ەڭبەكمينىنىڭ باسشىسى ءى توقساننىڭ قورىتىندىسى بويىنشا ەكونوميكادا جۇمىسپەن قامتىلعاندار سانى 8,8 ملن ادامدى, جۇمىسسىزدىق دەڭگەيى – 4,8%-دى قۇراعانىن اتاپ ءوتتى.
ناۋرىز-ءساۋىر ايلارىندا كارانتيندىك شارالاردىڭ ەنگىزىلۋىنە بايلانىستى 4,2 ملن. قازاقستاندىق ۋاقىتشا جۇمىسىنان بوساتىلدى.
«ۇستىمىزدەگى جىلدىڭ 20 ساۋىرىندە كارانتيندىك شارالاردى جەڭىلدەتۋ باستالدى, بۇل كەزەڭ-كەزەڭىمەن جۇمىسقا ورنالاستىرۋعا مۇمكىندىك بەردى. ۇكىمەت تاراپىنان حالىقتىڭ جۇمىسپەن قامتىلۋىنا باسىمدىق بەرىلە وتىرىپ قابىلدانىپ جاتقان ەكونوميكانى قالپىنا كەلتىرۋ شارالارى اعىمداعى جىلعى شىلدە ايىنان باستاپ ەڭبەك نارىعىنداعى جاعدايدىڭ تۇراقتانۋىنا قول جەتكىزۋگە مۇمكىندىك بەرەدى», – دەدى ءبىرجان نۇرىمبەتوۆ.
ءمينيستردىڭ ايتۋىنشا, جىل سوڭىندا جۇمىسسىزدىقتىڭ بولجامدى دەڭگەيى 6,1%-دى قۇرايدى.
سونىمەن قاتار, ول اعىمداعى جىلى جۇمىسپەن قامتۋعا جاردەمدەسۋ شارالارىمەن 1 ملن. 220 مىڭ ادامدى قامتۋ جوسپارلانىپ وتىرعانىن اتاپ ءوتتى.
«ازاماتتاردىڭ باسىم بولىگى – 600 مىڭ ادام ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ «ەڭبەك» مەملەكەتتىك باعدارلاماسىن ىسكە اسىرۋ اياسىندا, جۇمىسپەن قامتۋدىڭ جول كارتاسى بويىنشا – 255 مىڭ ادام, باسقا دا مەملەكەتتىك باعدارلامالار بويىنشا (نۇرلى جول, نۇرلى جەر, يدمب, بجك 2020-2025 جانە ت.ب.) – 364 مىڭ ادام قامتىلاتىن بولادى», – دەدى ءبىرجان نۇرىمبەتوۆ.
