قازاقستان ۇكىمەتىنىڭ باسشىسى COVID-19 تارالۋىمەن كۇرەسۋ, ەكونوميكانى تۇراقتاندىرۋ, ءوندىرىستىڭ جاڭا قۇرىلىمىن قالىپتاستىرۋ, تۇرعىندار مەن بيزنەستى قولداۋ بويىنشا قازاقستاننىڭ قابىلداپ جاتقان شارالارى تۋرالى حابارلادى. بۇل رەتتە ول ۇلتتىق ەكونوميكا دەڭگەيىندە عانا ەمەس, تۇتاس تمد اياسىندا دا داعدارىسقا قارسى شارالاردى قابىلداۋدى ودان ءارى جالعاستىرۋدىڭ قاجەتتىگىن اتاپ ءوتتى.
پرەمەر-مينيستر ۇلتتىق ەكونوميكا اياسىندا دا, سونداي-اق بۇكىل دوستاستىق فورماتىندا دا داعدارىس كورىنىستەرىنە قارسى تۇراقتىلىق بۋفەرلەرىن ۇجىمدىق قالىپتاستىرۋدى تمد ءۇشىن نەگىزگى مىندەت رەتىندە اتادى. بۇل تۇرعىدا ۇكىمەت باسشىسى 2030 جىلعا دەيىنگى تمد ەكونوميكالىق دامۋ ستراتەگياسىن ازىرلەۋ بويىنشا جاسالىپ جاتقان جۇمىستاردى اتاپ ءوتتى, وندا ساۋدا, ونەركاسىپ, ەنەرگەتيكا, كولىك, ينفراقۇرىلىم, اگروونەركاسىپ كەشەنى, شاعىن جانە ورتا بيزنەس, تسيفرلاندىرۋ جانە باسقا دا ىنتىماقتاستىق سالالارى قامتىلعان.
«قالىپتاسىپ وتىرعان ديناميكانى ەسكەرە وتىرىپ, ەلدەرىمىزدىڭ ءوزىن-ءوزى قامتاماسىز ەتۋ فاكتورىن كۇشەيتۋ قاجەت. ەڭ الدىمەن, بۇل ازىق-ت ۇلىكپەن قامتاماسىز ەتۋ ماسەلەلەرىنە قاتىستى – ءبىز ونىمدەردى جەتكىزۋدىڭ تۇراقتىلىعى از جانە گەوگرافيالىق بىتىراڭقى تىزبەگىنە تاۋەلدىلىكتى تومەندەتۋىمىز كەرەك», — دەدى ا. مامين.
پرەمەر-مينيستر دوستاستىق ەلدەرىنىڭ پايداسى ءۇشىن تاۋارلار مەن قىزمەتتەر ساۋداسىنىڭ ءىرى ەكسپورتتىق جانە يمپورتتىق اعىندارىن قايتا باعدارلاۋ جونىندە شارالار قابىلداۋدىڭ, سىرتقى جانە ىشكى ينۆەستيتسيالاردى, الدىڭعى قاتارلى تەحنولوگيالاردى تارتۋ جۇمىستارىن كۇشەيتۋدىڭ, ترانزيتتىك ساۋداداعى كەدەرگىلەردى جۇيەلەۋدىڭ جانە ولاردى ازايتۋدىڭ, تمد-عا قاتىسۋشى ەلدەردىڭ ەكونوميكاسىنىڭ باسەكەلەستىك ارتىقشىلىقتارى نەگىزىندە وندىرىستىك پروتسەستەردى وڭىرلەندىرۋدىڭ قاجەتتىگىن اتاپ ءوتتى.
سونىمەن قاتار وتىرىسقا ازەربايجان پرەمەر-ءمينيسترى الي يدويات وگلۋ اسادوۆ, بەلارۋس پرەمەر-ءمينيسترى – سەرگەي رۋماس, مولدوۆا پرەمەر-ءمينيسترى – يون كيكۋ, رەسەي پرەمەر-ءمينيسترى – ميحايل ميشۋستين, تاجىكستان پرەمەر-ءمينيسترى – كوحير راسۋلزودا, وزبەكستان پرەمەر-ءمينيسترى – ابدۋللا اريپوۆ, ارمەنيا ۆيتسە-پرەمەر-ءمينيسترى مگەر گريگوريان, قىرعىزستان ۆيتسە-پرەمەر-ءمينيسترى ەركين اسرانديەۆ جانە تۇرىكمەنستان مينيسترلەر كابينەتىنىڭ توراعاسىنىڭ ورىنباسارى راشيد مەرەدوۆ قاتىستى.
وتىرىسقا قاتىسۋشىلار تمد اياسىنداعى ەكونوميكالىق ءوزارا ءىس-قيمىلدىڭ وزەكتى ماسەلەلەرىن, COVID-19 كوروناۆيرۋس ينفەكتسياسىنىڭ تارالۋىمەن كۇرەس جونىندەگى بىرلەسكەن كۇش-جىگەر, سونداي-اق 2030 جىلعا دەيىنگى تمد ەكونوميكالىق دامۋ ستراتەگياسىنىڭ جوباسىن تالقىلادى.
تمد ۇبك وتىرىسىنىڭ قورىتىندىسى بويىنشا قارۋلى كۇشتەر بايلانىسىنىڭ بىرلەسكەن (بىرىكتىرىلگەن) جۇيەسى تۋرالى, تمد جەلىلىك ۋنيۆەرسيتەتىن قۇرۋ جانە ىسكە قوسۋ تۋرالى كەلىسىمدەر, 2030 جىلعا دەيىن كولىك, جاستار ساياساتى, تۋريزم, سپورت, مادەنيەت جانە ت. ب. سالالارداعى ىنتىماقتاستىق ستراتەگياسى جانە باسىم باعىتتار تۋرالى شەشىمدەر قابىلداندى.
