ايماقتار • 03 ماۋسىم، 2020

شىمكەنتتىڭ باس پوليتسەيى ونلاين رەجيمدە حالىققا ەسەپ بەردى

55 رەت كورسەتىلدى

شىمكەنت قالاسى پوليتسيا دەپارتامەنتىنىڭ باستىعى پوليتسيا گەنەرال-مايورى ەرالى جۋماحانبەتوۆ وتكەن جىلمەن وسى جىلدىڭ 5 ايىنداعى دەپارتامەنتتىڭ حالىققا قىزمەت ەتۋ بارىسىندا اتقارىلعان جۇمىس  ناتيجەلەرى تۋرالى تۇرعىندارعا ەسەپ بەردى.

ەسەپتىك كەزدەسۋ كارانتيندىك ءىس-شارالارعا بايلانىستى پوليتسيا دەپارتامەنتىنىڭ فەيسبۋك جانە ينستاگرام پاراقشالارىندا تىكەلەي ەفير ارقىلى جۇزەگە استى.
 
اتالعان ونلاين رەجيمىندەگى ەسەپتىك كەزدەسۋ ازاماتتاردى قابىلداۋ، ولاردىڭ وزەكتى ماسەلەلەرىن شەشۋ الاڭى رەتىندە دە قاراستىرىلىپ، تىكەلەي ەفيردە جەلى قولدانۋشىلاردىڭ سۇراقتارىنا جاۋاپتار بەرىلدى.
 
ەرالى جۋماحانبەتوۆ - شىمكەنت قالاسى پوليتسيا دەپارتامەنتىنىڭ باستىعى، پوليتسيا گەنەرال-مايورى: «ەكى جىل قاتارىنان قازاقستان رەسپۋبليكاسىنىڭ ىشكى ىستەر ورگاندارىن جاڭعىرتۋ بويىنشا 2019-2021 جىلدارعا ارنالعان «جول كارتاسى» ىسكە اسىرىلۋدا. پوليتسيا حالىققا قىزمەت كورسەتۋدىڭ جاڭا ۇلگىسىنە كوشۋدە. ازاماتتاردىڭ قاۋىپسىزدىگىن قامتاماسىز ەتۋ ءۇشىن ساپالى قىزمەت كورسەتۋ باستى ناتيجە بولىپ تابىلۋدا. بۇل دەگەنىمىز «تىڭداۋشى مەملەكەت» تۇجىرىمداماسىن ىسكە اسىرۋدا تاعى ءبىر وزەكتى ماسەلە. مەن شىمكەنت پوليتسياسىنىڭ جۇمىسى تۋرالى قوعام پىكىرىنە مۇقيات قارايمىن. ءار قابىلداۋىمدا بولعان ازاماتتاردىڭ وزەكتى ماسەلەلەرىن شەشۋ ءبىز ءۇشىن ۇلكەن جاۋاپكەرشىلىك دەپ بىلەمىن.  2019 جىلى 724 ازامات جەكە قابىلداۋىمدا بولسا، وسى جىلى توتەنشە جاعدايعا قاراماستان  132 ازاماتتى قابىلداپ، وتىنىشتەرىن تياناقتى قاراپ، ءتيىستى شەشىمدەر قابىلدادىق. ماعان كەلگەن ازاماتتاردىڭ پوليتسياعا دەگەن العىس ءبىلدىرۋى تۋرالى وتىنىشتەرى دە وسىعان دالەل. الەۋمەتتىك جەلىدەگى تىركەلگەن پوليتسيا دەپارتامەنتىنىڭ سايتتارىنا ۇنەمى قالا تۇرعىندارى العىستارىن جازۋدا. ولاردىڭ كوبى قىلمىستى ءىزىن سۋىتپاي اشىپ، قوعامدىق ءتارتىپتى قامتاماسىز ەتۋدەگى ادال قىزمەتتەرىمىز ءۇشىن ارنالعان العىستار.ء بىزدىڭ جۇمىسىمىزعا بەي-جاي قاراماعانى ءۇشىن قالا تۇرعىندارىنا العىس بىلدىرەمىن! جىلدان جىلعا پوليتسياعا كومەكتەسۋگە دايىن ادامداردىڭ سانى ارتىپ كەلە جاتقانى ءبىز ءۇشىن جاقسى جەتىستىك. بۇنى وڭ ءۇردىس دەپ قولدايمىز. وتكەن مەرزىمدە قوعامدىق ءتارتىپتى ساقتاۋعا 118 پوليتسيانىڭ قوعامدىق كومەكشىسى، 78 قالا تۇرعىندارى قاتىستى. ولارمەن 258 قىلمىس اشىلىپ، 1229 اكىمشىلىك قۇقىقبۇزۋشى انىقتالدى. پوليتسيانىڭ جۇمىسىنا بەلسەندى ات سالىسقان 118 كومەكشى 3 ميلليونداي تەڭگەمەن،  5 ازامات ءىىم گراموتاسىمەن، 78 ازامات دەپارتامەنتتىڭ گراموتاسى جانە العىس حاتتارىمەن ماراپاتتالدى.
 
سونداي-اق،  2019 جىلى قىلمىستاردىڭ سانى 12،4%-عا تومەندەسە، وسى جىلى 5 ايدا بۇل كورسەتكىش     25،1%-عا ازايدى. جول قاۋىپسىزدىگىن قامتاماسىز ەتۋ ماقساتىندا پاترۋل پوليتسيا قىزمەتكەرلەرىمەن ءبىر جىلدا ماس كۇيدە كولىك جۇرگىزگەنى ءۇشىن 637  جۇرگىزۋشى ۇستالىپ، سوت شەشىمىمەن 3-جىلعا جۇرگىزۋ قۇقىعىنان ايىرىلسا، وسى جىلى 109 جۇرگىزۋشى سوت شەشىمىمەن 7-جىلعا جۇرگىزۋ قۇقىعىنان ايىرىلىپ، 15 تاۋلىككە قاماققا الىندى.
 
