جامبىل وبلىسىنىڭ اكىمى بەردىبەك ساپارباەۆ جاس مامانداردىڭ جۇمىسقا ورنالاسۋى جونىندە جيىن وتكىزدى. وتكەن جىلدان باستاپ وبلىستىق ەكونوميكا جانە بيۋدجەتتىك جوسپارلاۋ باسقارماسى بۇل باعدارلامانىڭ ۇيلەستىرۋشىسى بولىپ تابىلادى. اتالعان باسقارمانىڭ باسشىسى گۇلدانا جاۋىنبەكوۆانىڭ ايتۋىنشا, 2010-2019 جىلدار ارالىعىندا 3603 جامبىلدىق باعدارلاما قاتىسۋشىسى اتانىپ, ولار جالپى كولەمى 564,4 ميلليون تەڭگەنىڭ كوتەرمە جاردەماقىسىن العان. ونىڭ ىشىندە 1814 مامانعا 5,2 ميلليارد تەڭگەگە جەڭىلدەتىلگەن نەسيە بەرىلگەن. ءبىلىم بەرۋ سالاسىندا 1027, دەنساۋلىق ساقتاۋدا 347, اۋىل شارۋاشىلىعىندا 119, مادەنيەتتە 51, سپورتتا 40, الەۋمەتتىك قامسىزداندىرۋ سالاسىندا 6 مامان جۇمىسپەن قامتىلعان.
سونداي-اق, اعىمداعى جىلى 101 مامانعا 27,7 ميلليون تەڭگە مولشەرىندە كوتەرمە جاردەماقى, 10 مامانعا 38,4 ميلليون تەڭگە كولەمىندە تۇرعىن ءۇي نەسيەسى بەرىلگەن. جالپى بيىل «ديپلوممەن – اۋىلعا!» باعدارلاماسىن ىسكە اسىرۋ ءۇشىن 1 ميلليارد تەڭگەدەن استام قارجى ءبولىنىپ وتىر. نەسيە جەڭىلدەتىلگەن شارتتارمەن, ياعني 15 جىلعا دەيىن, جىلدىق 0,01 پايىزدىق مولشەرلەمەمەن بەرىلگەنىنە قاراماستان, جىل سايىن بورىشكەرلەردىڭ سانى ارتۋدا. «2019 جىلدىڭ 1 قىركۇيەگىندەگى مالىمەت بويىنشا 1814 ماماننىڭ 652-ءسى نەسيە بويىنشا قارىز ەكەندىكتەرى انىقتالدى. ولارمەن ءتۇسىندىرۋ جۇمىستارى جۇرگىزىلۋدە. ناتيجەسىندە 2020 جىلدىڭ 1 مامىرىنداعى اقپارات بويىنشا بورىشكەرلەر سانى 529-دى قۇرادى. جالپى, «ديپلوممەن – اۋىلعا!» باعدارلاماسى اۋىلعا مامانداردى كوپتەپ تارتۋعا جانە جۇمىسسىزدىق دەڭگەيىنىڭ تومەندەۋىنە مۇمكىندىك بەرەدى», دەيدى گۇلدانا جاۋىنبەكوۆا. بۇل رەتتە بەردىبەك ساپارباەۆ اۋدان اكىمدىكتەرىنە جوعارى وقۋ ورىندارىمەن تىعىز بايلانىستا جۇمىس ىستەۋدى جانە وڭىردەگى مامانداردىڭ جاعدايىنا تالداۋ جاساۋدى تاپسىردى. «جەرگىلىكتى جەردە تالداۋ جاساپ, قاي سالاعا, قانداي ماماندار قاجەت ەكەنىن انىقتاڭىزدار. جىل سايىن سۇرانىستاعى ماماندىقتار بويىنشا ۋنيۆەرسيتەتتەردى قانشا ستۋدەنت بىتىرەتىنىن باقىلاپ وتىرۋ كەرەك. بيىلعى وقۋ جىلى دا اياقتالىپ قالدى, ال اۋدان اكىمدەرىندە ونداي مالىمەتتەر جوق. ءبارىن از ۋاقىتتا ورىنداۋ كەرەك. مەن ءاردايىم بارلىق سالاعا جاس مامانداردىڭ قاجەت ەكەنىن ايتىپ جۇرەمىن. الداعى ۋاقىتتا ولاردىڭ باستاماشىل قاسيەتتەرى كوپتەگەن ماسەلەلەردى شەشۋگە ىقپال ەتەتىن بولادى. «ديپلوممەن اۋىلعا!» باعدارلاماسىنىڭ مۇمكىندىكتەرىن پايدالانا وتىرىپ, ءبىز ولاردى ءتيىستى قاجەتتىلىكتەرمەن قامتاماسىز ەتە الامىز», دەدى بەردىبەك ساپارباەۆ.
سونداي-اق, وبلىستىق جاستار ساياساتى ماسەلەلەرى باسقارماسىنىڭ باسشىسى سەرىكبول بەرىكقوجا جەرگىلىكتى اتقارۋشى ورگاندارعا نەسيەگە بولىنگەن قارجىنى پايدالانىپ, قىزمەتكەرلەر ءۇشىن تۇرعىن ءۇي سالۋدى ۇسىندى. باسقارما باسشىسىنىڭ ايتۋىنشا, ەگەر قىزمەتتىك پاتەرلەردى كەيىننەن ساتىپ الۋعا مۇمكىندىك بولاتىن بولسا, ول جاستاردىڭ اۋىلدا تۇراقتاۋىنا كوپ سەپتىگىن تيگىزەدى. بەردىبەك ساپارباەۆ بۇل ماسەلەنىڭ مىندەتتى تۇردە قارالاتىنىن جەتكىزدى.
جامبىل وبلىسى
