قايرات دوساەۆتىڭ ايتۋىنشا, بۇگىندە وبلىستا ەڭبەككەرلەردىڭ جۇمىستان قىسقارتىلۋىنا, قۇقىقتارىنىڭ بۇزىلۋىنا جول بەرمەۋ ءۇشىن اكىمدىكتەر مەن كاسىپورىندار اراسىندا وندىرىستىك پروتسەستەردى تۇراقتاندىرۋ ماسەلەلەرى بويىنشا 8274 مەموراندۋم قابىلدانعان ەكەن. بۇل كورسەتكىش تىركەلىپ, جۇمىسىن جۇرگىزىپ جاتقان زاڭدى تۇلعالاردىڭ 90,1 پروتسەنتىن قۇرايدى. بۇل رەتتە بەردىبەك ساپارباەۆ كاسىپورىندار مەن مەكەمەلەردە ۇجىمدىق شارتتار مەن ۇشجاقتى مەموراندۋمداردىڭ جاسالۋىنا جانە ونىڭ ورىندالۋىنا باسا ءمان بەرىپ وتىر. بۇگىندە بۇل باعىتتا جۇمىستار جاندانىپ, ەلەكتروندى ەڭبەك شارتتارىن جاساۋعا كوشۋ تۋرالى تالاپتار دا قويىلىپ وتىر. "ۇجىمدىق شارت – جۇمىسشىلاردىڭ قۇقىعىن قورعايتىن بىردەن-ءبىر قۇجات. سوندىقتان ەڭبەك قاتىناستارىن رەتتەيتىن ۇشجاقتى كوميسسيا, كاسىپوداق ۇيىمى وڭىردەگى ءاربىر مەكەمەدە وسى شارتتىڭ جاسالۋىن قاداعالاپ, سوعان ىقپال ەتۋى ءتيىس. ءبىز كاسىپورىنداردى ارالاپ, باسشىلاردىڭ ءوز جۇمىسكەرلەرىنىڭ الدىندا ۇجىمدىق شارتتىڭ ورىندالۋى تۋرالى ەسەبىن تىڭداۋ ءۇردىسىن تاجىريبەگە ەنگىزۋىمىز كەرەك. مىنە, سوندا ەڭبەككەر ءوزىنىڭ قۇقىعى تۋرالى, ال باسشىلىق تاراپ ۇجىممەن جاساسقان شارتتاردى ورىنداۋ كەرەك ەكەنىن بىلەتىن بولادى", دەدى بەردىبەك ساپارباەۆ.
ماسەلەن, وتكەن 5 ايدا وبلىستاعى ەڭبەك ۇجىمدارىندا 44 ۇجىمدىق شارت جاسالىپ, ونىڭ بارلىعى دا ەڭبەك ينسپەكتسياسىنىڭ مونيتورينگىنەن وتكەن. باسقارما باسشىسىنىڭ ايتۋىنشا, وڭىرىمىزدە تىركەلىپ, جۇمىسىن جۇرگىزىپ جاتقان 9252 ۇيىمنىڭ 55,4 پايىزىندا باستى ەڭبەك شارتى قولدانىستا ەكەن.
الايدا وبلىستىق كاسىپوداقتار بىرلەستىگىنىڭ توراعاسى مەيرامبەك تولەپبەرگەن وڭىردەگى ەڭ ءىرى ءوندىرىس ورنى مويىنقۇم اۋدانىنداعى "اقباقاي" كەن ورنىنىڭ وسى تالاپتى ورىنداماي وتىرعانىن ايتتى. ال, تاراز قالاسىنىڭ اكىمى ايتقازى قارابالاەۆ وبلىس ورتالىعىنداعى مەيرامحانالاردا نەگىزىنەن كاسىپكەرلىك نىساننىڭ يەسى, ادمينيستراتور جانە ەسەپشىلەر عانا جۇمىسشى رەتىندە تىركەلگەندىكتەن, ونى ورىنداتۋ وڭايعا سوقپاي تۇرعانىن جەتكىزدى. دەگەنمەن, بۇل باعىتتا جۇمىستار جالعاسا بەرەدى. مويىنقۇم اۋدانىنىڭ اكىمى مادەن مۇساەۆ اتالعان كەن ورنىنىڭ الماتى وبلىسىندا تىركەلگەن كاسىپورىن ەكەنىن, ول وڭىردە جۇمىس ىستەپ تۇرعان ءوندىرىس ورنى بولعاندىقتان, سالىق ءتۇسىمى وبلىس قازىناسىنا ءتۇسۋى ءۇشىن بىرقاتار جۇمىستار جۇرگىزىلگەنىن ايتتتى. الايدا اۋدان اكىمى ولاردىڭ ۇجىمدىق شارت جاساۋ تۋرالى تالاپتى ەسكەرمەي وتىرعانىنا توقتالدى. بەردىبەك ساپارباەۆ مويىنقۇم اۋدانىنا كەلەسى جولعى ءىسساپارىندا اتالعان كەن ورنىنىڭ باسشىلارىمەن ارنايى كەزدەسەتىنىن جەتكىزدى. سونىمەن قاتار, وبلىس اۋماعىندا جۇمىس ىستەيتىن كەز-كەلگەن ءوندىرىس ورنى, كاسىپكەرلىك نىسان جەرگىلىكتى اتقارۋشى ورگانداردىڭ تالاپتارىن ورىنداۋى ءتيىس ەكەنىن ەسكەرتتى.
جامبىل وبلىسى
