مينيسترلىك باسشىسى 2020 جىلى «ەڭبەك» مەملەكەتتىك باعدارلاماسىن جۇزەگە اسىرۋعا 176 ملرد تەڭگە قاراستىرىلعانىن, ونىڭ 71,5 ملرد تەڭگەسى ميكروكرەديتتەر مەن گرانتتارعا, 32,6 ملرد تەڭگە وقىتۋعا, 71,9 ملرد تەڭگە سۋبسيديالاناتىن جۇمىس ورىندارىنا جۇمىسقا ورنالاستىرۋعا جانە جۇمىس كۇشى بار ايماقتاردان جۇمىس كۇشى جەتىسپەيتىن ايماقتارعا كوشۋگە ارنالعان سۋبسيديالارعا باعىتتالاتىنىن ايتتى.
«جىل باسىنان بەرى 255 مىڭ ادام «ەڭبەك» مەملەكەتتىك باعدارلاماسىنىڭ قاتىسۋشىسى بولدى, ونىڭ ىشىندە 184 مىڭ ادام جۇمىسقا ورنالاستىرىلدى. مۇندا 99 مىڭ ادام تۇراقتى جۇمىسپەن قامتىلدى», - دەدى ءبىرجان نۇرىمبەتوۆ.
سونداي-اق, ول مەملەكەتتىك باعدارلاما اياسىندا 8 مىڭ اەك-كە دەيىنگى جەڭىلدەتىلگەن كرەديتتەر (كرەديت مەرزىمى 5 جىلدان 7 جىلعا دەيىن, پايىزدىق مولشەرلەمەسى - جىلدىق 6%), 200 اەك-كە دەيىنگى مولشەردە قايتارىمسىز گرانتتار بەرىلەتىندىگىن جەتكىزدى.
جىل باسىنان بەرى 6,1 مىڭ ادام بيزنەستى دامىتۋعا ميكروكرەديتتەر مەن گرانتتار الدى.
«مەملەكەتتىك باعدارلامادا جۇمىسسىزدارعا, اسىرەسە جاستارعا ەڭبەك نارىعىندا ءوز ورنىن تابۋعا كومەكتەسۋ ءۇشىن كاسىپتىك ءبىلىم بەرۋدىڭ بىرنەشە ءتۇرى قاراستىرىلعان. كوروناۆيرۋسقا بايلانىستى شەكتەۋلەرگە بايلانىستى وقۋ كۋرستارى ەندى باستالۋدا. جىل سوڭىنا دەيىن 100 مىڭنان استام جۇمىسسىز جان جاڭا كاسىپتەر مەن داعدىلاردى ۇيرەنۋگە مۇمكىندىك الادى», - دەپ تولىقتىردى ءبىرجان نۇرىمبەتوۆ.
سونداي-اق, مينيستر جىل باسىنان بەرى 84 مىڭ ادام سۋبسيديالاناتىن جۇمىس ورنىنا جۇمىسقا تارتىلعانىن اتاپ ءوتتى.
ەڭبەك ۇتقىرلىعىن دامىتۋ اياسىندا وڭتۇستىكتەن سولتۇستىك وبلىستارعا 666 وتباسى (2375 ادام) قونىس اۋداردى.
ەسكە سالايىق, جىل باسىنان بەرى ەلەكتروندىق ەڭبەك بيرجاسى ارقىلى 97 مىڭ ادام جۇمىس تاپتى, ونىڭ 46 مىڭى – تۇراقتى جۇمىس ورىندارىنا ورنالاستىرىلدى.
سونىمەن قاتار, قر ەڭبەك جانە حالىقتى الەۋمەتتىك قورعاۋ مينيسترلىگى, «Coursera» جاپپاي ونلاين ءبىلىم بەرۋ پلاتفورماسىمەن, 2020 جىلدىڭ سوڭىنا دەيىن 50 مىڭ جۇمىسسىز قازاقستاندىقتى تەگىن وقىتۋ تۋرالى كەلىسىمگە كەلدى.
ازاماتتار 298 كۋرس بويىنشا ءبىلىم الا الادى. جوباعا قاتىسۋ ءۇشىن رەسمي تۇردە جۇمىسسىز رەتىندە تىركەلۋ جەتكىلىكتى. Coursera.org سايتىنا تىركەلگەن كەزدە enbek.kz سايتىندا نەمەسە جۇمىسپەن قامتۋ ورتالىعىندا جۇمىسسىز رەتىندە تىركەلۋ كەزىندە كورسەتىلگەن ەلەكتروندىق پوشتانىڭ ادرەسىن قولدانعان ءجون.
