جەرگىلىكتى اتقارۋشى ورگانداردىڭ قاراماعىنداعى ءمام بولىمدەرىنە قارايتىن ادامداردىڭ قۇقىقتارىنىڭ بۇزىلۋ فاكتىلەرى كەڭ قوعامدىق رەزونانس تۋدىردى. اياگوز بالالار ارناۋلى الەۋمەتتىك قىزمەت كورسەتۋ ورتالىعىنىڭ 4 تاربيەلەنۋشىسى قايتىس بولدى, اقمولا وبلىسىنداعى قارتتار ۇيىندە ولىممەن اياقتالعان كورونوۆيرۋستىڭ ءورشۋى, تۇركىستان وبلىسىنداعى پسيحونەۆرولوگيالىق اۋرۋلارى بار بالالارعا ارنالعان ورتالىقتا قامقورلىقتاعىلارعا قاتىگەزدىكپەن قاراۋ سياقتى بىرقاتار جۇيەلى پروبلەمالار انىقتالدى.
وسىعان بايلانىستى ۋاكىلەتتى مەملەكەتتىك ورگاندار قر باس پروكۋراتۋراسىمەن بىرلەسىپ 136 مەملەكەتتىك ءمام-گە كەشەندى تەكسەرۋلەر جۇرگىزەتىن بولادى.
بۇدان باسقا, جاقىن ارادا وبلىس اكىمدەرىنىڭ ورىنباسارلارىمەن بىرگە مەكەمەلەردىڭ جۇمىسىن ازاماتتىق بەلسەندىلەر, جۋرناليستەر, قوعامدىق قوزعالىستاردىڭ وكىلدەرى قاداعالايدى.
قامقورلىقتاعى ادامداردىڭ ءومىر ءسۇرۋ ساپاسىن جاقسارتۋ ءۇشىن قولدانىستاعى زاڭناماعا وزگەرىستەر ەنگىزۋ جوسپارلانۋدا.
ءمام جانىنان قوعامدىق كەڭەستەر قۇرىلادى, ولاردىڭ قۇرامىنا قامقورلىقتاعى ادامداردىڭ تۋىستارى مەن جاقىندارى, بەدەلدى سالالىق ساراپشىلار, اكىمدىكتەر جانىنداعى قوعامدىق كەڭەستەردىڭ مۇشەلەرى, ۇەۇ وكىلدەرى كىرەدى. ولار قىزمەت الۋشىلاردىڭ قۇقىقتارىنىڭ ساقتالۋىن, ونىڭ ىشىندە قولما-قول اقشانى باقىلاۋ شوتتارىنداعى قاراجاتتىڭ جۇمسالۋىن باقىلايتىن بولادى.
بارلىق ءمام تۋرالى اقپارات الەۋمەتتىك قىزمەتتەر پورتالىنىڭ دەرەكقورىنا ەنگىزىلەدى.
«مۇگەدەكتىگى بار ادامداردى الەۋمەتتىك قورعاۋ» پورتالىندا (inva.gov.kz) كەرى بايلانىسى بار مەكەمەلەردىڭ رەيتينگى جاسالاتىن بولادى, وندا ءاربىر ادام ءمام قىزمەتى تۋرالى پىكىر قالدىرا الادى.
بۇدان باسقا, قىزمەت الۋشىلارعا ينتەرنەتكە قولجەتىمدىلىك قامتاماسىز ەتىلەدى.
بارلىق مەكەمەلەردى بەينەكامەرالارمەن جابدىقتاۋ جوسپارلانىپ وتىر, ولار ارقىلى قامقورلىقتاعى ادامداردىڭ تۋىستارى بولىپ جاتقان وقيعالاردى ونلاين-رەجيمدە باقىلاي الادى.
سونداي-اق, عيماراتتى جوندەۋ جانە وڭالتۋ جابدىقتارىن, ارنايى كولىكتى جاڭارتۋ جوسپارلانعان.
جەرگىلىكتى اتقارۋشى ورگاندارعا شالعاي اۋداندارداعى مەكەمەلەردى ءىرى قالالار مەن وبلىس ورتالىقتارىنا كوشىرۋ ۇسىنىلدى.
الەۋمەتتىك قىزمەتكەرلەرگە ورتالىق قىزمەتكەرلەرىنە كومەك كورسەتەتىن ۆولونتەرلەر بەكىتىلەدى.
قابىلدانىپ جاتقان شارالاردىڭ كوبىسى حالىقارالىق تاجىريبەدە ستاندارتتى بولىپ تابىلاتىنىن ايتىپ وتكەن ءجون. مىسالى, الەۋمەتتىك قىزمەتتەردىڭ ساپاسىن دامىتۋ مەن باقىلاۋعا قوعامدىق قاتىسۋ ۇلىبريتانيادا, دانيادا, گەرمانيادا, فرانتسيادا, اقش-تا بار.
قارجىلىق ەسەپتىلىكتىڭ اشىقتىعى اۋستراليا, اقش-تىڭ جانە ەۋروپا ەلدەرىنىڭ كورپوراتيۆتى سەكتورىندا كەڭىنەن تارالعان.
قر ەڭبەك جانە حالىقتى الەۋمەتتىك قورعاۋ مينيسترلىگى جاقىن ارادا ءتيىستى نورماتيۆتىك-قۇقىقتىق اكتىلەرگە قاجەتتى وزگەرىستەر ەنگىزۋدى جوسپارلاپ وتىر.
ەستەرىڭىزگە سالا كەتەيىك, قازىرگى ۋاقىتتا 931 ۇيىم ارنايى الەۋمەتتىك قىزمەتتەردى كورسەتەدى. سونىڭ ىشىندە 136 مەملەكەتتىك ءمام بار, ولاردا 36 مىڭ ادام تۇرادى. ومىرلىك قيىن جاعدايدا جۇرگەن 8 ساناتتاعى ازاماتتار كورسەتىلەتىن قىزمەتتى الۋشىلار بولىپ تابىلادى.
