حالىقارالىق بالالاردى قورعاۋ كۇنىن مەرەكەلەۋ اياسىندا ەلوردالىق جەتكىنشەكتەردى اۋقىمدى اكتسيالار, بايقاۋلار مەن چەللەندجدەر كۇتىپ تۇر. بيىل العاش رەت ءىس-شارالاردىڭ كوبى ونلاين-رەجيمدە وتەدى.
ءوزىنىڭ شىعارماشىلىق قابىلەتىن كورسەتكىسى كەلەتىندەر 65 اكتسيا مەن بايقاۋعا قاتىسا الادى.
اتاپ ايتقاندا, بالالاردىڭ كوركەم ونەر مەكتەبى 10-16 جاس ارالىعىنداعى بالالاردى «بارلىعى بالالار ءۇشىن» رەسپۋبليكالىق سۋرەت سالۋ بايقاۋىنا قاتىسۋعا شاقىرادى.
قاتىسۋشىلارعا كەلەسى تاقىرىپتار ۇسىنىلدى: «مەنىڭ بالالىق شاعىم», «مەنىڭ وتباسىم», «باقىت وتباسىدان باستالادى», «دەنساۋلىقتى قورعاۋ قۇقىعى», «بالا قۇقىعى – ادام قۇقىعى», «تابىستى بولۋ قۇقىعى», «قوعام بالالىقتى قورعايدى». بايقاۋدىڭ ناتيجەسى بويىنشا 25 ماۋسىمدا ونلاين كورمە وتەدى.
بۇدان بولەك, Instagram جەلىسىندە كۇنى بويى بالالار پسيحولوگى, ىشكى ىستەر ورگاندارىنىڭ وكىلدەرى, ءبىلىم سالاسىنىڭ ماماندارى, زاڭگەرلەر جانە ۇەۇ قاتىسۋىمەن تىكەلەي ەفير وتەدى. وندا اتا-انالار مەن بالالار قاجەتتى كەڭەس پەن قۇقىقتىق كومەك الا الادى.
قيىن جاعدايعا تاپ بولعان بالالاردى قولداۋ ورتالىعى جانە «SOS دەتسكايا دەرەۆنيا استانا» بالالار ءۇيىنىڭ تاربيەلەنۋشىلەرىن مەرەكەلىك باعدارلاما كۇتىپ تۇر. اتاپ ايتقاندا, «تسۆەتيك-سەميتسۆەتيك» كونتسەرتتىك باعدارلاماسى, «تسۆەتوچنىي پەرەپولوح» شىعارماشىلىق بايقاۋى (كوستيۋمدەر دەفيلەسى, بالالار جاساعان فلوريستيكالىق ونەر كورسەتىلىمى), ينتەللەكتۋالدىق جارىس, «كارتينانى بويا» بايقاۋى, اسفالتتا سۋرەت سالۋ جارىسى, سپورتتىق جارىستار مەن كوڭىلدى ويىندار, اۆتوگراف PARTY جانە فوتوسسەسيا, سونداي-اق بالالارعا ارنالىپ داستارحان جايىلادى.
ايتا كەتەيىك, جوسپارلانعان ءىس-شارالاردىڭ بارلىعى #NS_balalarkuni_bilim حەشتەگىمەن ونلاين رەجيمدە وتەدى.
