بۇگىن نۇر-سۇلتانداعى «TaxovichkoF Astana» كومپانياسى «بالالار كرەسلوسى» اكتسياسىن ىسكە قوسىپ, «اگۋشا» برەندى اۆتوپاركتى بالالار ورىندىعىمەن جابدىقتايتىنىن حابارلادى.
بۇدان بىلاي بالاسى بار ەلوردا تۇرعىندارى مەن قوناقتارى «TaxovichkoF Astana» تاكسيى ارقىلى قاتىناي الادى, بالالار كرەسلوسى تەگىن ۇسىنىلادى. ارنايى بالالار كرەسلوسى بار تاكسيدى TaxovichkoF Astana ءموبيلدى قوسىمشاسى, taxovichkof.kz سايتى نەمەسە + 7 (700) 00-15-800 بايلانىس ءنومىرى ارقىلى شاقىرۋعا بولادى.
«بۇگىنگى تاڭدا ءبىزدىڭ تاكسيىمىز نارىقتا «بالالار كرەسلوسى» اكتسياسىن تەگىن ىسكە قوسقان جالعىز مەكەمە. كولىكتەرى بالالارعا ارنالعان كرەسلومەن جابدىقتالعان جۇرگىزۋشىلەردىڭ بارلىعى ونى ورناتۋ, باپتاۋ بويىنشا قوسىمشا وقىتىلدى جانە بالالار مەن ولاردىڭ اتا-انالارىمەن ءتىل تابىسۋ ءۇشىن كونسۋلتاتسيا الدى», - دەدى «TaxovichkoF Astana» كومپانياسىنىڭ ديرەكتورى ولەگ فاتيۋحين.
نۇر-سۇلتاننىڭ تاسىمالداۋشىلار قاۋىمداستىعىنىڭ اتقارۋشى ديرەكتورى ساكەن حانحوجيننىڭ ايتۋىنشا, ورناتىلعان كرەسلولاردىڭ بارلىعى قاۋىپسىزدىك تالاپتارىنا ساي كەلەدى. قازىر نۇر-سۇلتان اكىمدىگى پوليتسيامەن بىرلەسىپ «قاۋىپسىز تاكسي» اكتسياسىن وتكىزۋدە.
«وسى ورايدا ءبىز بالالاردى جول ەرەجەسىنە ۇيرەتۋ ءۇشىن ارنايى وقۋ وتكىزەمىز. جۇرگىزۋشىلەرمەن جۇمىس ىستەپ, سالوندا ارنايى كرەسلو بولماسا بالالاردى تاسىمالداۋعا تىيىم سالىنعانىن ەسكەرتەمىز», - دەيدى قالالىق پوليتسيا دەپارتامەنتىنىڭ اعا ينسپەكتورى باۋىرجان توقجۇمانوۆ.
