ەكونوميكا • 09 ماۋسىم، 2020

ەلىمىزدە اۋىل شارۋاشىلىعىنىڭ جالپى ءونىم كولەمى ارتتى

73 رەت كورسەتىلدى

اۋىل شارۋاشىلىعى ءمينيسترى ساپارحان وماروۆ پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا 2020 جىلعى قاڭتار-مامىرداعى ەلىمىزدىڭ اۋىل شارۋاشىلىعى دامۋىنىڭ قورىتىندىلارى تۋرالى باياندادى، - دەپ حابارلادى primeminister.kz.

بيىلعى 5 ايدىڭ قورىتىندىسى بويىنشا اۋىل شارۋاشىلىعى جالپى ءونىمىنىڭ كولەمى 2،2%-عا ۇلعايىپ، 934،4 ملرد تەڭگەنى قۇرادى.

"بۇل ءوسىم مال شارۋاشىلىعىنداعى ءونىم كولەمىنىڭ 2،3%-عا، ونىڭ ىشىندە سويىس سالماقتاعى ەتتىڭ 3،5%-عا، ءسۇتتىڭ 3،2%-عا ۇلعايۋى ەسەبىنەن قامتاماسىز ەتىلدى. وبلىستار كەسىندىسىندە جامبىل، قاراعاندى، اقمولا، باتىس قازاقستان، اقتوبە، سولتۇستىك قازاقستان، الماتى جانە تۇركىستان وبلىستارى رەسپۋبليكالىق تەمپتەن جوعارى بولدى"، — دەپ مالىمدەدى مينيستر.

سونداي-اق ءىرى قارا مال سانىنىڭ 4،1%-عا، قويدىڭ 2،8%-عا، جىلقىنىڭ 7،9%-عا، تۇيەنىڭ 4،4%-عا جانە شوشقانىڭ 1،5%-عا وسكەنى بايقالادى. وسىمدىك شارۋاشىلىعىندا 2020 جىلعى كوكتەمگى دالا جانە ەگىس جۇمىستارىن دەر كەزىندە جۇرگىزۋ ءۇشىن بارلىق قاجەتتى شارا قابىلداندى، بۇگىنگى كۇنى ەگىس جۇمىستارى تولىعىمەن اياقتالدى.

وبلىستار اكىمدىكتەرىنىڭ جەدەل اقپاراتى بويىنشا ەگىس الاڭدارى 237،7 مىڭ گەكتارعا ارتىپ،  22،5 ملن گەكتاردى قۇرادى.

ناتيجەسىندە ازىقتىق داقىلدارعا ارنالعان الاڭدار 312،1 مىڭ گەكتارعا، مايلى داقىلدار الاڭدارى 184،7 مىڭ گەكتارعا، باقشا داقىلدارىنا ارنالعان الاڭدار 7،4 مىڭ گەكتارعا، كوكونىس الاڭدارى 3،9 مىڭ گەكتارعا، كارتوپ الاڭدارى 2،5 مىڭ گەكتارعا ۇلعايدى.

"ساپالى جانە ۋاقتىلى جۇرگىزىلگەن ىلعالدىلىقتى ساقتاۋ شارالارى جانە ەگىس الدىندا جۇرگىزىلگەن توپىراقتى وڭدەۋ ارامشوپتەردى بارىنشا جويۋعا جانە توپىراقتىڭ ىلعالدىلىعىن ساقتاۋعا ىقپال ەتتى. ەگىس جۇمىستارى وڭتايلى مەرزىمدەردە جۇزەگە اسىرىلدى، ناتيجەسىندە ەگىن بىركەلكى جانە تولىعىمەن شىقتى. فەرمەرلەر دەر كەزىندە جەڭىلدەتىلگەن جانارمايمەن، ساپالى تۇقىمدارمەن، تىڭايتقىشتارمەن، تەحنيكامەن قامتاماسىز ەتىلدى"، - دەدى س. وماروۆ.

كەلەسى ماڭىزدى ءىس-شارا — ەگىستى فيتوسانيتاريالىق قورعاۋ. وسىمدىكتەردى قورعاۋ قۇرالدارىن ساتىپ الۋعا ىنتالاندىرۋ ءۇشىن اعىمداعى جىلى 37 ملرد تەڭگە كوزدەلگەن، بۇل 16،6 ملن ليتر پەستيتسيد سۋبسيديالاۋعا مۇمكىندىك بەرەدى.

"قازگيدرومەتتىڭ بولجامىنا سايكەس ماۋسىم ايىنداعى اۋانىڭ ورتاشا تەمپەراتۋراسى سولتۇستىك قازاقستان وبلىسىندا، قوستاناي، اقمولا، پاۆلودار وبلىستارىنىڭ سولتۇستىك بولىگىندە نورمادا بولادى، اقمولا وبلىسىنىڭ ورتا جانە وڭتۇستىك بولىكتەرىندە،  قاراعاندى، شىعىس قازاقستان وبلىستارىنىڭ كوپ جەرىندە، سونداي-اق پاۆلودار جانە قوستاناي وبلىستارىنىڭ وڭتۇستىگىندە نورمادان 1°س-قا جوعارى بولادى"، - دەپ اتاپ ءوتتى اۋىل شارۋاشىلىعى ءمينيسترى.

جوعارىدا كورسەتىلگەن وبلىستاردا جاۋىن-شاشىن مولشەرى نورمادا بولادى، قاراعاندى وبلىسىندا عانا نورمادان تومەن بولادى دەپ بولجانۋدا. بۇل فاكتورلاردىڭ بارلىعى قولايلى اۋا-رايى جاعدايىندا جانە ەگىن جيناۋ جۇمىستارىن وڭتايلى مەرزىمدەردە جۇرگىزگەن جاعدايدا جاقسى ءتۇسىم الۋدى بولجاۋعا مۇمكىندىك بەرەدى.

كورسەتىلگەن كەزەڭدە تاماق ونىمدەرى ءوندىرىسى 2،3%-عا ءوسىپ، 743،3 ملرد تەڭگەنى قۇرادى. بۇل رەتتە، شۇجىق ونىمدەرى ءوندىرىسىنىڭ 20،5%-عا، ماكاروننىڭ 16،1%-عا، سارى مايدىڭ 14،7%-عا، جارمانىڭ 13،5%-عا، ۇننىڭ 6،6%-عا، وسىمدىك مايىنىڭ 5،3%-عا، قىشقىل ءسۇت ونىمدەرىنىڭ 4،8%-عا، سىر مەن ىرىمشىكتىڭ 4،7%-عا وسكەنى بايقالادى.

اۋىل شارۋاشىلىعىنىڭ نەگىزگى كاپيتالىنا سالىنعان ينۆەستيتسيالار 14،3%-عا ۇلعايىپ، 145،1 ملرد تەڭگەنى، تاماق ونىمدەرى ءوندىرىسى 18،8%-عا ارتىپ،  28،5 ملرد تەڭگەنى قۇرادى.

5 ايدىڭ قورىتىندىسى بويىنشا وڭ ديناميكا بايقالادى. بۇل رەتتە سالانى دامىتۋ ءۇشىن ۇكىمەت جوسپارلانعان ناتيجەلەرگە قول جەتكىزۋگە مۇمكىندىك بەرەتىن قاجەتتى شارالاردى قابىلدادى.

سوڭعى جاڭالىقتار

ۇقساس جاڭالىقتار