جاڭا پاتەرلەر كوبەيدى

ال قونىس تويىن تويلاعان تۇرعىندار جارقىراعان وسىنداي بيىك ۇيلەر بوي كوتەرگەن بۇل اۋدان ەندى استانا دەپ اتالسا دەگەن تىلەك ايتۋدا. جاز ايىندا اتالىپ وتەتىن ەلور­دا­نىڭ تۋعان كۇنىنە وراي تۇرعىندار وسىن­داي نيەت پەن پەيىل بىلدىرگەن بۇل اۋدان قازىر ۋسولكا دەپ اتالادى. بۇل ىقشام اۋدان وبلىس ورتا­لى­عى­نىڭ وڭتۇستىك بولىگىندە, ەرتىس وزە­نى­نىڭ جاعالاۋىندا ورنالاسقان. ياعني, 80-ءشى جىلداردان باستاپ تۇر­عىن ۇيلەر قۇرىلىسى بوي كوتە­رىپ, دۇكەندەر, مەكتەپتەر سالىنا باس­تادى. شەتكەرى اۋدان بولعاندىقتان قالاارالىق ترامۆاي جولىنا قو­سىل­عان, باعىتتاعى اۆتوبۋستاردا دا كەدەرگى جوق. كەيىنگى جىلدارى بۇل شاعىن اۋدانعا جاقسى كوڭىل ءبو­لىنۋ­دە. ەلىمىزدە قابىل­دان­عان مەم­لە­كەتتىك تۇرعىن ءۇي باعدار­لاماسىنا وراي جيىرماعا جۋىق ۇيلەر سا­لىن­دى. وتكەن جىلى ءبىراز كەشەۋىل­دە­گەن تۇرعىن ۇيلەردىڭ جاعدايى وبلىس اكىمى باقىتجان ساعىنتاەۆتىڭ  سىن تەزى­نە ءتۇسىپ, نازارعا الىنۋدىڭ ءنا­تي­جە­سىندە, باقىلاۋدىڭ, تالاپتىڭ ارقاسىندا تۇرعىندار جاڭا پاتەر­لەرگە يە بولدى. قۇرىلىس ءالى دە جالعاسۋدا. وسىدان ەكى جىل بۇرىن 1500 وقۋشىعا ارنالعان  قازاق ءتى­لىن­دە ءبىلىم بەرەتىن جاڭا  مەكتەپ, وسى ماقساتقا ارنالعان جاڭا بالا­باق­شا پايدالانۋعا بەرىگەن بولا­تىن. ەلباسى وبلىسقا كەلگەن ءبىر سا­پا­رىندا جارقىراپ ءوسىپ كەلە جات­قان وسى ءبىر شاعىن اۋداندى كورىپ, مەكتەپتى, بالاباقشانى ارالاپ بوبەكتەرگە سىيلىق  تارتۋ ەتكەن ەدى. بۇل كۇندەرى وسى جەردە جاڭا ەمحانا سالىنىپ, قۇرىلىسى ءبىتىپ دايىن تۇر. بىرنەشە ساۋدا دۇكەندەرى, اۋلا كلۋبتارى جۇمىس جاساۋدا. مىنە, جۋىردا عانا ءاز-ناۋرىزىمىز تابال­دىرىق اتتاعان كۇنى بۇل اۋدان تۇرعىندارى دا كوبەيدى. جا­ڭادان سالىنعان ۇيدەن 107 وتباسى پاتەر كىلت­تەرىن الدى. ياعني, بۇل پاتەرلەر قالا­لىق تۇرعىن-ءۇي كوميسسياسى­نىڭ شەشى­مى­مەن تالاي جىلدان بەرى كەزەكتە تۇرعان پاتەرگە اسا مۇقتاج مۇگەدەكتەرگە, زەي­نەت­كەرلەرگە, جەتىم بالالارعا, كوپ با­لا­لى انالارعا بەرىلدى دەگەن ءسوز.پاتەر كىلتتەرىن الۋ­عا جينالعان جۇرتشىلىقتى قونىس تويىمەن قۇتتىقتاعان وبلىس اكىمى باقىتجان ساعىنتاەۆ جىل اياعىنا دەيىن سوعىس ارداگەرلەرىنە جانە يپوتەكالىق جانە ارەنداعا بەرىلەتىن جاڭا ۇيلەردىڭ قۇرىلىسى اياقتالاتىنىن ايتىپ ءوتتى. فاريدا بىقاي. پاۆلودار.