عىلىم سالاسىندا قارجىلاندىرۋدى 2025 جىلى ىشكى جالپى ءونىمنىڭ 1 پايىزىنا دەيىن جەتكىزۋ – وتاندىق عىلىمنىڭ جاڭا ساتىعا شىعۋىنا, باسەكەگە قابىلەتتى عىلىمي تۇجىرىمدار جاساپ, الەمدىك دەڭگەيدە جاڭالىقتار اشىپ, رۋحاني مۇرامىزدى نىعايتىپ, ەلدىڭ ەكونوميكاسىن كوتەرۋگە مۇمكىندىك بەرەرى ءسوزسىز.
ءبىز عىلىم سالاسىن جەتكىلىكسىز قارجىلاندىرۋدىڭ سالدارىنان, عىلىمعا كەلەتىن, جۇيەلى تۇردە زەرتتەۋ جۇمىستارىمەن اينالىساتىن جاس مامانداردىڭ سانىن ازايتىپ, ياعني ۇرپاقتار ساباقتاستىعىنىڭ اراسىن ءبىراز اجىراتىپ العانىمىز بەلگىلى. قيىن كەزەڭدەردە عىلىمعا بەيىم جاستار جالاقىنىڭ ازدىعى مەن الەۋمەتتىك تۇرعىدا جەتكىلىكتى قامتاماسىز ەتىلمەگەندىكتەن, باسقا سالاعا اۋىسۋعا ءماجبۇر بولدى. قازىر جاعداي باسقاشا, سوڭعى جىلدارى مەملەكەت تاراپىنان, عىلىمعا ەرەكشە دەن قويىلىپ, ونىڭ جۇيەلى تۇردە دامۋىنا ايرىقشا ءمان بەرىلىپ وتىر. ونى كەشەگى ۇلتتىق كەڭەستىڭ مازمۇنىنان كورىپ وتىرمىز.
بۇگىندە عىلىم سالاسى الەمدە عارىشتىق جىلدامدىقپەن دامۋدا. سول سەبەپتى جىل سايىن 100 عالىم مەن دوكتورانتۋرانى اياقتاعان زەرتتەۋشىلەرگە دۇنيە ءجۇزىنىڭ جەتەكشى زەرتتەۋ ورتالىقتارىنان تاعىلىمدامادان ءوتىپ, تاجىريبە الماسىپ, ونى وزىمىزدە قولدانىپ, جاڭالىق اشىپ, ەل يگىلىگىنە پايدالانۋعا جاعداي جاسالماق.
عىلىمي ىزدەنىستەر ۋاقىت پەن قاجىر-قايراتتى تالاپ ەتەدى. عالىمدار ناقتى ناتيجەلەرگە قول جەتكىزۋ ءۇشىن, باسقا ماسەلەلەرگە الاڭداماۋ قاجەت. پرەزيدەنتىمىزدىڭ دوكتورانتتار ستيپەندياسىن 150 مىڭ تەڭگەگە دەيىن ۇلعايتۋ جانە جاس عالىمدارعا ارنالعان گرانتتىق قارجىلاندىرۋدى جالعاستىرۋ بويىنشا تاپسىرماسى مىڭداعان ماماننىڭ الەۋمەتتىك جاعدايعا جالتاقتاماي, عىلىمي ىزدەنىستەرمەن باسىبايلى اينالىسۋىنا نەگىز بولادى.
سونداي-اق مەملەكەت باسشىسى ق.توقاەۆتىڭ وتاندىق عىلىم سالاسىن دامىتۋدا, ىرگەلى ىزدەنىستەرمەن اينالىساتىن عىلىمي-زەرتتەۋ ينستيتۋتتارىن قولداۋ, زەرتحانالاردى زاماناۋي قۇرالدارمەن جابدىقتاۋ, عىلىمدى قارجىلاندىرۋدا ۇلتتىق عىلىمي-تەحنيكالىق ماقساتتارعا باسىمدىق بەرىپ, بار كۇشتى مەديتسينالىق-بيولوگيالىق زەرتتەۋلەرگە, اۋىل شارۋاشىلىعى عىلىمىنا, «جاسىل» تەحنولوگيالارعا, جاساندى سانا مەن قۋات كوزدەرىن ۇنەمدەۋ سياقتى سالالارعا باسىمدىق بەرىپ, قارجىلاندىرۋدى 2025 جىلعا دەيىن 7 ەسەگە ءوسىرۋدى تاپسىرۋى عالىمداردىڭ بولاشاققا زور سەنىممەن قاراپ, وتاندىق عىلىمنىڭ دامۋىنا ۇلكەن سەرپىلىس بەرۋگە ىقپال ەتەدى.
نۇرلان سەيدىن,
«عىلىم ورداسى» باس ديرەكتورىنىڭ عىلىم جونىندەگى ورىنباسارى,
تاريح عىلىمدارىنىڭ كانديداتى
الماتى
