مەملەكەت باسشىسى نۇرسۇلتان نازارباەۆتىڭ جارلىعىمەن قايرات كەلىمبەتوۆ ۇلتتىق بانكىنىڭ توراعاسى بولىپ تاعايىندالدى. بۇل تۋرالى اقوردا.kz حابارلادى.
پرەزيدەنت وتباسىلىق جاعدايىنا بايلانىستى بەرىلگەن وتىنىشىنە سايكەس, گريگوري مارچەنكونىڭ ۇلتتىق بانك توراعاسى لاۋازىمىنان بوساتىلعانىن مالىمدەدى.– ول بۇل قىزمەتتە كوپ جىل, سونىڭ ىشىندە قيىن جىلدارى جۇمىس ىستەدى. ەلىمىزدىڭ قارجى جۇيەسىن دامىتۋعا, ۇلتتىق بانك جۇمىسىنا, ۇلتتىق قوردى باسقارۋعا زور ۇلەسىن قوستى, بۇل ءۇشىن مەن وعان ريزامىن, – دەدى ەلباسى.
مەملەكەت باسشىسى ۇلتتىق بانك توراعاسى ەتىپ قايرات كەلىمبەتوۆتى تاعايىنداۋ تۋرالى شەشىم قابىلداعانى جونىندە حاباردار ەتتى.– ول 45 جاستا, ماسكەۋ مەملەكەتتىك ۋنيۆەرسيتەتى مەن اقش-تىڭ دجوردجتاۋن ۋنيۆەرسيتەتىنىڭ تۇلەگى. سوڭعى جىلدارى ەكونوميكا جانە بيۋدجەتتىك جوسپارلاۋ ءمينيسترى, ودان كەيىن پرەمەر-ءمينيستردىڭ ورىنباسارى قىزمەتىن اتقاردى, كەدەن وداعىنىڭ قىزمەتى جانە ەۋرازيالىق ەكونوميكالىق وداقتى قۇرۋ ماسەلەلەرى جونىندە كەلىسسوزدەر جۇرگىزدى. ونىڭ ەل ەكونوميكاسى مەن قارجىلىق جاعدايى تۋرالى ءبىلىمى ۇلتتىق بانك جۇمىسىنا وڭ ىقپال ەتەدى دەپ سانايمىن, – دەدى نۇرسۇلتان نازارباەۆ.
پرەزيدەنت قابىلدانعان شەشىم ەلىمىزدىڭ دامۋىنا سەپتىگىن تيگىزەتىنىن اتاپ ءوتىپ, ۇلتتىق بانكتىڭ ساياساتى وزگەرمەيتىنىنە توقتالدى.
