباسى الداعى ۋاقىتتا وزدەرى ساتىپ العان جاڭا ۇيگە كوشەتىندىكتەرىن ايتادى. «قالاي بولاتىنىن ۋاقىت كورسەتەدى. قازىرگى جوسپارىمىز – اكىمدىك بەرگەن جەردى يگەرۋ. جولداسىم ەكەۋمىز جىلىجاي اشۋدى بۇرىننان ارماندايتىنبىز. ءبىر عانا ماسەلە, سول جەردى وڭدەۋگە قاراجاتىمىز جەتىڭكىرەمەي تۇر. اكىمدىك جەردى تەگىستەپ, سۋ, ەلەكتر تارتۋعا كومەكتەسسە, ءارى قاراي ءوزىمىز الىپ كەتەمىز عوي» دەيدى مەيرامگۇل ىدىرىسوۆا.
جالپى, «ەڭبەك» باعدارلاماسى اياسىندا اياگوز اۋدانىنا 2019 جىلى الماتى, تۇركىستان, قىزىلوردا وبلىستارىنان 18 وتباسى (63 ادام), 2020 جىلى الماتى وبلىسىنان 7 وتباسى (20 ادام) قونىس اۋدارىپتى.
شىعىس قازاقستان وبلىسى,
اياگوز اۋدانى