كوروناۆيرۋس ينفەكتسياسىن الدىن-الۋ جانە تارالۋىن بولدىرماۋ ماقساتىندا توتەنشە جاعدايدى قامتاماسىز ەتۋ ءۇشىن 148 ارنايى اۆتوكولىك، 1 مىڭ 800 قىزمەتكەرلەر مەن ساربازدار جۇمىلدىرىلدى.    
توتەنشە جاعداي كەزىندە قر ءىىم ەرلان تۇرعىنباەۆ رەسپۋبليكا بويىنشا 47 پوليتسيا قىزمەتكەرلەرىن ماراپاتتادى. ونىڭ 9-ى شىمكەنت قالاسى پوليتسيا دەپارتامەنتىنىڭ قىزمەتكەرلەرى. توتەنشە جاعداي كەزىندە ءىس-شارالاردى ورىنداۋ ماقساتىندا ءوز مىندەتتەرىن ادال، ابىرويمەن اتقارعان قىزمەتكەرلەردى اتاپ وتسەك، ول 2020 جىلى 16 ناۋرىزدا، ياعني توتەنشە جاعدايدىڭ ءبىرىنشى كۇنىندە نۇرسات مولتەك اۋدانىندا ورنالاسقان كوپ قاباتتى ءۇيدىڭ بالكون تەرەزەسىنەن ءوز ومىرىنە قول سۇعۋعا ارەكەت جاساعان تۇرعىندى قۇتقارعانى ءۇشىن ءىىم-ءنىڭ بۇيرىعىمەن قاراتاۋ اۋداندىق پوليتسيا باسقارماسىنىڭ ۋچاسكەلىك پوليتسيا ينسپەكتورلارى پوليتسيا كاپيتانى ەسەنكۋلوۆ مەدەت قانات ۇلىن «قۇقىق ءتارتىبىن قامتاماسىز ەتۋگە قوسقان ۇلەسى» مەدالى  جانە پوليتسيا اعا لەيتەنانتى چۋمانوۆ اسقار شەرالى ۇلىن «العىس حات» ماراپاتىنا يە بولدى.
 
2020 جىلى 26 ناۋرىزدا الىستان كەلە جاتقان پويىزدىڭ استىنا تەمىر جول رەلسىنە جاتپاقشى بولعان 17 جاسار ءجاسوسپىرىمدى ءبىر ءسات ويلانباستان باتىلدىق تانىتىپ، اجالدان امان الىپ قالعانى ءۇشىن ەڭبەكشى اۋداندىق پوليتسيا باسقارماسىنىڭ ءبىرىنشى ورىنباسارى پوليتسيا مايورى مايريحوۆ داۋرەن مىرزالي ۇلىن جانە جەرگىلىكتى پوليتسيا قىزمەتى ءبولىمىنىڭ باستىعى پوليتسيا مايورى ساگينباەۆ بيرجان ساگينباي ۇلىن، ۋچاسكەلىك پوليتسيا ينسپەكتورلارى پوليتسيا كاپيتانى تەمىر جانىبەك ومىربەك ۇلىن، پوليتسيا مايورى ابۋباكيروۆ داۋلەت ءباحىت ۇلىن ىىم-ءنىڭ تاراپىنان «قۇقىق ءتارتىبىن قامتاماسىز ەتۋگە قوسقان ۇلەسى» مەدالىمەن  ماراپاتتالدى.
 
ەلىمىزدەگى ىندەتتىڭ الدىن الىپ، حالىقتىڭ قاۋىپسىزدىگىن ساقتاپ، تارتىپپەن زاڭدىلىقتى قامتاماسىز ەتىپ قويماي ءوزىمىزدىڭ تاراپىمىزدان وتكىزىلىپ جاتقان «تازا قالا» اكتسياسىن جۇرگىزۋ بارىسىندا 200 استام پوليتسيا قىزمەتكەرلەرى ەرىكتى تۇردە قالانىڭ ايبەرگەنوۆ كوشەسىندە ورنالاسقان  5 ءۇيدىڭ، 8-ءشى مولتەك اۋدانىنداعى 3 ءۇيدىڭ اۋلالارىن تازارتىپ، ويىن الاڭىنداعى قۇرىلعىلاردى سىرلاپ، پودەزد الدىنداعى وتىرعىشتاردى قالىپقا كەلتىرۋ جۇمىستارى جۇرگىزىلىپ، سول اۋلاداعى ۇيلەردە تۇراتىن تۇرعىنداردىڭ  العىسىن  الدىق. قازىرگى كەزدە پوليتسيا تاراپىنان 16 مامىردان 16 ماۋسىمعا دەيىن «وزىمىزدىڭ پوليتسەي» اتتى ءىس-شارا جۇرگىزىلىپ جاتىر. ءىس-شارانىڭ باستى ماقساتى – ايماققا بەكىتىلگەن ءار ۋچاسكەلىك پوليتسيا قىزمەتكەرىن جەرگىلىكتى حالىقپەن تىعىز بايلانىستا بىرلەسە قىلمىسقا، قۇقىق بۇزۋشىلىققا قارسى توزبەۋشىلىك تانىتۋى.
 
ءبىزدىڭ باستى مىندەتىمىز قىلمىسپەن قۇقىق بۇزۋشىلىقتىڭ الدىن الۋداعى ادال جانە شىنايى جۇمىس اتقارۋ بولىپ تابىلادى.
سوڭعى جاڭالىقتار

NASA مارسكا قامداندى

تەحنولوگيا • كەشە

ۇقساس جاڭالىقتار